27/5 《圍爐取戀》富男友原來住公屋？！事主：佢話自己住九龍塘House🏡✨

東方昇：「Jenny你好！」
Jenny：「Hello。」
東方昇：「喂！你有一個俾人呃嘅經歷喎。」
Jenny：「之前就識咗個男仔，我哋點識嘅呢？就係關於啲暑期興趣班嘅。」
東方昇：「暑期？乜嘢嚟㗎 ？咩活動呀？好細個㗎 ？」
Jenny：「當時我係大學畢業左兩年，佢就細過我嘅，佢就未畢業嘅嗰陣時。其實我係興趣班嘅導師嚟嘅。所以我成日晏晝都會有Break。」
東方昇：「等陣先！佢係學生？你係老師？」
Jenny：「係呀。」
東方昇：「即係佢越級挑戰，大佢幾年，仲要係老師喎！」
Dickson：「挑戰權威！」
Jenny：「不過佢就唔係我嗰班嘅同學嚟嘅。」
東方昇：「啊！仲要隔離班？咁佢個攻勢有幾猛烈到係會成功嘅呢？」
Jenny：「開頭佢就好主動，佢會約我食飯、或者約我食Tea。」
東方昇：「你之後先知道其實嗰時佢已經對你有興趣㗎喇。」
Jenny：「我feel唔到嘅。咁可以直接過嚟接收工啊，得閒會打電話嚟問我今日返工辛唔辛苦啊呢啲咁嘅嘢。」
東方昇：「高手嚟㗎喎！」
東方昇：「我問吓兩位女仔，如果有個咁嘅人出現，你哋會唔會中招呢？」
蘇麗珊：「我會有一個防備之心，因為會覺得呢啲招數都似啊⋯⋯」
Dickson：「太狡猾啦？」
蘇麗珊：「佢唔係蠱惑嘅，即係佢好知道個套路係點樣。」
利君牙：「同埋有種做緊嘢嗰個環境突然間有個咁嘅人，我講好似好冇說服力咁。但係的而且確我喺度做緊嘢㗎嘛，突然間有個咁嘅男仔會覺得有啲怪囉。」

東方昇：「Jenny就中咗招？」
Jenny：「哈係呀。」
眾主持人：「哈哈哈哈點解突然甜笑呢？」
利君牙：「故事發展得好快喎！」
東方昇：「你唔好唔記得你今日去分享俾人呃嘅經歷㗎，但係你嗰個甜笑好似仲有啲回味。」
Jenny：「呢段戀情就唔係好耐嘅，三個零月咁啦。開頭佢，我諗頭一個月其實佢都好熱情，好多嘢都好主動，好關心我咁。有一樣嘢其實我都唔清楚，因為我以前讀City，跟住佢就同我講：『其實我都住九龍塘㗎，我住House嗰啲，返屋企就唔使搭lift嘅。』佢住2樓嘅，家姐住樓下咁樣，間屋好大。」
東方昇：「我以防大家唔知，其實九龍塘係好貴㗎嘛。好貴！仲要House嗰啲。」
Jenny：「佢仲係有意無意間特登要話俾你聽佢屋企係點樣，而且係好詳細咁樣形容佢屋企係點樣。」
東方昇：「係呀好詳細㗎 ！」

東方昇：「嗰時佢追到你未先？」
Jenny：「嗰陣呀追到㗎喇！」
東方昇：「未追到咁講呢我有諗過會唔會想俾你睇我有條件，我有錢㗎；但佢追到，都咁樣強調⋯ok。」
Jenny：「追到之後，就話爹哋媽咪就做生意，又話家姐唔知係做⋯⋯總之人工好高嘅工。」
東方昇：「你冇乜兩眼發光嘅？」
Jenny：「我又冇乜喎，我覺得佢自己都仲係學生，咁有冇錢其實都唔係佢㗎啦！有上進心好過你有幾多錢囉。」
東方昇：「我想問係咪齋口講呢？定係有冇行為呢？例如佢約你食飯，或者會唔會次次都係佢俾錢，或者去一啲好高級嘅餐廳，會唔會咁樣呢？」
Jenny：「佢約我食飯，佢係會嘗試揀高級餐廳嘅，但係我就反而話其實唔好食咁貴啦。不過佢每次出街都係着啲名牌上身。我自己個人講真，着緊旺中買嘅衫褲嘅啫。」
東方昇：「佢有冇送嘢俾你嘅呢？」
Jenny：「佢有㗎 ！首飾，不過又唔係話好貴嘅首飾囉。」
東方昇：「咁幾好啊！識咗個有錢人幾好呀！」

