NVIDIA超級電腦科技巨頭爭住買｜ROG水冷RTX 4090｜Garmin新錶半年續航力｜3家電遭機電署禁售｜廣東話【Price Weekly 2023 年 6月 #169 】

Price.com.hk 香港格價網 | 科技類 | Jun 7, 2023

此影片謄本由Ka製作

★非作商業用途，本檔案版權歸版權持有人獨有★

歡迎收看Price Weekly，我們一起看看今個星期最熱門的科技新聞。

如果不想錯過我們的新片，就快點Subscribe Price youtube channel，再按旁邊的鐘。

台北國際電腦展 Computex 日前正式開鑼!喺展覽會上，NVIDIA CEO 就宣布咗未來一系列計劃同埋服務進展，同時亦都推出咗 256 部用 Grace Hopper 晶片嘅 AI 超級電腦DGX GH200。
先講 Grace Hopper，呢粒 Superchip 由 NVIDIA 最新嘅Grace CPU、Hopper GPU 所組成，同埋用咗 NVLink-C2C 互連技術，配備 72 個 Arm CPU 核心、96GB HBM3 記憶體。而 GPU 有 576GB RAM，提供 900GB/s 頻寬，比傳統標準 PCIe Gen5 嘅頻寬高 7 倍，同埋出到 4 PetaFLOPS性能表現。呢粒 Superchip 已經投產，嚟緊年尾就會上市。Meta、Microsoft、Google Cloud將會係首批會採用呢粒晶片嘅企業，而 DGX GH200 就係第一款將呢粒 Superchips同 Nvidia NVLink 網絡技術結合嘅超級電腦，新系統將會採用 NVLink Switch System，連接 256 個 Grace Hopper，就好似一個巨型 GPU 咁運作。提供 1 exaflops 性能，同埋 144TB 嘅共用記憶體，同樣預計會係年尾推出。

下載檔案

所有資料非作商業用途，若有內容侵權，請即通知我們移除。

華碩喺 Computex 亦都有多款 ROG 新品展出，當中 ROG Matrix RTX 4090 水冷顯示卡，就成為好多 Gamer 嘅焦點。呢張顯示卡採用一體式 360 水冷散熱，除咗用均熱板來加強散熱效率之外，係核心部分仲用埋液態金屬散熱膏，直接用落 GPU 晶片。
令顯示卡保持係低溫之下，同時維持 GPU 嘅時脈同效能表現。同場亦都有好多全新電競週邊產品，當中包括 keyboard、 mouse、mouse pad 等等...當中嘅 ROG Strix Scope II 96 Wireless，主打 96% 尺寸比例同埋全新 ROG NX Snow 鍵軸，搭載 SpeedNova 無線技術，支援 USB 2.0、RF 2.4GHz、藍牙連線方。而且仲可以用 ROG Omni 接收器，整合 keyboard 同 mouse，降低多裝置同時連接嘅操作延遲同埋電量消耗，等大家打機嘅時候更爽啦!

講完電競野，我哋就繼續睇埋 ProArt 系列，焦點絕對係 Cinema PQ07 啦!呢個 mon 有成 135 吋，係咁大嘅會場都一樣好有存在感!相信唔係個個屋企都擺得落，所以佢都有提供自訂尺寸嘅服務。規格方面，提供 4K 解像度、最高 2000nits 亮度，覆蓋 95% 嘅 DCI-P3 色域，有超高對比度，像素間距更小至 0.7815mm。相比傳統間距得 P1.2、P1.5 嘅 Micro LED，廠方就話 PQ07 視覺效果會更流暢同生動。雖然暫時仲未知道價錢同埋幾時開賣，不過相信價錢絕對唔平，唔知你哋又有冇興趣呢?

