🎤風靡全球的卡啦OK是如何被發明？香港何時興起唱K大時代？日本唱K要懂規矩？｜格物冷知識｜格物致知

一個禮拜之後，佢喺選拔測試入面表演打鼓，好流暢噉樣打哂成首歌，冇人覺得佢係唔識音樂。點解佢可以咁快上手？其實，佢真係唔識睇譜，佢只係靠死記硬背，記低每個拍子嘅打法，然後不停噉練習，練到滾瓜爛熟。順利入咗mus soc之後，佢玩音樂就更加「冇譜」嘞，依然係靠死記硬背。唔同嘅style佢都會涉獵埋，例如華爾滋 、探戈 、倫巴。畢業之後佢正式成為鼓水，佢哋隊band專門喺酒吧演奏音樂，有興趣嘅客人可以隨意點唱。呢個時候，佢已經記低咗200幾首歌。當時佢哋好受歡迎，日日都要出show，忙到佢哋下巴都出鬚。有時一日有幾場show佢哋都去唔哂，手就得一對，點樣可以賺哂啲show錢呢？

有一日，佢哋隊band一齊睇電視，電視機就播緊一首佢哋成日表演嘅歌，個結他手一嘢捉住井上一齊唱。就係呢一「捉」，井上靈機一觸，預先錄低啲音樂，再播出嚟，噉咪可以一齊唱囉？於是佢哋即刻喺studio錄哂經常演出嘅歌，造成一盒盒帶子，再請個工匠幫佢哋設計咗個箱，第一代元祖唱K神器就此誕生！呢個箱叫做「8 Juke」，佢內置speaker，連住枝咪，仲有個計時功能，只要入100日圓就可以唱5分鐘。嘩 ~ 以前你要唱歌，要就時間book隊band搵個場駁埋音響，搞一大輪先唱到，而家一個箱仔就幫你搞掂哂。

好似東亞銀行嘅BEA GOAL一樣，一個戶口，可以儲蓄、投資，仲可以消費賺回贈添！BEA GOAL係東亞銀行一個全數碼綜合戶口，只要download BEA Flash，幾分鐘就可以開戶，仲要冇最低結餘要求，全online，冇門檻，最啱後生仔。消費回贈係人都鍾意，後生仔咁鍾意吃喝玩樂就啱哂嘞！BEA GOAL信用卡有三大回贈：網上購物、娛樂消費、旅遊及本地交通。即係話，無論你去主題公園、唱K睇戲，甚至買機票、訂酒店，都有回贈！最高仲可以拎到18.4%嘅回贈！

唱K使費樣樣貴，當然要識得儲返啲錢啦！BEA GOAL戶口最少$1,000就可以做到定期、活期存款、賺取利息，甚至可以投資基金添！你冇聽錯呀！真係$,1000就得。仲會有定期理財貼士，幫你提早養成投資理財嘅好習慣。跟住呢個仲巴閉，除咗開戶即享高達$1,450迎新獎賞，只要輸入呢一個「格物」獨家優惠碼BlankinBlank，就可以額外拎多$300現金回贈，總之就有$1,750啦。開個戶口，賺嘅回贈都夠你唱幾次K呀！不過都要記得，借定唔借？還得到先好借！

講返呢個井上大佑嘅結局，點解佢最後一蚊都收唔到呢？佢份人實在係太chill，雖然「8 Juke」好快就好受歡迎，但係佢冇申請專利，而其他商家佬就即刻改良部機，仲急急腳申請埋專利。而呢一款唔需要真人伴奏嘅唱K機就風靡全國，當時成個日本一年就安裝咗47萬部，呢一行嘅營業額仲接近8,000億日圓。明明係自己發明，但係就畀咗人哋賺錢，井上有冇唔開心呢？冇呀，佢仲好chill噉幫人打工，做sales賣嗰部機。因為佢覺得如果自己係自己搞，呢壇嘢未必發展得咁輝煌，最緊要大家唱得開心。