Jenny：「跟住突然間佢會忽冷忽熱。有一排佢可能今日送完你返屋企啦，之後嗰日佢可以唔覆你。去到可能再之後嗰日佢就好開心，朝早又會打俾你講：『我而家返學啦！不過呢我唔同你講住啦，我踩滑板返學㗎！』即係佢成日都好似好想有啲鬼仔性格咁樣。」
東方昇：「即係我好有錢，我有勞斯萊斯！但係我踩滑板返學。」
Jenny：「隔幾日又會話：『好啦你過嚟食飯啦。』嗰日去咗快餐店食嘅。兩個人坐低咗，我就話諗住食乜乜咁樣，咁佢買完之後我就話：『咁你嗰個呢？』佢就話：『我唔食啊。』突然間黑面喎。我話：『其實你係咪唔想食呀？』佢話：『唔係呀，你食啦！我唔食喇』」
Dickson：「咁塊牛扒唔係威靈頓，真係爭啲㗎 ！」
東方昇：「嫌cheap佢！」
Jenny：「我話：『咁你食咩啊？你真係唔食啊？』佢話：『我返屋企食！』」
利君牙：「可能佢見到個食物賣相唔得！屋企廚師煮得好過呢個，所以就有呢個情緒囉。」
東方昇：「咁後尾點樣呢？」
Jenny：「佢成餐飯就喺度拖住個頭望住我碗野，又唔係望住我個人，跟住喺度又唔望囉。」
東方昇：「嗱！我而家得出個總結就係佢對你忽冷忽熱、同埋佢成日話自己好有錢。咁佢呃你啲咩呢？」

Jenny：「有一日唔知佢張SIM卡做咩，就入咗去電訊公司嗰度，有啲嘢要寄番俾佢就要confirm佢地址， confirm地址嘅時候我就望到，原來佢係住喺九龍塘嘅南山邨某一幢嘅2樓。」
眾主持人：「哦～」
Jenny：「真係2樓啊！佢冇呃我嘅其實。」
東方昇：「即係佢扮住House，但其實住屋村嘅。」
Jenny：「係啦！咁跟住隔咗一段時間佢就成日同我講分手。譬如食完飯就話不如我哋今晚分手啦！我問點解呀？」
東方昇：「佢知你偷睇到佢個地址。」
Jenny：「我唔肯定佢知唔知，但係最後一次同我講分手嘅時候就係話覺得照顧唔到我，我問佢係邊方面照顧唔到我？你冇時間定係覺得你冇金錢啊？佢就話：『你遲啲就會知㗎喇』」
眾主持人：「嘩哈哈哈！咁恐怖？」

利君牙：「我想問吓其實佢炫富嘅頻率有幾高呀？」
Jenny：「其實基本上每日同我傾電話都會話佢自己住九龍塘，因為佢一路同我傾偈一路返屋企㗎。佢就會話我而家見到隔籬屋養咗嗰隻唔知咩啊，個工人又帶佢出嚟行，我同佢好熟㗎 ！隻狗好鍾意我㗎 ！」
蘇麗珊：「我覺得佢有少少人格分裂。會分裂咗一個佢覺得自己好有錢嘅人出嚟，佢就代入咗嗰個角色不停同你講嘢囉。」
東方昇：「佢直程有畫面，一路講電話，一路行一路創作個畫面出嚟。」
蘇麗珊：「其實佢可能係一個好好嘅編劇嚟㗎 ！」
東方昇：「直程係舞台劇演員！個台吉晒，但係可以幻想到呢度有花，呢度有咩……」
利君牙：「獨腳戲呀每日都要上映嘅。」
東方昇：「所以呢個已經好誇張我覺得！仲有冇其他嘢呢？」

