#MM｜中環怡和大廈點解用圓窗？起全港首個天橋系統 前身為康樂大廈曾經係亞洲最高大廈 70年代電視劇《蜘蛛俠》特技人曾爬上去 曾經象徵香港經濟起飛的年代｜#旅遊止癮

（鏡頭影住Chloe用手示意一棟白色的模型）
Chloe：咁呢呢個模型呢就係展示咗怡和大廈嘅設計啦，佢係特登用咗個竹子型嘅設計，所以其實我哋見到佢個主力牆呢係入面，咁所以依家先可以做到個外牆咁薄囉。成棟大廈呢啲圓窗加埋呢係有成1,748個窗嘅。

（資料短片）
旁白：咁點解係圓窗呢？除咗當年係流行幾何建築之外，仲係因為愛～。當年嘅日籍建築師木下一先生為咗同女朋友求婚，而由加拿大追到嚟香港。係佢諗緊廈樂大廈用咩窗個陣，路過嘅太太（前女朋友）就話啦：「Ee，成日都係方型窗，好悶喎。不如試下圓型啊？」成就咗一代科幻icon。

（Chloe用自拍棍，加360度攝影模式）
Chloe：Woah～～我人生第一次見呢一個圓形窗啊。我覺得呢我依家好似係一個潛艇入面咁。（鏡頭影向圓形窗外，維港景）原來呢，個維港兩岸都好似都幾窄咁，見到個天星小輪好似好快就來回到。

旁白：每個圓窗直徑大概2米，外框比內框大少少，形成我哋係邊度都睇到嘅立體感。向海嘅大窗最緊要頂得住大風，方型嘅窗個風力會集中係玻璃中間，增加玻璃窗嘅損耗。圓窗嘅好處係呢，可以卸力去到窗框，玻璃冇咁易爛。早幾年木下先生返嚟（怡和大廈）都話「早知當年再整大啲個窗啦」。

（Chloe用魚眼鏡模式自拍緊）
Chloe：我哋依家去到南邊嘅示範單位。（推開單位大門）OHHH～Waah~呢一邊係L型嘅（單位）。（望出圓窗）新式個啲大廈已經變哂全部都係玻璃外牆，全部都係長方型嘅玻璃窗啦，但係呢一度就係圓型，所以好唔同。呢度（南邊）就會覺得似返係中環。
Chloe：咁呢我哋係南邊呢一個單位就見到其實呢係好近其實大廈同馬路啦，係因為當年起怡和大廈個陣仲有街影法，咁為咗要起高啲呢，咁成棟大廈就要向馬路個邊㧬㧬㧬(粵拼：ung2)埋啲，咁太陽射落嚟個時，個影就會掉落個馬路度，唔會影響到其他大廈啦，咁所以呢北面個空間就會比較大好多啦，而最特別係因為對面嘅大廈係玻璃外牆，所以由（對面樓嘅）外窗可以見得返自己係圓形窗入面，好得意喎我覺得。即係你係室內由圓窗望出去，跟住係出面窗嘅倒影又見到自己係圓形入面，係咪好indie（非主流），hehehe～

（資料短片）
旁白：70年代係裏面（怡和大廈）返工，肉體同靈魂都象徵住on top（置身頂端）。爬上去，真係聽到都興奮。當年嘅佢（怡和大廈），成日都客串拍電影。1977年，邵氏拍咗套由李修賢主演嘅《猩猩王》，有日本《哥斯拉》特攝大師有川貞昌做特技拍攝，（內容講述）女泰山同猩猩王嚟報復虐待動物嘅香港人。猩猩爬上大廈頂樓，最後跌咗落郵政總局。

（鏡頭影住Chloe睇緊《猩猩王》）
Chloe：喂，你一睇就見到以前啲大廈勁矮囉。
背景女聲：Wah，佢哋真係吊威也拍㗎喎。
Chloe：真係係度拍？（驚訝）
背景女聲：係啊。
Chloe：咁咪好恐怖囉。

