注意看！這套電影實在太狠了！深藏絕密訊息！華語影史上最有哲理性嘅科幻災難電影——《全城風暴》【𠝹櫈電影學會】

電影《全城風暴》將科幻與災難合二為一，全片多處鏡頭涉及特效製作均由國內專業特效團隊反復細心打磨完成。在硬核科技營造的逼真氛圍中，冰雹、颱風、雷暴、樓宇坍塌……給人以視覺上的震撼，令觀眾彷彿直抵災難現場，感受失落、徬徨、恐懼，也體悟著感動與希望。視覺之外，電影中的寓意也不禁讓人深思。隨著全球人類科技水平的不斷提高，對自然的過度利用及為私利的掠奪性開發,無不威脅著正常的生態環境。總有一天，大自然會將人類對它的所作所為全數奉還給人類。

最後亦都有一句：

一場史無前例又極端殘酷的城市浩劫一觸即發，災難面前人性能否經受住考驗？人類又將如何求得一線生機？

聽完之後都覺得好刺激，再加上我想像緊獎門人喺唔同嘅災難場口之中落力演出，成件事吸引到非常，結果我睇完之後，我由衷地覺得呢套災難片係我睇過最出色嘅災難片。因為呢套戲上上下下由頭到尾由裡到外都可以用災難嚟形容，基本上我無見過任何一套電影可以災難得咁交關，所以算得上係貨真價實嘅災難片。咁究竟呢套《全城風暴》有幾災難呢？為免浪費大家時間，不如我哋就嚟同大家做個劇情簡介先。

故事講述由獎門人所飾演嘅老豆係一位退役消防員，喺 N 年前嘅一場火燭入面救唔到個老婆，就令到佢頭家變咗單親家庭。不過由於獎門人好中意見義勇為，令到阿仔同阿女好不滿，結果就成日家嘈屋閉，阿仔同阿女都各自搬咗出去住。之後阿仔就成為咗一間唔知乜嘢科技公司嘅總監，而阿女亦都喺一間唔知乜嘢科技公司入面做白領。總之有一日呢個城市就發生咗好多災難，然後阿仔做嗰間公司嘅負責人天氣之子就用啲乜春科技控制啲災難嚟當電用，點知就控制唔到，結果激發咗更加多嘅災難。先嚟就係地震，阿女就喺公司活埋咗，但之後就畀獎門人救返，然後喺去揾阿仔途中又有閃電/而阿仔嗰邊就擊暈咗天氣之子準備喺個公司玩自爆，點知天氣之子就唔畀，結果爭鬥一番之後，老豆就掉咗天氣之子落街，最後自已都掉埋落街，成個故事就係咁完咗喇。

我相信聽到我講到嚟呢度嘅朋友應該都一頭霧水，心諗米迦你究竟噏緊乜嘢。唔好意思，呢套戲係真係咁嘅劇情，我總結到一個劇情簡介出嚟經已好厲害，可以話係我寫過最難寫嘅劇情簡介。咁點解咁難寫呢？就係因為呢套戲入面啲劇情根本完全唔 Make Sense，亂到七彩。我哋從呢套戲嘅一開始講起大家就會明白。