Jenny：「有一次FaceTime，我記得佢係喺條街度⋯⋯」
東方昇：「key 綠幕 ！整啲特效出嚟！House嗰啲。」
Jenny：「喺九龍塘。」
利君牙：「哈哈又係九龍塘！佢永遠都出沒喺九龍塘。」
東方昇：「哦即係佢FaceTime扮真係喺九龍塘嗰度？」
Dickson：「即係直程有實景㗎 ！」
Jenny：「係呀！佢話我喺呢度行去前面好快到㗎喇。跟住我就收線喇咁樣囉。」
東方昇：「哦～」
Dickson：「認真拍攝㗎人哋！唔係Key綠幕㗎人哋。」
利君牙：「實景㗎。」

蘇麗珊：「我想問多一樣嘢，你話佢對你忽冷忽熱呀嘛，咁佢係好鍾意你嘅時候就係佢炫耀自己有錢嘅時候喇？」
Jenny：「都係呀！佢好enjoy㗎每次都，同埋佢好enjoy俾錢嗰一刻。佢成日都話等我嚟啦！啲侍應過嚟就話得㗎啦我俾錢啦！」
東方昇：「你哋覺得佢男朋友其實係諗緊乜嘢呢？」
利君牙：「我覺得因為佢哋一開始識嗰個處境就係一個係老師，一個係學生。所以個男仔就可能覺得嗰個女仔已經識自己搵錢，有自己嘅事業。咁佢就會覺得自己嘅身份一定要高翻啲先可以襯返起佢。佢而家仲讀緊書呀嘛，冇返工，咁點樣有錢呢？就屋企有錢囉！先可以襯得起。」
東方昇：「你呢個咁浪漫咁凄美㗎 ！你諗到咁好喎。」
蘇麗珊：「係囉好浪漫喎！」
利君牙：「咁當然個男仔自卑啦，都有一個底蘊喺度嘅，所以佢就諗點樣先可以溝到呢一個靚老師呢？」
東方昇：「即係《秋天的童話》船頭尺要扮自己好有錢嚟追個女主角咁樣。」
蘇麗珊：「講真我又覺得佢係咪真係好鍾意你呢？我又覺得佢未必真係好鍾意你，因為一路聽你嘅分享嘅時候，我又唔覺得你哋大家嘅溝通係好好。好似係佢做緊佢嘅嘢，然後你又食你嘅飯。」
Dickson：「好似搭枱咁呀！」
利君牙：「所以個男仔係鍾意 - 鍾意女事主嘅時候嘅自己囉！即係好有錢嘅自己。」
蘇麗珊：「係呀！所以佢其實係鍾意自己囉！佢唔係真係鍾意你，真係唔好意思哈哈。」
東方昇：「Dickson，你點睇？」
Dickson：「我就好簡單 - 韓劇型人格！韓劇嗰啲男主角咪個個都高大靚仔！」
東方昇：「《浪漫滿屋》？」
利君牙：「好老呀講《浪漫滿屋》！」
Dickson：「跟住呢個係第一啦！第二就係懷疑有絕症。就係嗰種： 『喂～你唔好問啦～可能過幾個月，你就知㗎喇。』所以我覺得佢係有嗰種逃入自己去做韓劇男主角嘅心理。」
蘇麗珊：「即係佢睇韓劇睇太多！」
Dickson：「係呀就係！韓劇型人格！」

