🛕新七大世界奇觀，建築技術一個比一個癲！｜格物冷知識｜格物致知

小癲 - 巴西里約熱內盧耶穌像
世界上，好多地方都有宗教雕像嘅，巴西依一個耶穌像之所以小癲，係因為個規模大呀。呢一個擘大對手嘅耶穌像喺1931年落成，高38米，1145噸重。雖然只係高過香港嘅天壇大佛4米，但就足足重成4倍有多。而佢左右手嘅指尖間距就有成23米，即係2個羽毛球場咁長。
佢本身嘅設計其實係耶穌用左手扶住一個高過個人嘅十字架，右手捧住一個波，做咩無情情擸走佢啲架撐呢?咁就要去翻20世紀初期喇。嗰陣時唔同嘅國家都好興起雕像或者嚟賀一賀啲重要日子嘅，而1922年適逢巴西建國100週年紀念，政府都要威翻鋪喇，於是就決定起座雕像。而當時負責嘅工程師就叫做 Heitor da Silva Costa(1873-1947)，而佢第一個design就係上便講嘅咁，耶穌左手拎住個十字架，右手捧住個波。佢個意思係想表達耶穌一邊背負住世人嘅罪，一邊掌管住世界，但係佢千算萬算，就係計漏咗巴西係一個足球王國嚟嘅。

係囉，點解呢?皆因19世紀未奴隸制啱啱廢除，350萬被解放嘅黑奴返到故鄉，但係佢哋未習慣有一個國民身份嘅，巴西政府就用足球提升凝聚力同民族性，好快足球就成為巴西嘅國民運動喇。講返正題先，呢個design，耶穌拎住個球體，當時政府就好擔心耶穌會變咗足球之神，搞到成件事好滑稽，所以成件事就ban咗呢個design喇，而我哋而家眼見嘅就係最終版本，將耶穌同埋十字架嘅概念合而為一，咁就皆大歡喜喇。

中癲 - 羅馬鬥獸場
問大家一個IQ題，斯巴達人鬥大隻，羅馬人鬥咩呢?羅馬鬥瘦長呀哈哈哈哈哈，睇吓佢哋幾奀(ngan1)?呢一個出名嘅鬥獸場喺西元前70年開始，由羅馬皇帝Titus Flavius Vespasianus喺在位期間起好嘅，係羅馬最大嘅鬥獸場。就咁樣喺出便睇，係一個圓形。但如果你喺空中望翻落去，查實佢係橢圓形嚟嘅，仲好鬼死大添。佔地面積有成20000平方米，即係2個香港足球場咁鬼大，可以容納到5萬至8萬嘅觀眾。觀眾席分為5個區域，最前排就係VIP位，專係畀元老、高官、或者係祭司坐嘅。順住數返上去，分別就係畀貴族、有錢佬、普通百姓，最後一排係企位嚟嘅，就係留畀啲底屠婦女用嘅。佢總共有80個出入口，畀班觀眾按照唔同嘅區域分流入座。喇唔好見佢冇遮冇掩咁樣喎，佢係可以拉個天幕落嚟遮風擋雨嘅，係咪行得好前呢?唔信問吓佢喇
(電影《明日戰記》劇情，由張家輝飾演嘅少將李昇講)「我，就係天幕」

眾所周知，呢一度係一班角鬥士互相殘殺嘅地方，之但係點解羅馬佬咁鬼鐘意睇人打交嘅呢?其實格鬥競技係古羅馬人傳統喪禮儀式嚟嘅，早喺公元前3世紀佢哋嘅喪禮唔興打齋，而係齋打，佢哋認為格鬥競技係對死者一個尊敬嘅送別形式。後來羅馬越來越強大，呢啲競賽亦都愈嚟愈有規模，角鬥場就越嚟越多，最大規模嘅，就係我哋講緊依個Colosseum。

喇大家睇得多戲，唔好以為呢啲格鬥一定係好嚴肅，純粹係睇人點死喎，其實佢係一個國家級嘅娛樂活動嚟嘅。我哋翻查National Geographic嘅專家講解，發現呢一個場有獎抽，有女溝，主辦方係會向觀眾席拋波仔，嗰粒波仔上面就寫住唔同嘅禮物，超級大獎就有車有樓有現金，而最多嘅細獎就係會送糧食，夠哂吸引喇。嗱佢出手咁闊綽係要話畀人知，羅馬帝國係幾咁強大，可以養曬大家都得。