喺故事一開始，你會見到一開始係講有個成三十米高嘅海嘯迎面而來，然後將啲嘢沖爛晒。咁正常人梗係會諗個故仔係咪同海嘯有關，結果係無啊！成套嘢之後完全無提過同海嘯有關嘅嘢，就好似峻爺嘅初戀咁完全無出現過。咁都算喇。咁喺入咗電影標題之後，我哋會見到時間寫住 9 月 2 日 6:30 嘅舊城區。咪住，等陣先，我記得之前嗰一幕寫嘅係 9 月 1 日 22:30，係廿四小時制嚟喎，咁姐係話呢度嘅 6:30 係講緊朝早六點半？吓？ 6:30 成街都係人？連高空升降車都已經開始咗佢嘅工作？點解晨早流流朝早六點就會有咁多人喺條街度嘅呢？莫非大陸人咁鬼早就開始一日嘅工作？係咪已經由 996 進化到 247？正當喺我思考呢件事之際，電影裡頭就發生爆炸，有個𡃁仔就被炸咗出嚟。無錯，你無聽錯，有個𡃁仔就被炸咗出嚟，然後佢就以懸垂嘅方式吊咗喺大廈外牆上面。先唔講點解發生咁嘅爆炸都炸唔死個𡃁仔，亦都唔理點解個𡃁仔可以炸飛出嚟炸到重可以揸住外牆邊緣，我最想知嘅就係點解呢個𡃁仔有咁勁嘅體能，可以懸垂喺外牆咁耐。之前我睇 Netflix 嘅《體能之顛》，入面都有一個比試係玩啲類似嘅嘢，你睇吓啲大隻佬幾咁辛苦，然後我哋又望吓個𡃁仔，雖然唔明點解佢阿媽要喺下面喺度叫，係咪想分散個仔嘅注意力，但係個仔當然係 Handle 得到，重識擰轉頭望佢老母添，好大機會係謝天華托世。

見到個𡃁仔咁危險，之後當然就係到電影嘅主角獎門人登場喇（Super）。呢個位我哋可以見到電影嘅魔力，你會見到好一個獎門人，成七十歲人都重可以爬水管上去救人，個人爬爬吓重逆生長咁高咗幾吋添。而最好笑嘅係，個𡃁仔到最後都係堅持唔住，跌緊落去。但你望吓呢個過程，明明個𡃁仔都跌咗落去咁滯，重要離獎門人一隻手仔嘅距離，而且跌嗰陣經已跌到獎門人嘅腳邊，但獎門人依然都可以喺佢膊頭位置捉住個𡃁仔，只能講一句獎門人果然係寶刀未老。（Super）

不過喺呢個時候，唔知係咪因為獎門人太逆天而行，救返嗰個上天想隊冧嘅𡃁仔，一舊無啦啦好似整到天煞地球反擊戰咁嘅雲，追住個𡃁仔同棟大廈嚟劈。無錯你無睇錯，係真係好似整估專家入面嘅古晶咁，真係追住嚟劈。我唔知係因為個𡃁仔好不孝定係棟大廈好不孝，定係獎門人好似一碌粗壯嘅避雷針咁，啲雷係真係追住嚟劈，重劈爛埋條水管。不過喺危急關頭之際，獎門人就想將𡃁仔揈過去個升降台上面。無錯，你無聽錯，好一個獎門人，居然想凌空將一個 30 公斤嘅𡃁仔就咁揈過去五米開外嘅升降台上面，咁危急都重準過 DAngello Russell，簡直係好似關鍵先生咁，我建議湖人下季可以考慮吓叫獎門人加盟，喺今季西岸決賽亂射都入嘅金塊孖寶面前表現咩叫亂掉都中。然後獎門人就諗唔唔諗跳埋過去個升降台度。結果獎門人就坐住升降台降落地面，成功救出𡃁仔（Super）。

睇到呢度，係咪已經感受到呢套戲有幾厲害呢？去到呢度套戲都只係過咗七分鐘咋。係七分鐘咋！套戲重有成八十幾分鐘啊，問你死未。

然後下一個鏡頭就寫住 08: 30，媽啊原來頭先真係朝早六點半嚟㗎。然後我哋偉大嘅獎門人，晨早流流六點半出去救人，八點半返到屋企就開始飲酒，又回憶吓佢同佢老婆熊黛林嘅故事。然後阿仔就出場，晨早流流八點半就話同老豆飲酒，佢重要揸車嚟，咁係咪姐係代表佢陣間會醉酒駕駛？乜呢啲咁意識不良嘅諗法喺我哋偉大嘅中華人民共和國度可以上嘅咩？

不過呢個都唔誇張，接住落嚟嘅嘢重誇張。佢個仔攞出咗一份報紙，上面寫住佢獎門人嘅救人事蹟。發生咗兩個鐘嘅嘢，點解報紙咁快就出得到嘅？而且喺呢度就已經講到明有超強颱風，但係又唔見佢講吓尋晚連燈塔都打爆嘅海嘯，都唔知做乜春。