（資料短片）
旁白：1978年10月嘅一集《Spider-Man》（電視劇集）“The Dragon’s Challenge”裏面，個陣時著名嘅特技人Fred Waugh仲特登爬上康樂大廈嘅頂樓，臨近頂樓嘅轉身，到今時今日都仲有fans group（粉絲群組）係度討論緊。1981年嘅《七彩卡通老夫子》，老夫子仲住係康樂大廈頂樓個間木屋裏面𠻹。

（鏡頭影住展覽品）
Chloe：睇返啲postcard呢，我先發現中環當年iconic嘅building係呢度，因為係我出世嗰個年代（Chloe係00後），我會覺得可能係IFC啊，匯豐啊，中銀大廈個啲啦。個海岸線唔同咗啦，以前個啲大廈係得呢棟嘢（怡和大廈）嘅一半高，咁可能最多都係得20幾層。但係依家呢棟嘢有50幾層嘅時候，跟住可能依家最高個棟大廈都百幾層嘅，呢棟大廈就會好似被人遺忘咗。但係當年佢就係一個賣點，即係連個鎖匙扣都用帆船同呢棟大廈（怡和大廈）做主角，咁我就覺得呢棟大廈當年應該幾厲害嘅。

旁白：犀利，仲係非常犀利𠻹。

（採訪中）
車季良（60後，廈樂大廈的設計公司Palmer and Turner P&T Group董事）：以大半生人呢都理解佢叫康樂大廈多啲。我諗都係70年代全香港，或者全亞洲最高（建築）啦，（象徵住）中環嘅擴大啦。70年代真係一個經濟起飛嘅時代，個時嘅康樂大康嘅電梯分咗3個區域啦。咁如果你講高區嗰個電梯嘅速度呢，就係7 meter per second（每秒7米），咁應該當時嚟講都算係全亞洲最高速㗎啦玩到，今天（啲電梯）就快好多啦，係香港最快可能去到16點幾 meter per second（每秒16米多），咁但係呢就你平時返屋企等電梯，住宅嚟講呢，都唔會咁快嘅，平均我諗3 meter per second（每秒3米）嘅概念。

旁白：木下一先生係自傳裏面寫佢鍾意藝術家Victor Vasarely，設計康樂大廈個陣受佢影響。而Chris（車季良）讀書個陣，亦都聽過木下一講talk（講座），當年佢（木下一）拎出一張新奇士橙嘅相講解怡和大廈。

車季良：咁我覺得佢真係想啲學生呢係設計裏面呢，注意本土嘅特色啊、文化啊，喺個度借到啲設計嘅靈感啊同概念啊，咁我覺得呢個反而係我得到嘅message（訊息）啦。咁作為學生呢，我覺得都終身受用嘅。

（鏡頭影向Chloe走入歷史檔案室）
旁白：咁究竟係幾時改名㗎呢？1988年，怡和由畢打街嘅總行搬到嚟康樂大康，跟住就改名怡和大廈。係大廈嘅2樓，有個歷史檔案室。

Chloe：我想問吓呢啲圖呢係咪以前手畫㗎？
Kitty（高級歷史檔案經理及主管@企業歷史檔案部）：係啊，依家基本上唔會有人再用手親自去畫呢啲圖則㗎啦，咁依家用哂電腦，咁所以更加令到呢啲圖紙珍貴囉。我相信上一代好多嘅建築師佢哋都好懷念呢個階段，啫係佢哋都好鍾意擦下畫下，擦下畫下，佢哋覺得自己係投入係個過程裏面囉。

旁白：木下一先生本來想突出摩天大樓嘅未來感，想用鋁板做外牆㗎，但係當年想起得快啲同埋慳錢，最後用咗紙皮石外牆。

Chloe：後尾去到80年代嘅時候呢，就係因為紙皮石會剝落嘅緣固，所以就加返鋁板，變返原本嘅設計，不過佢哋呢就冇剷走啲紙皮石，所以我哋依家係條喇（窗縫）度呢都會見到佢um住咗個啲紙皮石囉。