順帶一提，「卡啦OK」呢個名都係佢諗㗎喎。日文「カラ」，即係「空」，意思即係冇人。而OK係日文Orchestra嘅發音縮寫，所以合併埋一齊就係「無人嘅演奏」。


「香港K史」

唱K，點可以唔提吓香港。由以前嘅歌廳 、夜總會到K房，橫跨7 、8 、90年代。當時唱K就係主流娛樂。跟住，我哋就會講吓呢幾十年嚟，唱K行業嘅一場鬥爭……

最先引入卡啦OK嘅，就係呢位人稱Apple姐嘅劉麗萍女士。佢本身係自己做廣告公司，80年代初期，佢第一次接觸到卡啦OK，覺得呢樣嘢好新穎，班香港人貪新鮮就一定鍾意，於是喺1986年就同人合作喺北角賣卡啦OK機。果然真係好受歡迎，連唱片公司嘅老闆都過嚟幫襯添。不過當時唱嚟唱去都係啲外國歌，好似差噉啲嘢。Apple姐就諗，如果可以唱到廣東話歌，一定可以更加大賣。於是，佢立志要推出香港第一隻廣東話嘅卡啦OK大碟。

不過都唔係咁簡單，因為有卡啦OK版本嘅歌，基本上都係嚟自日本。所以佢就由改編自日本嘅廣東歌著手，主動聯絡日本寶麗金，喺佢哋嘅playlist度逐首聽，聽吓邊一首歌曾經喺香港出過廣東話版。最後佢好辛苦噉揀咗28首。然後直接買哂呢啲歌嘅版權出卡啦OK碟，再自己人手上埋中文字幕。噉辛苦都係值得嘅，佢嘅生意越做越大，仲同本地唱片公司買更加多嘅版權，卡啦OK亦都越嚟越多人認識。不過Apple姐係唔會固步自封，佢覺得當時唱K來來去去都係喺歌廳 、Disco或者酒吧，日本一早已經有K房啦！仲搞得有聲有色。點解香港唔得呀？

1990年，Apple姐同日本K房龍頭「Big Echo」傾掂咗喺香港開分店，當時嘅「Big Echo」都真係幾逼，因為佢參考日本K場嘅模式，裡面淨係得二人房。簡單一個私人空間俾人盡情唱K，真係好受歡迎。一班唔願返屋企嘅人、返工想蛇王嘅人、喺條街唔知做咩好嘅人都會入嚟消磨時間。當時要排足4個鐘先入到去呀，誇張到…就係噉，啲分店越開越多，一變四 、四變十二，嚟到18間就春風得意 (改咗容祖兒首歌嘅詞) 。

係嘞，點解會無啦啦唱容祖兒呢？因為當時Big Echo已經係香港嘅龍頭K房，佢哋仲搞埋歌唱比賽，而容祖兒就係1995年嘅冠軍，亦都係Apple姐第一個力捧嘅新人。不過去到1998年，K房界其中一個競爭者「加州紅」使出一招「獨家試唱」，成為業界第一個轉捩點。當時年青人嘅偶像蘇永康嘅「越吻越傷心」唱到街知巷聞，加州紅用40萬買咗呢首歌返嚟做獨家試唱。年青人為求追星，亦都紛紛去哂加州紅唱K，大戰一觸即發…Apple姐帶頭同其他公司組成聯盟，同加州紅一較高下！鬥得最激烈嘅時代，就係Big Echo、Neway和加州紅三分天下。不過後來一場沙士殺到，成個行業都受到衝擊，去到而家就剩返Neway和Red.Mr。


「唱K冷知識」

嚟到依家，唱K已經係家常便飯嘅消遣活動，全球各地都有呢一種娛樂。以下落嚟，我哋就帶大家睇吓呢個世界有咩唱K得意嘢！

K歌之王

真正嘅K歌之王唔係黃宗澤，而係呢一個比賽嘅冠軍，嗱你贏咗我就話你係嘞。佢係2003年開始舉辦嘅Karaoke World Champion，係一個冇分國界，唔同國家嘅人都可以一齊參加嘅卡啦OK歌唱比賽。只要你年滿18歲，未簽過任何嘅唱片公司，就可以報名。呢個就係上年嘅冠軍，你有冇見過人喺K房拉咪拉到噉吖？佢完全唔似唱K，係好似開concert噉。贏咗呢個比賽，除咗有2,500歐羅同埋獎狀呢啲基本嘢，仲可以獲得線上唱K軟件「Singa」嘅一年會藉。不過最重要嘅係，如果俾啲頂級唱片公司睇中你，噉就可以發個明星夢嘞！