不過好快劇情就去到天有異象，跟手就見到個超強颱風。大佬，你唔好水我喎，呢個擺明係龍捲風嚟㗎喎，超強颱風郁啲個風眼都幾百公里，個風會咁細個？例如之前嘅超強颱風「山竹」，直徑達到 900 公里，當個風係圓形，計落都至少 2800 平方公里，香港整體面積都係得 1114 平方公里，人嘅肉眼真係有可能會見到個颱風？大風到連人都吹飛，但係獎門人兩父子居然依然屹立不倒，實在太犀利。然後個風連玻璃都吹爛咁大風，獎門人父子居然係攞張檯去頂住啲風，雖然我唔知道點解要揾啲檯去頂住啲風，但為咗救人，獎門人父子又衝咗出去。最勁嘅係，個風大到連招牌都吹到飛嚟飛去，連貨櫃都吹到變成紙包飲品盒咁，獎門人父子依然都可以健步如飛穩步向前。雖然我唔知點解佢哋硬係唔向兩邊跑，但係啲風吹到去佢哋面前嗰陣，又突然之間無風，一天都光晒。

睇到呢度，我心諗其實呢套係咪講獎門人係 X-Men 之類。不過從獎門人父子嘅對話入面，我哋睇到獎門人對填海深惡痛絕，直斥填海係破壞環境，可謂係金石良言。獎門人好嘢。（Super）

之後下一個場景，獎門人似乎就返咗屋企又換咗套衫，拎咗盒嘢，就揸車去見個女。一上車，獎門人就二話不說，從儀錶板上面拎起一個相架，上面有一幅全家幅。呢個位再加埋喺 Artlist 是但揾都揾到嘅配樂，真係令人十分感動，令到我都不禁嗚嗚嗚咁喊出咗嚟，不過我想問嘅係，究竟有邊個人會將一個相架放喺儀錶板，咁咪遮住咗儀錶板？唔使睇咪錶嘅？

最重要嘅係，佢唔係將個相架放返喺個儀錶板度，而係好習慣性咁隨手就掉咗去個副駕駛座度，咁問題就嚟喇，究竟邊個放個相架喺個儀錶板度嘅呢？唔通獎門人喺落車嗰陣又會再睇吓個相架，然後放返喺儀錶板度？如果個相架唔係慣常咁放喺儀錶板度，點解一開始又要放喺儀錶板度呢？

不過唔緊要啦，對於獎門人嚟講，由六點半起身到而家，已經救咗兩次人，換咗三次衫，但都依然處變不驚，所以去到之後地震嗰陣，獎門人唔知係咪有咩 X-men 超能力，佢好似預知到有嘢唔妥就落咗車，然後就一碌電燈柱跌咗落嚟，好一個獎門人又向後飛身一撻，又避開咗嚟自電燈柱嘅攻擊，起身嗰陣就見到四周圍啲大廈好似豆腐渣咁樣震兩嘢就又爆炸又冧又剩。結果獎門人又要去救個女，準備喺六個鐘入面救第三次人，獎門人直接衝向阿女公司，成幢大廈喺佢面頭倒屎咁跌啲石屎落嚟，好一個獎門人，不但止毫髮無傷，重依然處變不驚，而阿女嗰邊，佢架車就畀瓦礫壓住咗。雖然我唔知道獎門人點解會認為喺度就咁叫個女個名，個女係會聽到，但阿女嗰邊就只有男朋友走得到，阿女就卡住咗喺架車度。

