🎬Marvel隊長2| 劇透影評 | Marvel真收皮了嗎？票房不濟？這套已好過不少Phase 4作品 但仍然鍾意唔落 驚奇隊長2 The Marvels | 廣東話 | Sam先生🎬

「經期隊長」第一集之所以咁難睇，我覺得某部分係嚟自於佢呢個角色先天性嘅一啲缺陷。Captain Marvel ，嘩實在太威能，上天下地無所不能，導致佢每一次出場嘅時候，佢都要擺個係威係勢咁樣。有一種呢「喂!我就係Badass Woman Superhero」 嘅嗰種態度啦， 一定要表現出嚟畀你睇。咁樣嘅處理，就會令到呢一個角色喺佢嘅角色曲線上面呢，少咗好多表現脆弱嘅機會。又或者只係得非常淺層嘅內心世界係會畀觀眾知道同埋了解。大家記唔記得上一集，佢去到嗰個打鬥之前嗰幕，嘩勁掘強，抬起頭連續嗰幾個pose，嗰幾個shot，完全唔係Carol Danvers 呢一個角色經歷咗啲咩故事呀，危機呀，之後嘅成長嚟。佢純粹就話畀你聽 「佢由一出世呢已經係咁有吉士㗎喇，咁有態度㗎喇。」

唔知係好彩定唔好彩，畀個飛機嘅引擎呢近距離爆一爆，畀啲藍光呢，傷眼嘅藍光呢，射一射，Carol 就似係一個被選中嘅細路，所以佢就「我有超能力，我可以吊打曬所有壞人喇」就係呢一種呢咁無腦啦，片面嘅描寫。同埋佢個英雄嘅定位呀害死咗呢個角色。你試諗下喎，去到《Endgame》嘅時候，佢只係一個幫手搬Ironman返地球，到最尾打外星艦隊嘅一個工具人。你並唔會關心佢呢個角色嘅成長，亦都唔會留意到佢有啲咩咁可愛嘅地方。

咁嚟到呢一套真正嘅系列續集，我諗Marvel都應該知道咩事，所以今集就起用咗兩個 同佢team up，有個team up作用嘅角色。有Carol嘅好朋友 - Maria Rambeau嘅女。喺《Wandavision》入面，佢因為進入咗個結界而獲得咗超能力嘅 Monica Rambeau - 光子 Spectrum。而另外一位就係喺今年Disney+上面 已經推出咗個人劇集嘅《Ms.Marvel》，即係驚奇少女 Kamala Khan。而你留意，今次嘅續集嘅片名，佢唔係Captain Marvel 2，而係變成一個好似組合名一樣《The Marvels》。

首先我會形容我幾鍾意佢今集擺咗Kamala入嚟。首先本身喺漫畫設定，Kamala係Captain Marvel嘅 一個瘋狂嘅粉絲，喺劇集度都有表現到出嚟。佢喺今集就好成功咁平衡到 Captain Marvel呢一個角色嘅嗰種沉悶嘅感覺。起碼時不時你會聽到Kamala喺度花痴下，嗰個眼神嘅表情，又或者好似啲年輕人咁不停地講自己嘅嘢。嗰種輕鬆，嗰種喜感，佢同Carol之間嘅嗰種氣氛互動作用係加分嘅。只不過喺角色嘅衝突，嗰種角色線嘅互動上面，佢哋之間嘅情節就可以話係到喉唔到肺喇。反而有少少好似畀奸角 - Evil Plan拉住走咁。佢同Carol明明可以寫係一個幾特別嘅一個師徒嘅關係。又或者佢係一個英雄偶像，佢係你英雄偶像嘅一個咁嘅角色線，一個咁嘅關係去寫。但係暫時喺今集你都見到佢仲停留喺幾表面，冇點深入咁發掘佢哋兩個之間嘅嗰種關係。