而喺呢一個場地入便嘅賽事唔係就咁由你打餐死，都有啲合理嘅規矩嘅，理由暫停機制。係喇，打打下萬一你口喝、抽筋、急屎都可以嗌暫停嘅，場邊仲有唔同嘅補給，幫你按摩拉筋，提供水畀你飲，一應俱全。緊係啦，等佢哋有咁耐打咁耐呀跡，班街坊睇得過癮喇，咁未睇多幾場囉，賺多啲入場費呀嘛。

為咗留住觀眾，佢哋仲有一個特別活動，就係船P。係咪估佢唔到呢?羅馬人運用佢哋完善嘅地下水道引水流入競技場，配合水閘系統嘅設計，將個場注入100萬加侖嘅水，浸到1.5米高，變成一個水上競技場，專係畀人打船戰嘅。嘩，真係幾癲喎?而家有邊個場可以水陸兩用呢?

大癲 - 中國萬里長城
啲人話萬里長城長又長，呢一個世界奇觀唔單止有大癲嘅長度，起嘅時間都好長，足足用咗成2000年先至有今日嘅面貌。早喺春秋戰國時期，嗰陣時七國咁亂，大家都起城牆保護自己嘅領土。後嚟秦國統一六國，秦皇嬴政就勞師動眾將啲城牆連埋一齊。點解佢要咁做呢喂?因為佢想自己嘅霸業永垂不朽。根據史記秦始皇本紀第6記載，有一個叫做盧生嘅術士同秦皇講「胡邦外族將會滅你嘅國家」，秦皇即刻刻嚇到百佳，即刻命令全國修建一座可以圍住邊界嘅城牆，阻止胡人入侵。佢首先動用囚犯幫佢起城牆，但係都嫌慢，所以就索性奴役成千上萬嘅平民百姓，日以繼夜咁樣幫佢工作。嗰百幾萬人一係就餓死，一係就過勞死，而呢一個咁大嘅工程卒之將之前六國嘅城牆全部連接，西起臨姚，東至遼東，就係而家萬里長城嘅原形喇。

呢條友就真係大癲，不過最後未又係要改朝換代。由漢朝去到明朝，佢哋先後經歷咗好多次大規模嘅翻牆，即係翻新牆壁，佢哋直到今日都仲翻緊嘅，翻...翻新啊。今日嘅長城最東邊係遼寧省嘅虎山長城，一路去到最西邊嘅嘉峪關，總長度達8851.8公里，即係要行足2458.8次彌敦道咁長啊。嘩咁壯觀，究竟喺太空見唔見到呀呢?係見唔到嘅。(阿木細細聲咁講:人哋(楊利偉)講咋，唔關我事)

巨癲 - 墨西哥奇琴伊察
呢一個奇觀之所以巨癲，係因為佢係瑪雅民族嘅建築。呢一個文明雖然已經完全滅絕，但係呢一個建築就舉世聞名。奇琴伊察係一個佔地六平方公里嘅古瑪雅城市，位於墨西哥尤卡坦州南部。不過佢唔係畀人住嘅，係畀神住嘅，裡面有好多金字塔同神廟都係用嚟祭祀佢哋嘅神。其中最出名嘅，就係呢一個羽蛇神，個讀音就係KuKulkan。
呢一座羽蛇神金字塔暗藏玄機，因為佢係按照瑪雅歷法而建造嘅。九屠高嘅塔分做2邊，總共18層，代表瑪雅太陽歷法嘅18個月。金字塔嘅4邊各有91級樓梯，加埋一齊就係364級，再加埋頂層平臺嗰一級就即係365級，啱啱好就係1年嘅日子，相當有意思。最神奇嘅，係班瑪雅人仲要整埋一個物理回音嘅design，只要喺金字塔面前拍手，每一下嘅回音就會有一下雀叫。至於點解會有呢一個design嘅呢?真係KuKulkan先知。

話哂係祭祀神明嘅地方，呢一度當然有好多獻祭嘅建築啦。呢一個奇琴伊察大球場唔係用嚟「斬波」嘅，係用嚟「斬頭」嘅。呢班瑪雅人會定期喺度舉行獻祭杯，7對7玩法就類似足球，即係將個波射入嘅龍。贏嗰隊就架勢囉，佢哋嘅獎品就係將自己獻畀神明，由輸嗰隊親自郁手斬佢哋個頭落嚟。對當時嘅瑪雅人嚟講，獻自己條命畀神明係至高無上嘅榮耀，所以係冇人打假波嘅。
除咗主動獻祭，仲有被動添嘅。呢一度有個獻祭之井，班瑪雅人會定期喺個族度揀一個年經貌美嘅女仔，幫佢沖涼換衫，再抆到成身藍色，再帶埋啲金銀珠寶，然後監生掉落個井到。因為啲首飾好重，所以個女仔會慢慢沉落水底。但諷刺嘅係，呢一個井同時都係佢哋飲用水源，所以瑪雅嘅考古學家而都推斷當時嘅瑪雅民族人口減少就係因為呢一度嘅污糟水而搞到病菌散佈。瑪雅人意識到之後，就成個民族棄城走咗佬喇。