然後個女一開始重因為嬲緊而唔想打畀獎門人。大佬啊你都已經畀瓦礫活埋咗，點解你重會有心情發脾氣呢？但一感覺到啲瓦礫又壓咁啲落嚟，佢又突然好堅決咁打電話畀獎門人。都唔知做乜。另一邊廂重好笑，阿仔同天氣之子反咗面，天氣之子就叫人掉咗阿仔入雜物房，本身聽落都無乜問題，問題就係點解門口嗰兩條西裝佬門都唔鎖吓係咩意思？姐係咁，嗰間係雜物房，正常嚟講根據房間嘅設計，應該係喺入面鎖門，姐係話其實只會係阿仔鎖住佢哋唔畀佢哋入嚟，你喺出面其實係鎖唔到門，除非你夾硬加多個鎖啦，但好明顯我哋見唔到有，咁姐係話大佬其實你係可以自己開門出嚟，點解要喺度扮畀人鎖住啊？都算，之後阿仔用雜物房嘅嘢整炸彈炸開道門先好笑。因為佢發現整完之後佢無火機喺身。你話笑死唔笑死？你居然整咗咁耐先記得自己係要火？無諗過自己點樣整啲火出嚟之餘，重要整晒成套嘢先發現無火？咁點解你唔直接開門呢？然後重好笑，佢個徒弟走咗過嚟諗住𥄫吓阿仔咩情況，結果就將畀天氣之子掉咗嘅電話同埋火機畀咗佢。喂大佬你喺出面不如幫佢開咗道門重好啦下話。你畀返個電話佢，係人都知有人拎畀佢㗎啦，到時後又咪會懷疑你？而更好笑嘅係，阿仔居然係炸個通風口，唔係炸道門。大佬，道門咁雞，你一炸就爛就出到去啦，你炸個通風口做乜春呢？貪涼爽啲？結果出到去又係喺道門度出返嚟，咁不如一開始就炸道門啦大佬。

鏡頭又換返去掌門人嗰邊，佢就咁喺停車場行入去就見到個女，個地震真係好人，連路都搭埋畀掌門人。咁當然阿女都重係卡住咗喺架車度，然後好一個獎門人，居然係諗住徒手去抬高壓住架車嘅瓦礫。我想知係對自己嘅力量要幾有信心先會覺得第一時間係會徒手去抬高啲瓦礫？不過到最後當然就唔 Work 啦，結果動用咗機械嚟拉瓦礫，而瓦礫亦都好合作咁等阿女走咗出嚟先冧，成件事配合得天衣無縫，你話無排過都唔信啦。之後兩父女上咗車，然後上咗條大橋，架車一路行，條橋又一路冧，然後一嘢飛越黃河就過咗橋。可能大家會覺得呢個位好誇張，但信我，呢個位經已好合理。

之後又有極端天氣喇，今次係咩呢？今次又係雷暴警告啊！啲雷又追住人嚟劈，而最好笑係啲雷劈中咗架車，居然係無炸爛架車，只係打穿咗塊擋風玻璃？係雷定激光啊大佬？切口咁完整？不過我都幾肯定呢度有幾多人都幾不孝，如果唔係真係解釋唔到點解啲雷係追住人嚟劈。而為咗解救啲不肖子孫，我哋嘅獎門人又出動，今次係佢自 6 點半晨運完後第四次救人。好一個獎門人，一手就拎起咗一把太陽傘，用衝鋒嘅姿勢，將太陽傘掉上半空，然後太陽傘就引雷爆炸。雖然我唔明白獎門人呢個行為係有咩意義，但啲雷可能真係因為驚咗獎門人太陽傘衝鋒，所以亦都立即收皮，又係合拍到好似排好咗咁，唔講真係以為獎門人係雷公嚟，可以控制雷電，你見獎門人個身型成個雷公鑿
你就知佢有潛力啦。然後獎門人就帶住個女同佢條仔一齊出發去救阿仔。

結果無幾耐之後就炒咗車，獎門人同阿女一個就畀路牌壓住個身，一個就畀電單車壓住...啲頭髮！係啊你無聽錯，阿女係畀電單車壓住咗啲頭髮。雖然我唔知電單車可以點樣壓住咗啲頭髮，但結果阿女表演車禍現場斷髮，然後又衝過去抬高個路牌。好明顯喺呢度我哋會見到，阿女盡得獎門人真傳，可以一嘢抬起個咁重嘅路牌，但就唔知點解抬唔起比路牌輕咁多嘅電單車。然後獎門人就孭住阿女直奔阿仔嘅工作地點。

