iPhone 15實機曝光！摺機極限測試 開合40萬次唔壞？Disney+加價27%｜Astell & Kern UW100MKII發燒級TWS｜廣東話【Price Weekly 179】

嚟排繼續有好多關於 iPhone 15 資料傳出，當中包括呢幾張聲稱係 15 Pro 嘅實機照，可以見到除咗講咗好耐嘅 Type-C 接口之外，側邊嘅靜音鍵仲由原先可以上下撥嘅樣，變咗做一大粒實體掣，傳聞用家之後可以自己將呢粒掣 Set 做 function，好似係用佢開電筒、開相機，甚至當快門咁用都得。

另外 iPhone 15 4 個型號會唯持一樣，都係叫 15，15+，15 Pro 同 15 Pro Max，而之前一路吹到好行嘅 15 Ultra 就話會留到起碼 2024 年，Mini 版亦都唔會再有後續。

另外一路傳左好耐嘅蘋果摺機，最近又有新消息流出。有媒體發現 tvOS 17 Beta 5 代碼入面有 iPhone 15,4 同 15,5，兩款都唔係 iPhone 14 嘅機型，而 Beta 1 版 更加有 16,1 同 16,2，究竟蘋果幾時先再有 One More Thing，大家記得留意嘞。

最近外國有 YouTube Channel 拎咗 Samsung Galaxy Z Flip 5 同 Moto Razr 40 Ultra 呢兩部摺機嚟做個極限測試，佢哋一路開著直播，一路以人手方式不斷開閂兩部機，無間斷玩足一個星期，結果 Razr 40 Ultra 係摺咗 126,266 次之後就出現故障，而 Samsung 就摺咗 401,156 次先壞，雖然結果係摺到太約 20 萬次，Z Flip 5 無咗 Flex Mode 懸停功能，固定唔到喺特定角度，但呢個數字依然符合官方比出嘅承諾，算係好襟用。

音響品牌 Astell & Kern 前幾日就公佈咗 AK UW100MKII，作為 UW100 嘅後繼機，新機主要沿用番上代耳機嘅外形設計同風格，但明顯見到叉電盒嘅尺寸縮細左唔少，另外內部結構都採用咗全新設計，搭載 Knowles 嘅全音域平衡電樞單體，支援 aptX adaptive，搭配獨立 DAC 晶片改變內部格局，調整單體位置去提升物理音質，同時改變左線路設計令聲音更加乾淨，今代支援 4 個階段嘅環境音模式，但要留意嘅係佢無主動降噪，至於續航力方面都有升級，由上代嘅 6 個鐘變到 9.5 個鐘，連埋叉電盒更加用到 29 個鐘，UW100 MK II 價錢係 299 美金，9 月會喺全球授權嘅經銷商發售。

上個月先出去新機嘅 Nothing 又有新攪作嘞，Nothing 嘅 CEO 裴宇日前表示，公司未來將會推出一個主打價格親民嘅子品牌 CMF by Nothing，是 Color、Material 和 Finish 嘅縮寫，分別代表色彩、材料和質感，希望能夠為用戶帶來低門檻和簡潔設計的優質產品，裴宇預計新品牌將會喺今年年底正式推出，未來幾個月都會陸續知道更多細節。

迪士尼喺最近嘅財報會議度宣佈今年 10 月 12 號，北美地區嘅 Disney+ 月費會再加 3 蚊美金，由 10.99 提升到去 13.99，雖然未知香港會唔會都一齊加，但計返匯率每個月成 $110，仲貴過 Netflix 嘅高級 Plan，另外有消息指 Disney+ 嚟緊都會參考 Netflix，唔比用家 Share Account，所以大家都係做定心理準備，之後要自己比錢 subscribe 啦。

最近就有用家發現 Netflix 靜靜雞喺蘋果 app store 到上架咗一個叫做 Netflix Game Controller 嘅 app，介紹嗰欄就話可以喺電視上面玩 game，可惜 download 咗之後介面就顯示正處於測試階段，睇嚟宜加就未玩得住嘞，不過打入遊戲巿場一直以嚟都係 Netflix 野心之一，而 2021 年佢哋已經試過喺手機串流平台推出咗會員獨享嘅手遊，所以嚟緊佢哋再有新搞作都唔出奇。

上星期先同大家介紹完，嚟緊 WhatsApp 可以實時 send 短片，今個星期又有新功能啦，就係 Screen Sharing 共享手機畫面，嚟緊當你同緊朋友 WhatsApp 視像通話嘅時候，就可以 share 你手機嘅畫面俾對方，因為呢個功能唔會局限用家，淨係可以 share 某啲介面或者 app，亦都容許多過一個人分享自己嘅畫面添，所以嚟緊無論係想 share 文件俾客，定係想示範一啲手機上嘅操作，做一個遠程教學比朋友都完全冇問題。

另外，為咗令大家用得更加方便，WhatsApp 都同時宣布用戶可以打橫部手機嚟視像通話，成個功能嘅靈活性好大。

唔知大家有冇諗過憑鍵盤聲就可以知道對方打咩呢？近日有英國嘅研究發現，黑客可以用 Deep Learning 嘅技術分析 MacBook Pro 打字聲，凖確率仲達到 95%，意味著黑客有機會可以透過 Zoom 或者 Skype 等嘅通話軟件喺通話過程中偷錄你嘅打字聲，從而竊取數據。不過就唔洗驚住嘅，專家話通話嘅時候如果 mute 咗個 mic 佢，咁就唔會比人偷聽到打字聲啦。