特癲 - 印度泰姬陵
俗語話結婚即係踏入愛情嘅墳墓，而呢一個印度嘅泰姬陵就係一個完美嘅愛情墳墓喇，因為呢一座嘢嘅背後係有一段可哥可泣嘅愛情故事嘅。話說17世紀初，有一個波斯貴族嘅女仔叫做芭奴，佢聰明伶俐，樣靚聲甜，就好似Hanni咁 (阿輝:唔係呀!係Candy呀!) (阿木尷尬咁笑) 佢17歲嗰年，有次行市集，佢遇到一個風度翩翩英俊瀟灑嘅印度王子，就好似Jeffrey咁(小薯茄嗰個咁)，佢哋一見鍾情。可惜，芭奴嘅老豆將佢許配咗畀一個阿富汗貴族，只能夠怪相逢恨晚，造物弄人啊。正當芭奴以為呢一輩女都要喺阿富汗度過嘅時候，佢老公居然畀人暗殺，佢就唯有返返娘家，眨下眼，就做咗17年嘅寡婦喇。不過有緣千里能相會，有一次佢又參加市集，佢又遇到一個風度翩翩英俊瀟灑嘅王子，望真啲，咦~~~原來就係當年嗰個王子。兩個人愛火重燃，即刻閃婚。雖然芭奴係佢第20任嘅妻子，但係兩個人情比金堅，打風都打唔甩，兩公婆互相扶持又互補長度又盛咁，咁到咩咁呀。

12年後，王子登基成為國皇，而芭奴就被尊稱為慕泰姬．瑪哈。印度嘅傳統觀念認為生得愈多，就證明愛情愈忠貞。17年嚟，佢哋總共生咗14個愛情結晶品，嘩唔怪之得印度咁鬼多人啦。不過，仲以為可以百頭到老，就喺佢生完第14個仔嘅時候，芭奴難產而死。當時，呢個國皇傷心欲絕，一夜百頭，佢決定遵從佢太太嘅遺願，幫佢起一座舉世無雙嘅陵墓，再用佢嘅封號嚟命名。呢一個國皇嘅晚年就係每日望住呢一座泰姬陵鬱郁而終。最後，佢自己都埋葬喺呢一個陵墓裡面。
泰姬陵巨癲嘅地方唔單止呢個故事嘅，仲有佢嘅建築特色。成個陵墓係長方形，佔地17萬平方公尺。入便有前庭、正門、花園、陵墓主體同埋兩座清真寺，每一Part都係完美對稱平衡嘅。而座主體係用全白嘅大理石建成，無論係建築結構、用色、材質、比例上，都配合得天衣無縫，自自然然就散發出一種和諧嘅感覺，望落真係好C服呀，唔怪之得可以世界奇觀啦。

狂癲 - 約旦佩特拉古城
上集講到，喺沙漠地區有一個空中花園，鳥語花香，不過可惜嘅係，都冇嘢證明到佢實際係點樣樣嘅。以下落嚟講嘅呢一個世界奇觀就真係仍然存在嘅沙漠古城 - 佩特拉古城。
呢一個城係一個阿拉伯民族 - 納巴泰人起嘅，位於約旦南部海拔1000米嘅高山峽谷之中。要入去，就要經過一條1.5公里長嘅峽谷。就咁睇好似冇乜嘢咁，當你入到去，你就知咩嘢叫做「癲」。城裡便所有嘅建築喺岩石峭壁到鑿出嚟嘅。一入到去就會見到呢一座廟喇，但係睇吓，徒手開山劈石都可以做得咁工整，咁平滑，仲有呢啲浮雕都一樣做到好精細嘅。試諗下喇，我哋平時見到嘅冰雕都覺得巧奪天工㗎喇，更何況依加成座城咁雕埋出嚟，都唔知要動用到幾多出色嘅雕民先可以雕到出嚟。
咁都未夠癲喎，雕嘅時候佢仲考慮埋供水系統。除咗有流向每個區域嘅供水通道，仲有大大細細嘅儲水池，再利用埋山頭地勢改建通道，將啲雨水同埋泉水全部都引入嚟市中心，解決咗沙漠缺水嘅問題。所以呢一度亦曾經係一個繁榮嘅商業城市，無論係露天劇場、投宿嘅區域、定係花園，都一應俱全。另外，因為呢一度嘅岩石畀太陽一照就會發出紅色嘅光芒，所以佢亦都有一個朵，叫做「玫瑰之城」。