頭先都提及過嘅 NVIDIA，除咗投產超級晶片之外，亦推出以 NVIDIA Omniverse 為平台，為遊戲而生嘅 Avatar Cloud Engine for Games。呢套解決方案會先分析遊戲背景、世界觀等資料
再透過 AI 生成對白，內建嘅 NeMo Guardrails 亦會確保內容同遊戲世界唔會有矛盾。好似呢條 demo 片入面嘅拉麵鋪老闆所講嘅對白都唔係預先寫定，有咗呢個技術，遊戲世界入面嘅 NPC 設定相信會有好大轉變，唔再好似以前咁淨係企定定等主角，又或者得果幾句對白。

早前有消息指 Samsung 將會喺 7 月尾會發表全新嘅摺機，外國就有分析師估計Galaxy Z Flip 5 將會採用色海攻勢，同時推出款唔同機身顏色。除咗灰色、淺粉紅色、米色同埋淺綠色之外，仲有藍色、綠色、鉑金色、黃色等新顏色。另外新 Filp 5 嘅外芒仲會加大到 3.4 吋，差唔多有半部機咁大，但係就唔似 Motorola RAZR 40 Ultra 咁樣，將兩個後置鏡頭都擺埋入個芒度。好唔好睇就見仁見智啦~我就幾期待咁大個外芒可以有乜嘢新玩法喇!

距離 Google 新一代 Pixel 發表可能仲有一段時間，不過早前喺 WPC 無線充電聯盟官網竟然發現 Pixel 8 嘅身影。不過相入面呢一部就唔係Pixel 8 係 Pixel 6 !網頁入面寫 Pixel 8 最高支援12W 無線充電同7代一樣，無升級到 Apple 同聯盟制定可以磁吸充電嘅 Qi2 規格。而另一個爆料網站就發布咗，聲稱係 Pixel 8 Pro 嘅實機影片，機背鏡頭模組隔離多咗一個圓點。爆料網就話呢個其實係紅外線感測器，係用嚟畀用家量體溫架喎，唔知道大家又信幾多成呢？歡迎留言話我地知!

智慧手錶品牌 Garmin 更新旗下 epix 同 fēnix 7 產品線，同時推出 epix Pro 同 fēnix 7 Pro，兩款錶都有 42、47 同 51mm 3 種 size 畀用家揀。熒幕尺寸就分別係 1.2、1.3 同 1.4 吋，epix Pro 用 AMOLED。fēnix 7 Pro 就係 MIP 反射式熒幕，而 51mm 型號喺智能手錶模式之下，續航時間分別係 31 日同 28 日。當中 fēnix 7 Pro 用埋太陽能差電就可以去到 37 日，如果用慳電模式再加太陽能更加用到 173 日，幾乎半年先需要差一次電。兩款錶主要針對唔同用途嘅用家，epix Pro 偏向運動型，除咗本身已經有幾十種運動模式，仲新增咗足球同籃球等等...亦會對用家嘅運動表現評分。而 fēnix 7 Pro 就比較適合鍾意野外探索嘅用家，用咗新嘅地圖結合埋氣象資料，等用家可以睇到前方嘅天氣變化。價錢方面，epix Pro 同 fēnix 7 Pro 分別係 900 元美金同 800 元美金。

TWS 耳機賣到成行成市，唔同嘅品牌都絞盡腦汁，降低聲音延遲。不過受制於藍牙傳輸編碼，用嚟打機想聲畫同步始終差咁啲。電競品牌 Razer 新出嘅 TWS，Hammerhead Pro HyperSpeed隨機跟埋 2.4Ghz 超低延遲無線配對器，仲有 USB(Type-C) dongle 畀用家插落遊戲機或者 PC 度。官方聲稱可以做到最短 40 毫秒延遲，而一般藍牙耳機延遲可能長達 200 毫秒。耳機用上藍牙 5.3 規格，支援 SBC 同 AAC，價錢賣 $1,599，鍾意電競嘅朋友不妨留意吓。

機電署日前根據《能源效益（產品標籤）條例》，禁售三款電器，佢地分別係 Miele KM 7684 FL 電磁爐，Imarflex 伊瑪牌 IRF-80K 冷藏櫃，同埋柏林牌 UHP-10 儲水式電熱水爐。署方就話呢三款電器，經過能源表現監察測試之後，發現能源效益及功能特性未達到申請時所講嘅表現，所以決定禁售。用家如果有查詢，可以同有關嘅進口商聯絡。