另一邊廂，因為實驗失敗，天氣之子同阿仔同徒弟打起上嚟。天氣之子明顯又係有超能力，又係可以徒手就將一個成年人秤住一嘢掉飛。接住落嚟不如嚟個無獎問答遊戲，大家請估下喺呢個動作場面之後，徒弟會作出咩反應？

畀人撻暈咗
起身同天氣之子再戰三百個回合
原地死咗
淆底唔想再打

依呢套劇嘅邏輯嚟講，應該係 B，但最後答案其實係 E 佢條頸中刀爆血身亡啊！我呢段重覆又重覆咁睇咗好幾十次，我都係見唔到天氣之子係幾時𠝹傷徒弟。而就當真係𠝹傷咗徒弟，喺爆血嘅情況下畀人秤住一嘢掉飛，唔係應該會有血爆緊出嚟嘅咩？點解過程一滴血都無。而且喺呢個爆血鏡頭入面，我哋見到徒弟啲血已經染到成個右邊都係血跡，但我哋睇返呢個位，佢嘅右邊重係白雪雪乜嘢都無，咁點解可以喺一瞬間，啲血就流到巴巴聲染晒件衫呢？件衫咁吸血係有吸血加成嘅衫完係護舒寶嚟？更加唔好講嘅就係啲道具無誠意到，你就算唔攞啲電腦 Mon 嚟玩，你都無理由入面裝條光管就算啩。咁當然就係一輪白痴鏡頭之後，阿仔就同天氣之子打起上嚟，結果就一拳打到天氣之子撞埋檯角，撞到又暈咗。

喺呢個時候，獎門人同阿女又嚟到阿仔呢度。好一個獎門人，見到有條友成頸血咁喺正地下，都係掂行掂過，嚟到呢度又唔諗住救人，淨係掛住教訓個仔，一巴就車咗埋去，果然係亞洲人教仔，一見面就車返巴先。然後三個人依然都係唔理瞓喺地下嘅兩位，而掌門人行嘅位置 Supposed 係有條友瞓咗喺度，個頭流血流到巴巴聲，但係都依然無諗住理佢，淨係繼續講佢啲乜嘢大道理。獎門人居然喺度問：呢度啲人呢？大佬咪有兩條友瞓咗喺地下，你唔會見唔到下話？呢句對白係要幾咁痴線先會講得出口。然後答嗰個重白痴，阿仔居然話全部走晒，喂大佬咪重有兩條友喺地下囉，就算一個死咗一個暈咗都係人嚟嘅姐，咁快就唔記得咗佢？不過唔記得好正常，因為喺場上面嗰兩條友都消失咗，本來天氣之子應該瞓咗喺呢個位，但係而家就唔見咗。無論喺呢個鏡頭，定係呢個鏡頭，都見佢唔到，咁係咪姐係佢逃走咗呢？

不過都唔理喇，但我想知點解一間好地地嘅氣候實驗室會有自爆系統？導演同編劇係咪玩生化危機玩上腦？呢度又無病毒洩漏，你整個自爆系統做乜春？你掹電掣咪得囉。姐係電腦 Hang 機你 Restart 咪得，你都唔會整個自爆系統喺個電腦度啩。結果反而係無電自唔到爆，但就有電繼續整惡劣天氣？而更加白痴嘅係，原來天氣之子重喺地下度㗎，佢根本無走過啊，姐係頭先三仔爺嘅對話呢條友全程都應該在場，我諗獎門人睇唔到應該係呢條友有隱形超能力下話，不過天氣之子就勁啦，佢應該同撒亞人一樣，瀕死前復活戰鬥力倍增，就走咗出去追阿仔。

