警世︰愈要開心愈不開心 | 快樂悖論與幸福哲學對個人與社會有何啟示？ #哲學家講呢啲

值得一提嘅係，研究嘅另一個發現呢，當啲人感覺到時間變少，啲人會追求啲咩?會追求財富物質。但係好不幸地，其他心理學研究已經指出過，追求財富物質，其實係冇乜會令人覺得快樂㗎，反而係要追求體驗、經歷，呢啲嘢先至會令人感受到真正嘅快樂。所以時間變少似乎真係會令人更加唔快樂。咁呢一切對我哋個人有咩啟示呢?就係如果我哋真係想追求快樂，真係想開心嘅話呢，我哋唔應該諗住一定要追求快樂、要開心，唔應該咁諗。反而應該諗下自己，其實我已經有唔少開心嘅嘢、快樂嘅回憶、快樂嘅經驗，自己細數一下擁有過啲乜嘢，或者我哋慢慢就會學識享受下我哋而加呢一刻嘅經歷，欣賞吓我哋自己已經擁有過嘅嘢，咁反而慢慢會覺得更加快樂。同埋我哋唔好淨係覺得物質財富就等於快樂，絕對冇呢件咁嘅事，反而我哋要著重一啲人生唔同嘅經歷、體驗，咁個人就會開心啲㗎喇。
開心嘅人生即係好嘅人生?
呢一切對於個人嚟講就係咁啦，咁對於社會嚟講又有咩啟示呢?係咪啫係話我哋個社會如果要啲人開心嘅話，就要制造多啲快樂嘅體驗俾人啦，譬如整多啲開心嘉年華，全年365日都有嘅，係咪咁樣個社會啲人就會好快樂呢?咁緊係唔好咁天真啦，喺呢到就要講下少少快樂嘅哲學喇。其實我哋啱啱講到嘅嗰啲心理學研究呢，通常都係著眼於快樂作為一種主觀感受嘅一面，而快樂其實係有其他面向㗎。
先畀大家一個思想實驗，大家都會好快get到我講咩。假設我哋有個人有基因突變，佢一出世就不斷有一啲開心嘅主觀感受係咁湧出嚟，成日都笑，仲好開心。之後佢慢慢大個咗，佢屋企人就發現佢讀唔讀書都係咁開心㗎喎，所以送唔送佢返學都冇咩所謂啦。咁之後佢繼續大個啲，佢鄰居又發現，我叫佢幫我做呢樣做嗰樣，唔收錢，佢都咁開心㗎喎，咁不如繼續奴役佢都冇所謂啦。咁後來佢又大咗，變到又老又病，醫生就發現，佢其實有病冇病都咁開心㗎喎，咁醫唔醫都冇所謂啦。咁去到佢最後臨死之前嗰一刻，佢依然都係不斷有一啲開心嘅感受係咁湧出嚟。咁我哋覺唔覺得佢嘅人生就係快樂呢?我相信好少好少人係真係會覺得呢一個有基因突變嘅人生係真係快樂嘅，雖然佢不斷有開心嘅主觀感受湧出嚟。
個人同社會嘅幸福
咁啫係我哋要區分快樂其實係有唔同嘅面向，至少有2種，姑且一種叫開心，另一種叫幸福啦。開心，就係快樂嘅主觀感受，幸福就調翻轉係一啲客觀條件嘅滿足嚟。譬如幾時你會開心呢?可能夏天好熱嘅時候食杯雪糕，咁你未即刻感受到「好開心喎」。咁幸福就係一啲客觀嘅條件，譬如你收入穩唔穩定呀、工作穩唔穩定呀、健唔健康呀、你嘅教育水平好唔好呀、你嘅人格健唔健全呀、你嘅居住環境好唔好呀、你社交生活夠唔夠... 呢啲客觀嘅條件就可以同人比較，甚至係可以量度一下。
重點就係個人嘅快樂同社會嘅快樂喺結構上係好相似，都係有開心同幸福呢2方面。咁社會開唔開心就係睇下啲人，社會上面嘅人嘅主觀心理狀態啦，覺得自己呢一年開唔開心呀，有好多社會研究都係做呢一樣嘢嘅。但係社會嘅幸福呢，調翻轉就係睇一啲客觀嘅條件喇。譬如睇下經濟生產，GDP。亦都睇下貧富懸殊嚴唔嚴重啦，通常愈嚴重就愈唔幸福。醫療水平啦，越差當然越唔幸福。教育水平啦，越高啲人就越開心。環境保育都關事，你住喺一個環境愈好，當然你會越感受到幸福。唔同領域嘅專家，譬如心理學家、經濟學家每年都不斷係咁建議呢個社會喺客觀條件上可以點樣得到幸福快樂呢啲嘢嘅。例如聯合國嘅世界快樂報告，或者世界快樂議會嘅年度報告，呢啲網上面都有，大家有興趣可以睇下，我喺呢度就唔長篇大論喇。
咁但係關鍵係乜嘢呢?關鍵就係如果真係想令一個社會真正地快樂同幸福呢，其實政策嘅評價準則就唔應該淨係講「我哋呢一個政策會唔會為社會帶嚟有幾多經濟生產，促進咗幾多GDP嘅上升」，唔應該淨係睇呢啲。但係調翻轉亦唔應該淨係睇下快樂嘅主觀面向，即係「係咁搞嗰啲開心嘉年華呀，等啲人狂歡一下呀咁就搞掂㗎喇」，都唔係咁樣㗎，而係要認真處理一啲客觀條件上面嘅問題，例如係貧富懸殊、醫療、教育、環境呢啲咁嘅真正關乎人福祉問題嘅東西係要處理嘅，咁樣社會上面嘅人先會真係幸福同快樂。
我哋呢段片做咗一個總結啦，我哋講咗個人同社會點樣追求真正嘅快樂。咁我都祝大家唔好做一隻開心嘅豬，要做一個幸福快樂嘅人。多謝，咁就下次再見啦。