新iPhone竟然一啪即裂？被人改名:火龍果｜華華合作！劉德華任華為代言人｜小米推13T Pro低價旗艦｜廣東話 #PriceWeekly 186

當去到徒手屈 15 Pro Max 嘅時候，部電話嘅機背玻璃竟然比佢一啪即裂。阿 Zack 自己都好驚訝，事關佢話屈咗手機成11年，大部份都係冇事嘅，尤其係 iPhone 好少咁易爛。今次佢都完全估唔到 15 Pro Max 竟然係一啪即裂。

另外佢亦有試屈 15 Pro、15 Plus 同 iPhone 15，不過呢 3 部機就冇事喇。今次最易出事嘅，竟然係最貴果部 15 Pro Max。睇嚟大家如果習慣擺喺褲袋，坐底嘅時候真係要小心啲啦，又或者穩陣啲買返個 Case 安全啲好，始終成萬蚊部電話唔小心坐爆咗，真係好心痛架。

另一單就係 iPhone 15 Pro 同 Pro Max 嘅過熱問題。唔少 KOL 同評測都發現，呢兩部電話嘅散熱好似麻麻地。我哋上星期都報道過，有內地評測喺試玩原神30分鐘後，15 Pro Max 嘅表面溫度去到成48度𠻹。

所以近期大家就幫呢兩部機改咗個花名叫火龍果，都幾 Cute 呀。另外我哋都測試咗 iPhone 15 Pro Max 嘅性能同散熱。當中喺戶外試拍 4K60 ProRes log 嘅時候，竟然都遇到過熱嘅情況。想知多啲可以襟右上角，又或者喺 description box 嘅 link 去睇我哋嘅評測啦。

小米最近就搞咗個發布會，正式發表咗 Xiaomi 13T 依個平價旗艦系列。佢有 13T 同 13T Pro 兩款，兩款都有藍、綠同黑色三種顏色。

其中藍色嘅背面係用 Xiaomi BioComfort 環保皮革，其餘兩款就係玻璃背面。佢哋都有 IP68 防水防塵等級，6.67 吋嘅 CrystalRes AMOLED Mon 有 144Hz 更新率、2600 nits 峰值亮度、DCI-P3 廣色域顯示，Dolby Vision 同 HDR 10+ 嘅 HDR 規格，仲有最高 2880Hz PWM 螢幕調光。

CPU 方面用咗 4nm 天璣處理器，13T 係天璣 8200-Ultra，Pro 就係天璣 9200+。13T 有 12+256GB，Pro 有 12+512GB，兩款都用 5000mAh 大電池容量，13T 支援 67W 快叉，Pro 有成 120W 快叉，但係兩款都冇無線叉電。

佢哋都用咗 Leica 鏡頭，主相機用三鏡頭配置，5000 萬像素 24mm 標準鏡頭用 1.28 分之 1 吋感光元件，F1.9 光圈 同 OIS 光學防手震，仲有 1200 萬像素15mm F 2.2 光圈超廣角鏡頭同 5000 萬像素嘅 50mm F1.9 光圈望遠鏡頭。前置鏡頭有 2000 萬像素同 F2.2 光圈。

官方售價分別係 13T 3299蚊 同 13T Pro 4599蚊，只要3300蚊起就可以用到旗艦級性能嘅電話，仲有皮革 feel 嘅背面，性價比真係滿分呀。

劉德華最近做咗華為嘅「非凡大師」品牌大使，喺 25 號華為搞嘅發布會入面，佢就自認係一個認認真真工作嘅普通人，夢想係成為一個非凡人物，而華為就係一間敢於非凡，不斷探索嘅公司。

講返發布會上面介紹嘅新產品先，當中最觸目嘅就梗係 Mate 60 RS 頂級旗艦手機。官方話佢嘅機身正面用上玄武鋼化崑崙玻璃，抗刮能力比 Mate 60 Pro 系列更好，機背就用咗陶瓷加鋁合金，令到外型更加尊貴不凡咁。

不過其他配置上面就同 Mate 60 Pro+ 大致一樣喇。售價方面 16+512GB 同 16+1TB 分別係 11999同12999 人民幣，為返港紙大概 12977蚊 同 14049蚊。唔知大家又點睇今次華仔同華為嘅 華華合作呢。