東方昇：「我覺得係一個用『渣男』嘅諗法。嗱！我嘗試代入，我唔係『渣男』！我代入『渣男』嘅諗法去演繹佢，有兩個可能性嘅，一係佢就扮有錢呃你錢。即係佢要扮自己有錢，佢問你：『喂！不如打本俾我做生意啊！』一係咁樣啦；第二可能就係想『呃蝦條』！可能佢扮自己有錢，因為佢覺得你會知道佢好有錢之後你就會雙眼發光，你就乜都會俾晒佢，跟住佢就咁樣嚟呃你個身體。」
利君牙：「Jenny佢有冇呀？」
Dickson：「你有冇呢兩方面嘅損失先？」
Jenny：「錢係冇。不過佢有同我講話佢會做保險嘅。佢出街都要拎住個公文袋咁樣嘅。」
眾主持人：「哦～」
Jenny：「要好專業咁樣。另外身體果樣，佢曾經有要求過嘅，咁喺佢屋企附近就話佢想要啊，我覺得我自己都唔想有下一步嘅。我話既然你想咁係咪去你屋企呀？」
東方昇：「你試探佢嘅！」
Jenny：「佢嗰刻係好有反應，佢係好想！你feel到㗎 ！」
東方昇：「哈哈隔住個電話點樣表現？佢點同你講啊？」
Jenny：「我想要啊咁呀？」
Dickson：「點feel到㗎 ？」
Jenny：「攬住你講：突然間我好想要～」
東方昇：「哦喺你隔籬！我想問吓先，你話去佢屋企，你係特登試探佢嘅？」
Jenny：「我都叫做係㗎 ！我就話：咁近不如上你屋企啦！」
東方昇：「你都唔蠢呀！哈哈」

Jenny：「咁你話你好有錢吖嘛！咁你咪開房囉係咪先？好近啫，其實得兩個方法，一係就屋企，一係就隔離開房。」
東方昇：「係，正呀！佢點揀呀？」
Jenny：「佢兩個都唔揀。佢就話……」
東方昇：「呢度刺激啲！喺呢度咁樣？」
Dickson：「就地正法？」
Jenny：「佢話：『咁冇嘢喇！你當我冇講過啦』」
Dickson：「即係寧願放棄嗰個慾望都唔想你上嚟拆穿。」
Jenny：「佢要扮，真係要扮得好徹底囉。」
東方昇：「咁即係其實佢都唔係想要你嘅身體喎。如果佢真係想要你嘅身體，咁佢唔係喺屋企咪搵夠錢去時鐘酒店囉！去時鐘酒店都解決到啦！佢好享受自己扮有錢嗰個角色喎。」
Jenny：「都係㗎。佢每次提自己住九龍塘，住House佢就會挺胸收腹，自自然然。」

東方昇：「你覺唔覺得好似蘇麗珊咁樣講，佢好自卑？你覺唔覺得佢係一個好自卑嘅人呢？」
Jenny：「事後諗返其實我覺得係嘅。因為自卑嘅人先至會咁樣話俾人聽：我好勁啊！其實我真係好勁㗎，東方昇，我好叻㗎 ！」
東方昇：「呢個都係一個幾奇怪……」
Dickson：「扭曲嘅愛情。」
東方昇：「因為個奇怪在如果佢扮有錢想呃你錢，都合理呀。扮有錢想呃你身體，都合理呀。佢兩樣都冇得到，佢真係純粹自戀⋯⋯」
利君牙：「佢係一個悲劇人物囉。」
Dickson：「完成個故事。」
利君牙：「即係佢唔係壞人，佢冇做錯任何事喎。佢純粹係可能唔知有咩壓力驅使佢有呢啲行為。」
Dickson：「我甚至乎覺得佢選擇呢個女仔都係一定有一啲原因係滿足到佢嗰個幻想㗎。但係係咩我就唔知，可能因為老師學生？」
Jenny：「我諗過我覺得係我當時身份問題囉。即係都係因為老師佢覺得好型呀！我覺得我自己。」
利君牙：「都係嘅我哋頭先聽都覺得佢一開始好型呀。」