暴癲 - 秘魯馬丘比丘
好多人嘅人生必去清單都有馬爾代夫嘅，不過就嚟被掩沒㗎喇，想去就快啲去啦。同樣都係必去清單嘅，仲有馬丘比丘，佢喺山上面嘅，冇咁快被掩沒，可以慢慢去嘅。
馬丘比丘係印加帝國喺15世紀建造嘅，位於比秘魯東南部嘅山脈，海拔2430米，係當其時皇室渡假嘅場所，可以住到300~1000人。入便仲有分住宅同宗教區域，仲可以喺個山坡上面耕田添。
喂!碎料嚟咋喎?個城高啲啫，有咩咁巴閉啫?點解我哋要擺佢喺壓軸癲呢?因為你諗極都諗唔唔明點起出嚟啊。嗱頭先嗰啲都可以話鑿吓鑿吓，砌吓砌吓可以，畀啲心機，跟住個plan都可以做到出嚟。但係呢一個，大家研究一下喇。呢一度嘅建築就好似生出嚟，就係咁。喺個咁大舊天然岩石底下有間屋喎，仲要連埋一齊，佢哋完全冇用過任何嘅水泥，淨係靠啲石搭建而成，而且石同石之間嘅罅隙係精準到唔夠一毫米，成座山城就係咁樣起出嚟㗎喇，渾然「天城」。呢一個，就係天空之城「馬丘比丘」喇，呢一個字嘅意思係解古老嘅山巔，真係癲。
有好多人都懷疑佢係外星人整出嚟嘅，因為佢嘅建築之謎係冇人解到㗎。

首先，呢一座高山上便根本就唔能夠有咁多石畀佢起座城，啲石閒閒地都幾百KG，有啲仲以嚬嚟計添。唔通，要人手一舊一舊咁喺隔離山搬過嚟?
第二!我就唔信佢啲石天生就係咁鬼match，嗰陣時又冇咁先進嘅切割技術同埋儀器，到底佢係點樣加工啲石嘅呢?唔通要逐舊搵出嚟?砌俄羅斯方塊呀大佬?
第三!佢哋竟然精準咁樣將座城起喺兩個地殼板塊之間，當發生地震嘅時候，就可以減少震動。更加癲嘅係，佢哋呢啲冇章法嘅石牆，因為呢啲罅隙係有空間畀佢哋移動，就算震完都可以回復原狀，所以咁多年嚟都可以屹立不倒啊!
勾草

阿木:嗱關於世界奇觀呢，阿輝都有啲經歷嘅，不如同大家講吓?
阿輝:睇咗咁多世界奇觀呢，啫係我回想返過往以前有冇遇過啦。有一次係去巴塞隆拿旅行嘅，咁我就真係覺得親眼見過一個amazing嘅世界奇觀，我覺得係世界奇觀啦，就係聖家堂Sagrada Familia。起呢座嘢個人叫Gaudi，起咗好耐㗎啦，起咗百幾年，去到死呢，到而家都未起好嘅。

呢一個教堂呢佢唔係好一般嗰啲教堂。首先係嗰啲牆身嘅雕塑呢，你覺得佢好似係亂嚟㗎，真係「摙泥」呀，啫係啲泥呢就咁一嘢劈上去，岩岩巉巉咁，但又唔係㗎喎，啫係你睇真啲呢，佢係搓咗啲形出嚟㗎喎。
嗰個教堂你入到去呢，幾乎冇燈㗎，你係可以睇得清楚入便內籠嘅建築，因為呢佢有好多唔同顏色嘅玻璃窗，咁佢會因應日頭同下晝個陽光照入嚟呢，就會有唔同嘅顏色囉。與眾不同就係好複雜嘅線條同埋啲curve呀，係Gaudi所執著嘅一啲design嘅位嚟嘅。

跟住順帶一提嘅係，我又去咗一個叫Bunkers嘅一座山啦，咁其實嗰到就可以上到一個比較高嘅位，然之後你就可以一覽哂巴塞嘅景色。咁係好難忘嘅，因為你可以望住個太陽，日落，跟住啲樓又好矮，你就可以見哂成個城市，加埋呢嗰到就好多後生仔女嘅。咁所以，巴塞係一個好地方嚟嘅，又唔會落雨喎。

阿木:好難得阿輝有好正經嘅經歷啊，唔知大家對巴塞 - 頭先講嘅地方有冇啲咩嘢共鳴呢?今集，完，我哋下次再見。