然後出面咩環境呢？今次到落隕石？原來唔係，係落冰雹姐。不過啲冰雹好似隕石咁大粒咁解，連設施都打得爛。結果阿仔就被冰雹擊中，而天氣之子亦都化身G1，攞住碌棍準備隊冧阿仔。喺危急關頭，獎門人趕到，好一個獎門人一腳就伸開咗天氣之子，重痛打倒地嘅天氣之子。而喺阿女扶起阿仔之際，又一粒隕石冰雹迎面而嚟，睇嚟今次都凶多吉少。雖然明明粒隕石冰雹飛緊埋嚟，但佢哋依然都重不斷咁講緊嘢，不過無獎問答遊戲又嚟喇，大家請估下呢粒隕石冰雹隊冧咗邊個角色？

獎門人同天氣之子
阿仔同阿女
淨係天氣之子
全部無事 Super

依呢套劇嘅邏輯嚟講，應該係 D，最後答案都真係 D，佢哋全部都無事啊！咁點解佢哋全部都無事呢？因為呢粒隕石冰雹自此就無出現過，好似坐的士返咗屋企一樣，無進行到任何攻擊。不過都算，但我想知點解喺呢個鏡頭入面，離遠有條友行過嘅？重要慢慢行添？佢唔怕隕石冰雹咩？咁又係嘅，落落下會自已坐車返屋企嘅冰雹，驚佢有牙咩？

好啦最後到咗啟動咗自爆程序之後嘅最終決戰，天氣之子以一敵三大戰獎門人一家，雖然獎門人個個都有超能力，但點會夠瀕死前復活戰鬥力倍增嘅天氣之子打呢？所以到最後獎門人就掉咗天氣之子落街，順手自己跌埋落去。無錯，真係順手㗎咋，因為根據正常嘅力學原理，天氣之子除非有輕功或者識舞空術，如果唔係嘅話佢係發唔到力拉獎門人落去，而根據獎門人嘅動作嚟睇，佢完全無作出任何反應，咁姐係話跌落去呢件事係獎門人刻意而為嘅。而如果睇返呢個 Shot，你會見到獎門人到最後係有捉住條邊，但係居然都重要阿女救，好明顯係刻意。不過都唔係重點，我想播以下呢段畀大家睇。

不過無獎問答遊戲又嚟喇，大家請估下呢隻手嘅主人係邊個嘅？

阿仔
阿女
獎門人
天氣之子

依呢套劇嘅邏輯嚟講，應該係 E，唔知邊度走出嚟嘅陌生大叔嘅手，但當然最後答案係 B， 阿女隻手啦。不過如果阿女你隻手真係咁，我都真係建議你去做吓修甲。不過事實上經我翻睇之後，其實阿女隻手就好靚嘅。咁究竟呢隻手又點解要出現係呢度呢？係咪有啲乜嘢特別嘅蒙太奇效果？點解唔可以叫阿女做返而要揾條麻甩佬隻手嚟做呢個動作？而呢個動作又係咩事？意大利佬最強力手勢？不過都無用，結果獎門人都係跌死咗。成套戲就咁完咗喇。

其實我頭先講過嘅嘢都只不過係呢套戲嘅一啲亮眼位嚟，實情係呢套嘢入面重有好多呢啲位，我都真係不能盡錄，而且我都真係第一次做一套戲嘅吐糟係可以吐到不能盡錄，可見呢套戲係幾咁厲害，幾咁災難。

不過，雖然呢套戲係咁災難，但我喺睇嘅過程入面發現咗一啲絕密訊息，而且懷疑係絕密訊息，作為咁愛國愛黨嘅我，當然要用我最強嘅能力，超級翻譯簡稱「超譯」嘅能力將呢啲絕密訊息揪出來啦。

首先，呢套戲嘅主軸聽落係同天災有關，但係事實上係人禍造成。而人禍就係嚟自於研究天災嘅實驗室。因此要了解呢條線，我哋就要從呢間實驗室嘅話事人天氣之子開始了解。天氣之子一開始就講咗句「實踐就是證明真理的唯一標準」本來就係我哋偉大嘅毛主席喺佢嘅著作《實踐論》入面嘅精華，咁姐係話佢喺戲入面係有住根正苗紅嘅思想。