Kitty：係樓上樓下個啲角落頭位咁樣，係啲做工程嘅同事先會有機會執到囉，咁所以依家有呢幾粒，我哋都覺得好珍貴。咁我都會話「下次再執到，你哋都唔好揼啦」。
Kitty：你見啲相片，我哋（興建怡和大廈個時）冇用呢個竹棚，咁我哋用咗另一個新穎啲嘅方法就是打地基，係一層一層咁樣起上去嘅，預10至14日起一層。咁我哋訪問咗一位當年我哋嘅顧問公司工程師，咁因為呢個始終都係當年嘅摩天大廈，咁佢就怕坐個啲吊𨋢（工地升降機）啦，咁佢就同佢同事寧願用腳行上樓。

（插入採訪短片）
Michael Corbyn （J. Roger Preston and Partners 前機械工程師）(英文翻譯)：大樓每11天建高一層，我們要監察工程進度。我們每天走上樓時會停下喝咖啡，我們每星期都說我們擁有全港最高的咖啡店。

Kitty：不過係行得攰啲囉，係啦。
Chloe：要行五十幾層㗎喎。
Kitty：係啊，咁佢唔想坐吊𨋢（工地升降機）呀嘛。（兩人笑出聲）

旁白：都市傳說就話，係1971年香港政府同置地簽買地合約個陣，應承咗康樂大廈前面唔可以有其他建築物阻擋個海景，其實係咪真嘅呢？
Kitty：始終我係做歷史檔案啦，一日我冇見到一份真正嘅文件，我都唔會答係定唔係囉。

Charles Lai （80後建築歷史學者）：我成日都會撈亂㗎，我叫都係叫康樂大廈嘅，但係依家個名係咪已經係怡和大廈？Haha。
旁白：80後建築師Charles（黎雋維）最鍾意佢（怡和大廈）地下嘅公共空間，我哋由隻腳睇起。
Charles： 呢隻腳，哈哈哈，其實佢個外型好有趣，好有幾何性嘅，好geometrical（幾何性）。上面個外牆就好笨重啦，但係落到嚟呢度呢其實就好優美、好修長嘅一隻腳咁樣樣囉。我最鍾意嗰個位就係嗰個大堂嘅一個空間，兩層樓高嘅一個空間。係中環呢，其實呢um，好少可以見到一個咁清徹明亮，咁通透嘅空間嘅。怡和大廈係冇podium（平台）嘅，咁地下就係一個設計得好好嘅一個花園啦，亦都有一啲嘅art work（藝術品）係呢個花園度啦。

佢同以前天星小輪碼頭嗰個空間嘅關係，就會明佢點解中間要做個plaza（廣場），就係（預計）佢都會係一個非常之繁忙嘅空間嚟嘅。呢個空間嘅比例，空間嘅scale（比例），唔係用啲咩嘢嘅名貴嘅material（物料）、名貴嘅裝修可以堆砌得到。佢最luxuary（奢華）、最有份量嘅地方就係個空間。

旁白：另外，因為佢將地下全層都變咗做公共空間，已經額外得到3倍嘅地積比率。同時木下一先生都設計咗天橋系統，跨過成條大馬路連接其他嘅商廈，增加咗公共空間，亦都成功爭取到18倍嘅地積比率。

（Chloe企係天橋上）
Chloe：因為我幼稚園個陣係中環讀㗎啦，跟住我小學同中學每一日搭校巴都會經過呢條街。我印象中呢，我淨係記得呢條天橋係好長、好長、好長，好似行極都行唔完。跟住我哋翻查返資料，其實呢個天橋系統係全香港第一個天橋系統。而當初怡和大廈起呢個天橋系統個時呢，因為用咗啲公共空間，就可以提升個地積比率，所以棟大廈先可以起得咁高，就成為當年嘅摩天大廈啦。同埋呢條天橋收埋咗一個海水做嘅冷卻系統，就係供俾怡和大廈嘅冷氣機用嘅，而啲水管就收埋哂係天橋底度啦。