東方昇：「我再想問多一個問題，咁後尾你哋分手之後你有冇再了解佢而家嘅生活係點樣啊？」
Jenny：「分手之後本身佢都有搵我，但係其實我個人冇呀再見亦是朋友呢樣嘢。亦都冇了解過佢會做啲乜嘢。」
Dickson：「我反而有興趣知道喎！你話佢搵你呀嘛，咁嗰個過程有冇戲劇性㗎 ？」
Jenny：「搵我其實就係問做緊咩啊？忙唔忙呀？其實你仲有冇掛住我啊？」
東方昇：「多數咁樣問其實想知道對方仲掛住自己，其實係自戀㗎應該係。」
利君牙：「同埋有時獨角戲做得耐，都想試吓同人一齊做啊！」
蘇麗珊：「佢想要得到反應。」
利君牙：「嗱！演員就知喇！」
蘇麗珊：「我係有少少擔心佢嘅心理創傷。因為佢一定有一個好大嘅缺陷，可能我唔知佢童年有冇受過啲乜嘢，係咪俾人笑呀定係點樣。跟住就覺得我要成為一個咁樣嘅人。」
東方昇：「所以都係悲劇人物，係幾慘嘅。我都可以搵到佢，喺南山邨2樓呀嘛？」
眾主持人：「哈哈哈哈⋯⋯」
東方昇：「希望你之後唔好遇到咁奇怪嘅愛情經歷啦。」
Dickson：「平平凡凡啦。」
東方昇：「好啦好啦，感謝啦。唔該你拜拜。」

東方昇：「嘩頭先聽呢個故事令我諗起我都聽過類似一啲人分享愛情經歷俾我，點解咁樣呢，佢當嗰份愛情識一個人係一個game。我曾經聽過有個人話佢會喺街度無啦啦隨機地識一啲女仔，問佢交換電話就溝佢。我問佢咁咪好奇怪？你唔識佢無啦啦會唔會好尷尬？佢覺得嗰樣嘢好玩係好玩在因為佢唔知你嘅背景，你可以做另一個唔係你自己嘅角色。係一個角色扮演嘅遊戲。」
蘇麗珊：「我都有試過……」
眾主持人：「吓？」
Dickson：「唔係啊嘛？嚇親我呀！」
蘇麗珊：「但係我唔喺愛情上面。因為我有做餅房，我去做餅房要入貨嗰啲啦，咁入貨嘅時候好多時都係WhatsApp入貨㗎咋。我喺WhatsApp就會同佢講我叫Susan呀，即係入貨嘅人就叫我Susan。然後呢個Susan就會同佢地傾吓啲天南地北嘅嘢。」
利君牙：「會唔會傾蘇麗珊啊？」
蘇麗珊：「唔會唔會。」
東方昇：「即係佢唔知你係蘇麗珊？」
蘇麗珊：「兩個時空唔會交疊嘅。咁我就會可能同佢講啲湖北蛋攞嚟整蛋糕係唔係鬆化啲㗎？」
Dickson：「變到好active嘅。」
蘇麗珊：「係呀係呀。」

東方昇：「蘇麗珊你係咪有歌要介紹俾我哋㗎 ？」
蘇麗珊：「係呀冇錯。」
東方昇：「怪唔怪㗎？唔怪嘅？」
蘇麗珊：「唔怪嘅唔怪嘅。首新歌就叫做《一下子就不愛》。其實主要嗰樣嘢就係想講兩個人如果相處唔到嘅話就要狠心一啲去提出分手。唔好再俾呢個Toxic嘅關係影響住你嘅心情。」
利君牙：「就好似Jenny同佢男朋友咁， Jenny好快就分咗手。」
東方昇：「好啊咁大家記住如果有一個經歷就要去聽吓（首歌）啦，係要自救啊係咪？」
蘇麗珊：「冇錯係呀！」
東方昇：「感謝你上嚟！ thank you拜拜！」