然後佢亦都有句對白：

「有權有勢嘅人就喜歡高高在上，但遇到災難，還是得回家躲起來」

「只要我哋掌控到大自然，我哋就可以掌控到呢個城市。」

呢兩句對白本身都無乜特別，但當我見到阿仔打電話畀阿女嗰陣，見到有個電話 No. 係寫住湖北武漢嗰陣，我就覺得 Everything is Connected。中國有咁多個省咁多個市，點解偏偏喺度就係出湖北武漢而唔係出其他地方呢？咁姐係話係意有所指啦。咁最近同武漢有關，要掌控大自然然後發生災難嘅事件有啲咩事呢？

然後如果我哋將有權有勢嘅人理解成某啲星字旗國家嘅人，就會見到啲端倪，因為的確喺遇到災難之後，呢班人係回家躲起來咗一段時間，而且後來天氣之子亦都有一句說話：

「為什麼這次實驗會出錯，就是因為這些黑心老闆故意撤資造成！」

實驗出錯當然唔係源自於老闆撤資，係天氣之子一手造成，問題係點解天氣之子會咁執著實驗出錯係同黑心老闆故意撤資有關呢？咁我哋就要探究一下乜嘢叫故意撤資。正常嚟講，撤資就一定係故意，因為你投資係唔會無意識咁撤資㗎嘛。問題係呢套戲喺呢度強調「故意」呢個字，係咪姐係代表某啲訊息呢？A國對C國加徵關稅然後又令到在外企從 C 國撤資呢件事好似發生過咁嘅？然後天氣之子又有一句：

「我告訴你們，沒有了他們，我靠我自己一定會成功的。」

呢個係咪令你聯想到喺同啲老細反面之後，某國靠自己內循環嘅經濟策略呢？再加上天氣之子口中成日都掛住一個詞語：「風控」、「風控程序」，而且佢又講過「風控行動嘅構想已經好成熟」，咁風控又代表乜嘢嘢？點解好似同某啲字係同音嘅？我都查過吓，「風」字普通話拼音係 feng 第一聲，而有一個字嘅普通話拼音 feng 第一聲。

然後天氣之子又講到：我的風控，對人類作出咗最大嘅貢獻。諾貝爾獎就在我們眼前。

問題就嚟喇，諾貝爾獎就淨係得五個獎項，分別係：物理、化學、生理學或醫學、文學、和平。天氣之子呢個氣候實驗室其實基本上只係「能源科學」，而諾貝爾獎係無呢個範疇。咁點解呢套戲又會強調天氣之子可以攞諾貝爾獎呢？諗返最近有邊個領導有機會因為解決某啲問題而攞諾貝爾和平獎？

然之後阿仔就鬧天氣之子：

「所有人會因為你嘅執迷不悟而受傷死亡。」

而天氣之子就答：

「縱觀人類嘅科學史，就是要有犧牲精神，死兩個人算什麼？」

呢種被「犧牲小我，完成大我」嘅精神，係咪好熟口面呢？再加上

喺呢套戲入面，災難發生咗之後，喺新聞上面不停咁廣播話咩有救援隊救援專家已經展開救援工作，但成套戲一個救援人員都無見過，同埋一地震啲高樓大廈立即好似豆腐渣工程咁全部倒塌，都不禁令人細思極恐。

所以綜合以上嚟講，我哋會發現呢套戲係有指桑罵槐之嫌，咁掉返轉嚟講，分分鐘其實呢套戲係一套諷刺時弊嘅電影嚟添。再加上獎門人喺戲入面又反填海又環保撚又剩，不禁令人諗起我哋偉大嘅「明日大嶼」，不過獎門人呢獲我就撐你啦，雖然你管治嘅 TVB 成日出埋啲垃圾，但係就憑你敢出演呢個角色，我就敬你係一條漢子，打和啦 Super。

總括嚟講，呢套電影都無乜好總結㗎啦，我做嚟都係為咗畀你哋笑吓嘅姐，希望大家睇得開心啦。今集《𠝹櫈電影學會》就咁啦~