香港已消失的職業【上集】，人人因為省錢而出現的工作機會？｜格物冷知識｜格物致知

我哋而家啲用過嘅舊嘢，唔想扔就去擺上網買，其實喺以前有間實體店係專門收集你啲舊嘢嘅，嗰間嘢就叫做故衣舖，衫褲鞋襪、舊電器、珠寶首飾都可以攞去呢度抵押換錢嘅，限期之內就可以贖返，但係過咗期呢故衣舖就會將呢啲貨物轉售。咁點解叫故衣舖嘅呢？因為嗰個年代經濟唔好，咩嘢都要慳，所以個個入嚟就係為咗執平衫，好似美之咁，尤其係西裝。二三十年代著老西就係上流人士嘅象徵，但係整一套西裝差唔多就係等於打工仔兩三個月嘅人工，但係故衣舖買嘅二手西裝只係需要正價嘅三分一就買到啦，所以就有好多人入嚟搵靚西裝。故衣舖最輝煌嘅時期集中喺皇后大道西，同埋上海街，總共有成八九十間咁多。而去到八十年代經濟起飛，啲日常物件都唔需要當嚟當去咁慳㗎啦，所以故衣舖就慢慢消失啦。

梳頭婆，而家一個女仔出街之前最緊要係做咩？做返個Treatment先？Set返個靚頭再化個靚妝搞搞到成兩粒鐘呀，但係比著以前你係唔使搞咁多嘢嘅，直接素顏行出街口就會有個婆幫你扮靚，呢個職業就叫做梳頭婆啦。佢哋通常都係街邊擺檔，簡單有凳、有鏡咁就開波㗎啦，佢哋可以幫你Tailor make一個髮型，鬢辮、紮髻、All back，乜頭都得。大家估下佢嗰陣時用咩嚟Gel頭嘅？就係用阿木！呢一塊叫做刨花，係嚟自松樹或者柏樹刨出嚟嘅樹皮，因為本身油脂高呀，所以浸水之後梳上頭就可以有固定嘅功能啦。手勢好嘅梳頭婆，仲會比啲有錢人請佢返屋企幫佢哋Set頭化妝，仲會有一個特別嘅服務，就係玩佢哋塊面，講緊嘅就係呢種叫做玩面或者線面嘅傳統美容護理法。首先喺塊面度搽啲海棠粉，佢係一種以前嘅清潔用品嚟嘅，搽上面就可以令啲毛毛明顯啲，然之後就會用條麻線清除面上面嘅雜毛啦。

染布佬，而家啲衫甩咗色，你點會話拎去補色㗎！？你個頭甩色你就會補！（呢啲靚仔染到頭鬼五馬六...）但係原來以前染衫係好興㗎喎，舊時香港好多嘢都係慳得就慳，補得就補㗎啦，所以亦都出現呢一種染布佬，專門上門幫人染布。佢啲工具係好簡單嘅啫一個火爐仔，火水鐵罐同埋幾種基本嘅顏料，入屋開壇咁就嚟得啦。當時最耐染嘅色就係藍色，甩咗色再補返隻藍色，而嗰隻藍色就會越補越深，最後就會變成近乎黑色嘅藍，就係叫做青啦，所謂嘅青出於藍勝於藍就係咁解啦。

擦鞋仔，而家獨留兒童喺屋企係犯法嘅，以前直頭叫個靚仔出去做嘢添，無計啦！五十年代香港咩有咁好景呀，啲靚仔細細個要出嚟幫補家計㗎啦，所以當時就有好多童工嘅。而最多嘅就係呢啲擦鞋仔啦，當時幫襯得最多嘅除咗班貪靚嘅西裝友之外，仲有一班美國水手，班鬼佬出手係好濶卓嘅，所以班細路就諗到一招暗黑兵法逼佢哋幫襯。佢哋會三五成群嚟個裏應外合，先係幾個友打頭陣，一見到班水手行過，佢哋喺對皮鞋到HIT AND RUN，追唔返、無仇報，呢個時候主力部隊就會出現喺班水手面前，膊頭搭住塊布，拎住啲鞋油笑口誓誓咁樣對住佢哋。班水手就心諗「對鞋污糟咗，返到去實俾阿頭屌嘅！」於是迫於無奈就去幫襯呢班擦鞋仔啦，有啲狼啲嘅仲會坐地起價添，問你死未！

而家各位屋企一櫃都係鞋㗎啦，話之你有兩對腳呀，一個禮拜輪住著都唔會重複，有啲仲要買嚟收藏添。睇返香港開埠初期嗰陣時啲小孩子係無鞋子㗎，因為嗰陣時窮到燶啦嘛，鞋都買唔起呀，而第一代興嘅鞋係咩呢？就係呢款木屐啦，佢最受客家人歡迎，因為喺佢哋嘅傳統習俗當中，新娘係要有兩對紅色嘅木屐做嫁妝先至吉利嘅，所以當時就出現木屐師傅呢個行業啦。你睇下呢幅相，全部都係人手由一塊木打造而成，後來鞋面嘅設計仲越嚟越多花紋，同埋圖案添。不過去到60年代，膠鞋出現，著起上嚟又輕便又舒服，木屐就慢慢被淘汰啦。

