Apple WWDC沒有話你知的事Vision Pro出年殺入VR市場、Meta Quest 3 秋季開賣、無鏡頭AI相機、WF-1000XM5規格曝光｜廣東話【Price Weekly #170 】

首先新嘅15吋Macbook Air其實除咗Size大啲之外，新機仲多咗2個喇叭，數量上同14吋、16吋嘅Macbook Pro 睇齊，一樣有六個喇叭，相信用嚟睇戲個陣效果都會好啲。另外，無論邊一個版本跟機送嘅火牛，都係有雙個USB-C Port，總輸出去到 35W 呢款，而呢舊嘢原本係要加$150蚊先有嘅。

跟住到新Mac Pro，雖然有 6 條PCIe 4.0 插槽，但唔好以為咁可以用到AMD或者Nvidia嘅顯示卡，因為MacOS沒有對應嘅Driver，而最大可能性就係Mac Pro只可以裝啲唔洗Driver嘅Sound Card、Network卡或者SSD擴充卡。另外，雖然Apple官網無寫，但睇圖部機似乎仲有兩個SATA槽可以用嚟駁Hard Disk。

最後就係Vision Pro，呢部嘢有幾驚豔我諗係度都唔洗多講喇，唔少試戴過部機嘅Youtuber都大讚佢嘅顯示效果同操作流暢度，不過對於大家都比較關注嘅都係電量嘅問題，而Apple由頭到尾都無點提過。雖然唔少人都覺得外置電呢個方案係無選擇中嘅選擇，但睇返Apple嘅宣傳片，呢舊電似乎係要帶住係身，無得扣上去個頭盔到嘅，亦即係話你用緊個陣下下都有條線跟住，而呢個設計可以話係同同類Product都好唔同，但呢點會唔會好影響使用效果呢就真係要等到佢出咗先知。

《支援彩色透視功能，Meta Quest 3秋季開賣》
除咗Apple嘅Vision Pro之外，Meta 最近亦食住個勢出咗條宣傳片，介紹下佢哋今年秋季會出嘅Quest 3，可以見到新機喺外型上都有唔少改動架，好似正面就多咗3組鏡頭，而機身亦做得比之前更薄，咁戴落應該都會更加舒服。至於處理器方面，Quest 3會採用Qualcomm下一代嘅Chip，咁官方就話GPU性能會有兩倍嘅提升。另外，同之前嘅傳聞一樣，新機會具備彩色透視功能，所以用家戴著頭盔都可以好好咁睇到出面嘅環境。而手掣嘅部分亦都有也重新設計，並且加入咗TruTouch觸覺回饋功能，同Quest Pro睇齊。Quest 3預計會喺今年秋季發布，售價係US$499 起。而從6月4號開始，128GB嘅Quest 2亦都會減價去US$299。

《SONY 旗艦真無線耳機月內推出? WF-1000XM5規格曝光》
SONY旗艦級真無線耳機WF-1000XM4已經推出兩年，近排就有消息指下一代即將面世。網站The Walkman Blog刊登咗一張聲稱來自Amazon嘅耳機比較圖，可以見到最右手邊嘅正係傳聞中嘅WF-1000XM5，如果將佢同WF-1000XM4放埋一齊對比，可以見到耳機本體明顯細隻咗，重量都由呢一代嘅7.3克減至5.9克，而耳機續航力連埋充電盒可達24小時，充電3分鐘就可以用一個鐘頭，同時亦支援 Qi 標準無線充電。

《相片現奇怪「香蕉模糊」 Galaxy S23 S23+鏡頭出事》
三星Galaxy S23同S23+算係市面上熱門嘅旗艦機，不過近日喺波蘭官網上面就有用家話佢地嘅S23同S23+用主鏡頭影相果陣相片有奇怪嘅模糊，形狀似一條香蕉，因而被稱為「Banana Blur」。我地用手頭上嘅 S23 做同樣測試，結果發現相片入面某啲位確實濛濛地，將濛咗嘅位置圈起睇落都確實幾似香蕉。三星早前就終於承認呢個問題，話係因為主鏡頭嘅大光圈所致，並承諾會盡快提供軟件更新修復呢個情況。現階段建議用戶唔好影得咁close up，又或者打直手機嚟影相，盡量避免打橫或者打斜咁嚟影。

《打破Seagate壟斷局 WD推出Xbox專用擴充卡》
Xbox 玩家如果想裝SSD加大部機嘅儲存空間，嚟緊好快就會有多個選擇，唔洗再硬食Seagate嗰張擴充卡喇。事關 WD最近出咗張Xbox 專用嘅擴充卡WD_BLACK C50，500GB同1TB分別賣US$79同US$149，而且再送多一個月 Xbox Game Pass Ultimate。睇返Price嘅報價，呢張卡個價比起Seagate嗰張抵玩好多，如果嚟到香港都係賣一千蚊出頭嘅話相信都有一定嘅吸引力。

《受晶片短缺影響 日本SUICA/PASMO卡停售》
自從通翻關，有唔少朋友都即刻飛去日本旅行，不過以往用開嘅「日本版八達通」Suica西瓜卡同PASMO近日就宣布因為晶片短缺而停售，所以由宜家開始大家去日本就無得再買。不過嚟緊打算去日本嘅朋友又唔使太擔心，因為仍可選擇專為旅客而設，得28日有效期嘅Welcome Suica或者PASMO Passport卡。除咗實體卡之外，大家仲可以直接係Apple Wallet中新增Suica或者PASMO，直接用Apple Pay增值。不過要留意Visa卡唔能夠用嚟增值，目前只支援Mastercard同JCB。

《支援多人合作+網上對戰 新一代他媽哥池大玩元宇宙》
Bandai新一代嘅他媽哥池Uni趕上元宇宙概念，佢內置Wi-Fi功能，用家可以喺專用元宇宙「Tamaverse」嘅入口同世界各地嘅他媽哥池見面互相交流，而元宇宙入面競技場更會舉行各種期間限定活動，他媽哥池可以合作或者對戰添。新機將會喺7月中開賣，定價係8250日圓，唔知你地又有無興趣呢？

《無鏡頭 無CMOS都影到相? AI相機Paragraphica》
我諗大家對相機嘅構造都唔陌生，但你又有無諗過未來嘅相機可以演變成點呢?呢部無鏡頭、無CMOS、無任何光學元件嘅相機其實係最近外國一位藝術家嘅作品，喺撳快門果一刻相機會紀錄低攝影師當下嘅位置、時間、天氣、周圍環境等等嘅資訊，然後利用AI生成一段文字出嚟，配合埋text-to-image功能，一張相同實景差唔多嘅相就咁影咗出嚟喇。講到呢度，可能你會覺得呢部相機只不過係一個AI圖片生成工具，根本唔算係影緊相。但其實諗真啲，依家手機攝影做緊嘅嘢，唔係同呢部相機差唔多?因為大家影出嚟嘅相都經過一套演算法或者AI處理，令到你影出嚟嘅嘢比起你現實睇到嘅嘢更Sharp更靚，就好似一個光點都可以變成月亮咁，所以相比起佢算唔算係一部「相機」，我諗，究竟咩先係真正嘅攝影，攝影嘅意義又係咩呢？先係呢位藝術家想大家思考嘅問題。