Kamala嘅家人喺今集就好似冇乜作用咁。除咗一路好似監護人咁，好緊張好擔心呢位 未成年嘅Superhero之外，佢呢個屋企嘅一種Bonding，又或者價值觀，我又未覺得佢好影響到主角嘅Carol Danvers，但係同時間呢抽嘢又唔係好幫到Kamala嗰條線。所以有少少我唔係好知道佢想點嘅感覺。

而另外Monica Rambeau嘅呢個角色理應佢係同Carol 應該會更加多嘅交集、多啲嘅感情。今次嘅設定就係因為Carol 答應咗返嚟搵佢，但係消失咗，冇喺地球度活躍好耐。而Monica 嘅媽媽Maria亦都喺Benos彈指嘅時候死去，都令佢哋兩個角色中間有啲嫌隙，有啲誤會，有一個我覺得可以係化解嘅一個角色衝突。只不過整體嚟講佢同Kamala嗰條線差唔多，反而電影版Evil Plan嗰個時間好似仲多咁。冇記錯 Monica 同Carol 之間嘅關係，喺電影裏面只係得最多三四場嘅時間去講，又或者發展過佢哋之間嘅關係，提及過一啲感情啲嘅嘢。明明佢兩個之間嘅情感力量係可以好強。例如 Carol 對 Monica 得到超能力之後嘅反應、對Maria 呢個摯友離世嘅懷念、又或者佢哋兩個之間化解誤會嘅過程等等。但係喺今次嘅電影裏面，都係比較似係好片面咁略過就算數 ，有種明明可以發揮得更加好，令到 Monica 同Carol 兩個角色都好睇啲嘅感覺。

而我覺得都仲算係女主角嘅 Captain Marvel呢，Carol 俾我嘅感覺都仲係嗰種好強大威能嘅感覺。飛呀、打呀、射死光呀，感覺上就係「我係全宇宙最好抽嗰個」。當隔離 DC Superman 嘅系列都開始要發掘多啲 Superman 呢個人嘅脆弱呀、人性呀，等等嘅面向嘅時候 ，Captain Marvel 呢嗰種由上而下嗰種俯瞰、嗰種好凌厲、我好強悍嘅眼神。又或者嗰種唔需要表現佢脆弱嘅一面，嗰種好冷冰冰嘅感覺，今集都仲響到嘅呢一方面。我真係睇完第二集呢，我都覺得有邊個會真係愛上 Carol Danvers 嘅呢一個角色設定呢 ?今集真係算好好彩㗎喇，叫做有啲位 Carol Danvers 會畀另外嗰兩位 partner，兩位同伴去教訓下。又或者用另外兩位嘅嗰啲相處去中和返 Carol 嗰種冰冷，嗰種強勢。特別係 Kamala，起碼佢啲對白啦，表情啦，佢整體帶出嚟嘅氛圍呢係娛樂到我先。你試諗下如果今集冇 Kamala ，淨係得Carol 同 Monica 嘅話，出到嚟係咩後果呢?我真係不敢想像。

咁整體角色嘅描寫雖然唔係話好深入，但係勝在呢又唔算話好沉悶，又亦都冇犯下啲咩好大嘅錯。係有某啲角色比較多餘啦，功能性啦。例如係 Kamala 嘅屋企人啦，朴叙俊飾演嗰個唱歌星球嘅王子等等。甚至乎係 Nick Fury 今集都係完全地「打醬油」，冇嘢幫到，冇嘢交集，呢幾個位對我嚟講都係幾扣分嘅。咁但係如果以一套娛樂片，爆谷片嚟講呢，呢啲位我就隻眼開隻眼閉啦，有得你啦。

去到劇情上面，今集嘅主軸呢都真係幾典型嗰種「無腦硬推嘅危機」。即係嗰種壞人 有個Evil Plan ，搵到一半嘅神器，跟住就從而引發一個有一個嘅危機去唔同嘅地方到威脅其他人。