90後呢就好興夾糖嘅，出親街都會去夾㗎啦，但係50年代你只需要安坐家中，就會有零食飛入嚟㗎啦。呢一款曉飛天嘅零食叫做飛機欖，佢本身係叫做甘草欖，用鹽同甘草等等嘅藥材醃製而成。有啲欖仲會加上丁香、肉桂等等，酸中帶甜，仲有止咳、潤喉嘅功效。當時一斤飛機欖，就成為六仙，飛機欖嘅買賣模式係好國際嘅，個小販就會喺條街度叫賣，樓上嗰班街坊邊個想要嘅呢，就行出窗口或者走廊，個小販就會一嘢掟上去，個街坊就會即刻接、攬住，再將啲錢拋返落去俾個小販，每次都咁精準嘅，真係可以去打NBA呀！而當時最具代表嘅人物就係飛機欖之父郭鑒基先生喇，佢去到千禧年代都仲做緊生意嘅，仲有一首原創歌曲用嚟推銷佢嘅欖，不過佢喺2013年已經過咗身啦，呢種飛機欖嘅買賣亦都開始消失啦。（梗啦，而家周街掟嘢會俾人當做...）

火水佬，而家喺屋企煮飯一係就煤氣爐，一係就電磁爐，一係就石油氣爐，再咪就麥當勞，有幾多見人用火水爐嘅，梗係冇啦！呢種係以前嘅產物嚟㗎嘛，嗱就係咁㗎啦，通常係綠色或者藍色為主，喺個底度倒啲火水落去，再點著條心引返個火上去，咁就可以煮嘢食㗎啦。喺以前嘅年代家庭環境有返咁上下先至會用火水爐嘅啫，所以當時嘅雜貨舖就有一個賺錢法寶，整咗添火水佬，個個都係大隻佬 幫你refill火水爐，個個師奶都讚好。

補鑊，通常賴咗嘢出事啦，你就會去補鑊㗎啦。呢一個term其實係嚟自以前一個職業嘅，就係補鑊師。以前嘅年代點會成日出街食飯啦，家家戶戶都係自己煮下啲撚手小菜咁樣啦，以前通常都係用柴火煮食嘅，成日咁猛火，除咗啲嘢食會燶之外，個鑊都會穿窿嘅，咁就煮唔到嘢食啦，餓親啲仔啦，個老公又會鬧啦，咁就大鑊啦！大鑊就要補鑊㗎啦，補鑊就要補鑊師㗎啦。補鑊師就要嚟補鑊㗎啦，不過佢補鑊唔係用公仔麵嘅，如果個鑊裂咗少少，佢就會煮溶啲鐵粉，等啲鐵水滲入個裂縫，再攤凍 咁就搞掂㗎啦，萬一穿咗個大菇窿，咁就會直接溶一塊生鐵落去，冚住個窿再打返平。不過而家壞咗嘅嘢，都好難修補㗎啦，就好似啲關係咁...

箍煲，分手邊緣嘅人士會盡力挽回佢哋嘅關係，呢個行為就叫做箍煲啦，呢個又係一個職業嚟㗎，舊時香港生活艱難，大家都會物盡其用想盡辦法延續日常物品嘅使用壽命，慳得慳吖嘛，尤其係瓦煲，呢種物料好容易撞爛嘅，所以箍煲佬，就係專幫人用鐵線，箍住個瓦煲，做一層防護，咁就可以耐用啲啦，所以話呢感情嘅嘢，出現咗裂縫先至去修補就太遲㗎啦。

收買佬，大家小學嗰陣時有冇玩過一隻Party Game呢叫做收買佬呀？呢個本身又係一個職業嚟㗎，但又關食乜嘢事呢？收買佬係由唔同嘅途徑收集各種嘅物件，然後清潔、整理同埋分類再轉售出去嘅。而早期嘅收買佬多數都係採用以物易物嘅方法，佢哋會抬住啲物件出街大叫「換麥芽糖啦喂！換花生啦喂！」係啦佢哋就係換食物㗎啦，你肚餓會買嘢食啦，而佢哋就會換嘢食。後嚟因為工業開始發達，收買佬就主要低價收集街坊嘅爛銅爛鐵或者報紙雜誌，再轉售俾啲工廠啦。

由以上已經消失咗嘅職業，其實都睇到舊陣時嘅街坊係點樣慳住咁過日子嘅，一係就重用，一係就修補，從來都唔會浪費。咁佢哋住同行方面又點樣慳嘅呢？下一集住行篇仲有幾款你意想不到嘅職業，想知咪睇下囉！關於職業呢阿輝都有啲經歷嘅，不如同大家講下呢，唔單止係我嘅經歷，係大家嘅經歷。十年前，你行出旺角西洋菜南街，當你經過銀行中心行出個十字路口，行下呢就會突然間有人大叫，就係旺角咖喱阿叔，佢成日都拎住支旗dump地就會嚇鳩啲途人嘅。就係咁「旺角咖喱，好好味呀！」佢嚇親啲途人呢，佢會好開心，但係依家呢樣已經消失咗，聽講佢發咗達，可惜呀！上次我哋出去做街訪，我都攞住塊牌，早知學佢「好睇格物！好睇Channel！」咁就發咗，係！試一試！唔知大家仲有冇見過啲消失咗嘅職業（係旺角嗰啲）講聲囉！Bye！今集完，支持我哋嘅創作嘅話記得Comment、Like、Share同埋Subscribe我哋啦，我哋下集再見！