是有Cute K

比起香港，喺日本唱K真係過癮，你睇吓啲衫？幾cute幾可愛？全部都可以俾你任借，畀你襯翻個mood嚟唱歌。睇吓呢條波點裙，仲唔係用嚟唱徐小鳳嘅？如果你唔夠喉，仲可以借用佢哋嘅K Toy，即係拎啲道具樂器助興。除咗呢個咁cute嘅配置，佢哋嘅唱K系統仲有一個好Q專業嘅計分功能。每唱完一首歌，個系統會因應你嘅音準拍子俾個分數你，等你知道自己唱得有幾咁難聽。

不過呢啲都係其次，同日本人唱K係要懂規矩，你揀歌係要跟返當日嘅隊型。即係成班人慶功，你突然間整首「半斤八兩」；或者個friend失戀，你突然間整首Mr.嘅「小傳奇」，噉就真係攞哂景嘞…佢唔「小」你就真係傳奇…

美國好K區

喺美國，每年4月嘅第4個禮拜，係National Karaoke Week。呢段時間，全美國都會變成一片K區，因為佢哋會唱足一個禮拜K。House party又有 、戶外event又有，連電視台都會應吓節唱返兩嘴。同樣，喺美國都有一個健力士世界紀錄，就係2009年田納西州最大型嘅K party，有16萬人喺賽車場一齊唱咗首《Friends in Low Places》。段片就搵唔到嘞，但個賽車場就可以畀大家感受吓個氣氛。

K Pop

唱K喺韓國都好受歡迎，佢哋嘅karaoke叫做「노래방」，即係練歌房，可想而知佢哋對唱歌係好有要求。其中一個特別嘅地方就係佢哋有好多路邊K房，好似電話亭噉。點解會興起呢啲「毒」家試唱呢？事源90年代日本卡啦OK引入韓國，大受韓國白領歡迎。不過呢啲K房鬼咁暗，成日都會有性騷擾事件嘅發生，大大影響咗K房嘅生意，所以班商家就直接將K房搬去街邊，等啲人可以安心唱K，自己一個唱幾首歌過吓口癮又得，一班人玩一陣又得，所以韓國就出現過好多呢啲街頭K房。

唱得好久

你睇吓呢對男女，幾久！講緊係好「耐」。佢哋打破咗健力士世界紀錄最長嘅唱K合唱，足足唱咗35個鐘，即係等如連續唱175次古巨基嘅「勁歌金曲」。其中呢個係一個教堂嘅籌款活動，本身諗住唱足48個鐘，可以酬多啲錢，但真係頂唔順…點樣唱呀？！再唱真係勁「甘」 歌曲……至於單人唱K最長紀錄，就係意大利嘅Leonardo Polverelli，佢嘅紀錄係101個鐘59分15秒，即係佢要連續唱481.8首古巨基同容祖兒嘅「狂串樂基兒」，仲要一個人做哂男女聲，先唱到咁耐。而佢嘅目的都係為咗籌款資助一個醫學機構Telethon。唱K籌款…有得諗，有冇興趣勾草唱K？幫補吓…我哋冇乜錢…(笑)要唱，緊係去K房唱啦！可以順便用埋BEA GOAL賺取回贈，我入個「格物」code申請先！


勾草

關於唱K，阿輝有啲經歷，不如你同大家講吓。

阿輝：嗰次係一個生日K，生日嗰個人好有錢，成身名牌，Gucci、LV嗰啲。玩到好盡興，嘈喧巴閉。去到尾聲，就要埋單啦，噉有錢嗰個friend就當然好高興噉話「喂我嚟我嚟！」，佢拎起自己個銀包，就話「嘩~~~ 搞甚麼傢伙」。原來佢成晚擺咗銀包喺枱，跟住佢啲friend就當咗係煙灰缸係噉捽，跟住個銀包啲皮係爛哂 (笑)，燒咗成晚。自此之後佢就冇再用黑乙色銀包嘞。


講起唱K，唔知大家仲有冇其他經歷？歡迎喺下面留言話畀我哋知。