高通 Snapdragon 8 Gen 3 預計會喺 10月24號發布，有工程機曝光咗佢嘅最新跑分，喺 Geekbench 6 Vulkan 測試入面攞到 15434分，比 Gen 2 嘅 10447分高咗成 47.7%。就依個性能嚟睇，Snapdragon 8 Gen 3 基本上勁過 Apple 嘅 A17 Pro 好多。

亦都有啲外洩嘅文件就表示，Snapdragon 8 Gen 3 會有兩個版本，一個係台積電 4奈米嘅 N4P，另一個係台積電 3奈米嘅 N3E 製程。用唔同製程嘅情況係，Snapdragon 8 Gen 1 同 8+ Gen 1 用咗 Samsung 嘅 4奈米製程，但係效果好差，直到 8+ Gen 1 用台積電嘅 4奈米製程先有所改善。

不過今次直接就有兩個版本，到時再為大家報導佢哋嘅分別喇。

Microsoft 早前就推出咗四款 Surface 產品，第一款係 Laptop Studio 2，佢嘅外型同前代一樣，有 180度翻轉嘅 14.4 吋 3 比 2 解控 Mon，支援 120Hz 同 Slim Pen 2 手寫筆，HDR 都有提升，可以用光線感應器自動最佳化 HDR 嘅顯示效果，配埋 Gen 3 Movidius 3700VC VPU AI 加速器，最高可以配埋 RTX 4050 顯卡。

而第二款 Surface Laptop Go 3 算係前代嘅改版，佢維持 12.4 吋 3:2 螢幕，支援觸控同 Slim Pen 2 手寫筆，CPU 由 5-1135G7 轉做 i5-1235U，有 256GB SSD，RAM 就可以揀 8GB 或者 16GB，續航力就提升去到 15個鐘。

第三款就係 Go 4 For Business 呢部商務平板電腦，有 10.5 吋 1920 x 1280 嘅觸控 Mon，用上 Intel N200 CPU、8GB RAM，有個 800萬像素嘅後置鏡頭，同埋 NFC 晶片，重 521 g，有 12 個半鐘續航力。

最後係 Surface Hub 3，佢係 for 企業會議用嘅超大型裝置，有 50 吋同 85 吋嘅 4K Mon 可以揀，支援防手掌誤觸嘅 20 指觸控功能，Mon 仲有防眩光塗層，減少咗反光問題，50 吋版本可以垂直旋轉，配合 Smart AV 智慧收音功能，會自動根據螢幕方向調節收音位置，仲會最佳化垂直顯示嘅介面。

近期 G-Shock 就同唔少單位做 Crossover，首先係同 Riot Game 嘅 LOL 合作，推出咗兩款新手錶，首先係靈感源自遊戲世界嘅 GM-B2100LL，有一個全金屬嘅八角形錶圈，錶圈有特登呈現出做舊嘅外觀同感覺，另外顯示器同分針都用咗代表 Hextech 元素嘅藍色。

第二隻就係以人氣角色 Jinx 做靈感來源嘅 GA-110LL，除咗有獨特嘅三維錶盤，喺錶帶同 9 點鐘嘅位置都有 Jinx 好 signature 嘅武器，另外喺成隻錶嘅唔同位置都有出現唔少 LOL 嘅標誌。

至於喺香港，Casio 為咗慶祝 G-Shock 40 週年，同葛民輝主理嘅 4A like Black 20 週年，就 crossover 推岀一隻 Heroic Kogiant，高 36 cm 嘅 Heroic Kogiant，着住黑色印住 23 號嘅籃球衫，代表著 2023 呢個特別嘅年份。

見到手腕位有預留咗空間，可以比佢帶到隻 G-Shock 嘅手錶，另外佢嘅內部結構係一個九宮格嘅儲存空間，中間位亦都可以擺到一隻 G-Shock 手錶。

由 10月16號起喺 Casio 授權嘅網店買任何一隻 G-Shock 手錶，就可以以 $3980 加購，全球限量 300 隻，有興趣嘅朋友就唔好錯過啦。

今集 Price Weekly 又差唔多啦，你哋最鐘意邊單新聞呢，歡迎喺下面留言話比我哋知，仲有就係多謝大家支持我哋同毛守救援嘅合作活動，我哋已經將款項交到毛守救援負責人 Kent 手上啦，感謝毛守一直對小動物嘅付出，亦再一次喺度感謝大家。

大家記得訂閱我哋 channel，再按旁邊的鐘。

Bye bye。