（Chloe企係展覽板前）
咁嚟到呢邊呢就係介紹怡和大廈以前同依家嘅分別啦，咁我哋見到當年係好興幾何設計同埋有太空嘅感覺，但係幾何設計好似係七、八十年代興咗一排之後呢，依家又唔係好見到咁樣囉。不過我都幾鍾意呢個（手指展版上其中一張相片，相中商店牆壁都造成圓柱體，櫥窗都造成圓形），你諗下我哋shopping嘅時候好似太空漫步咁，好型囉～

旁白：舊年，地庫原有嘅酒樓同埋日式餐廳擴展成依家有12間高級食肆同埋酒吧嘅Base Hall，而係中環做打邊爐起家嘅「珍姐」都進駐咗喎，午市暫時主打碟頭飯，晚市新增豉油西餐（港式西餐）鐵板燒。

（Chloe係Base Hall試食中）
Chloe：我好肚餓啊，所以我哋要開餐啦。咁呢個呢就係Base Hall獨有嘅樂哥番茄咖哩牛脷飯（$85），一切落去個下已經發覺係好嫩囉。（Chloe放牛脷入口）Umm，好好味啊！（藏鏡人：係真嘅？）（Chloe點頭）真心。上碟嘅時候已經聞到好大浸檸檬菜味啦，跟住同埋咖哩加咗孜然粉啦，同埋佢將個港式咖啡揉合咗日式咖哩度囉，所以成件事呢就冇咁Kun啦，同埋好夾個牛脷。佢哋係用咗牛脷心啦，而佢盡量都有將牛脷嘅前中後部分放哂落去嘅。咁前面就爽口啲啦，中間就balance（平衡）啲，而最後呢就會好淋身囉。

（Chloe企係某店counter前）
Chloe：依家我就要等呢個晚市嘅special 特別addition，鐵板餐。
店員：嚟～（遞上鐵板燒）蒜頭使唔使？少少呀？
Chloe：少少。
（店員加上蒜頭，再淋上鐵板燒汁）
（特寫鏡頭：招牌鑊仔封門柳鐵板餐$248）

（Chloe坐低試食鐵板餐）
Chloe：好緊張啊，好多人望住我。食啦（放牛肉入口），Ummm～（豎起右手手指公）。呢度嘅豉油西餐呢係冇用鬆肉粉去醃啦。我覺得佢用上封門柳去取代傳統嘅鑊仔牛柳呢，個牛味係濃啲啦，有𡁻口，就係比較貼近鍾意鋸扒個樣嘢，但係又似豉油西餐個種感覺。

（Chloe採訪Peter，「珍姐」創辦人）
Chloe：其實我哋之前都有去過你度打邊爐啦，（Peter：係呀無錯）跟住都見到（氣氛）係好興奮、好開心咁樣㗎嘛，但係嚟到呢度咪唔可以咁樣？
Peter：食Lunch可以有幾開心呢？
（Peter同Chloe相視而笑）
Peter：夜晚可以開心啲嘅，我哋個鐵板扒呢為咗達到（傾計）呢個目標呢，我哋係（可以無限）refill薯條同凍檸茶嘅，咁呀多啲同個客人傾計、social嘅環節，咁呀我都冇諗過入嚟呢啲咁嘅大商場，因為掣肘始終都比較多嘅，譬如招牌啊，errr，各樣嘢都有啲限制嘅。對於我哋啲咁反社會嘅人嚟講呢，就唔係好舒服嘅。咁但係落到嚟睇完之後，你係覺得有啲「吓？你哋都傻傻哋㗎喎。」老牌大業主收租好簡單啫，以前（Base Hall）有間大酒樓啦，有西餐廳，有日本餐廳，我都幾懷疑呢單嘢賺唔賺錢。

旁白：過去你好少嚟呢度，依家你可以嚟輕鬆食午餐。1980年，佢（怡和大廈）被合和中心（216米）追上，慢慢沒入維港嘅樓群。
不明男聲：50年嘅樓保養到咁新束束，內外都咁嘅狀態其實好唔容易㗎。
旁白：呢啲圓窗記錄咗佢（怡和大廈）當年諗盡辦法爬到最高。
不明男聲：代表咗啫，一個香港嘅摩登時代嘅一個頂峰嚟嘅。