🚽古代廁所一覽，古羅馬男女混廁？第一代抽水馬桶奇臭無比？｜格物冷知識｜格物致知

講到呢度，大家都發現佢哋係唔分隔嘅，大家就坦蕩蕩噉行入去鳩揈揈。事實上，佢哋係完全唔介意咁赤裸，反而仲形成咗一種廁所社交文化。喺佢哋眼中，呢個已經唔係一個公廁，而係一個公園。佢哋無分性別、年齡、階層，唔同背景嘅人都會入嚟交流交流。無論係國家大事，定係市井傳聞，乜都傾一餐。就連當時嘅政治家，都會入嚟廁所，一日到黑喺度宣揚自己嘅理念，真係I can do this 「痾」 day！

佢哋除咗好識運用廁所，仲好識運用啲排泄物㗎。啲屎就當然拎去做肥料啦，而啲尿，你點估得到嗰班友會拎去刷牙先得㗎！真係「世事難尿」呀。羅馬人發現，無論係人家係動物嘅尿液，都含有漂白同消毒功能嘅物質，再溝埋啲浮石粉(Pumis powder)，就成為咗當時嘅牙膏嘞。聽落去係咪好核突呢？但係其實佢哋又錯唔哂㗎喎，因為尿液的確含有阿摩尼亞，而家好多清潔劑都有呢一種化學元素。Ok，Urine (You win)！

「屎詩式中世紀」

又嚟到中世紀，對當時嗰班歐洲人嚟講，大小二便其實係一件好隨意嘅事嚟㗎啫，急就柄埋一二邊痾，而最多屎跡嘅就非法國莫屬。嗱你睇吓，痾落條河又有，痾落條街又得，呢個仲誇張，直頭係超級「屎」場，乜料都有！如果喺屋企，佢哋就會痾落呢個類似痰罐，叫做「bourdaloue」嘅容器，跟手就車(倒)出街。嗱冇誇張到呀，當時嘅法例係批准人大聲叫一聲「garde à l'eau」(watch out the water)，即係「搞掂嚕」，噉就可以隨處扔出街，淋中邊個都冇仇報。相傳法國發明高跟鞋，就係因為條街積咗好多屎，費事踩到一腳都係。但事實係咪真係噉樣呢？第時有機會，做一集話畀你哋知。

可能你又會問，佢哋冇廁所㗎咩？都有，不過早期就主要集中喺修道院同埋城堡，叫做「Garderobe」、「Siege-House」或者「Necessarium」。嗱就係噉樣，呢啲就係名副其實嘅「屎塔」，通常喺建築物嘅牆身，向外起一個類似窗台嘅物體；有啲就直接痾落最底嘅化糞池；有啲就直接痾落條護城河。呢種廁所又有個私人空間，又減少咗臭味，所以就好受掌權者歡迎。不過，正正係呢啲設計，引發過廁殺事件......

第一個被廁殺嘅目標叫Edmund (Edmund II, Genealogical Roll of the Kings of England)，佢係10世紀嘅英格蘭王子。當年，佢三兄弟奉命頂住丹麥嘅全面進攻，佢兩個呀哥都相繼戰死，唯獨佢打極都唔死，成功抵抗敵軍。後來仲做埋國王，成為King Edmund二世，仲有個朵叫做Ironside，即係「鐵壁」，極高防禦。不過，佢就因為一次痾屎而破防。根據Geoffrey Gaimar嘅編年史，一個同盟嘅領主邀請Edmund去佢座城堡作客，飲飽食醉就自然要痾屎。正當佢坐落個屎塔度「嗯~」嘅時候，突然間佢慘叫一聲。唔係因為佢便秘，而係原來個塔底一早設置咗一枝弩箭，兜嘢千年殺噉直穿佢第三隻眼 (屎眼)同埋個肺，當場死亡。

第二位被刺殺嘅，係11世紀波希米亞嘅公爵，亞羅米爾。佢命途坎坷，因為戰亂，佢經歷過無數次逃亡和入獄。到咗晚年，佢已經係一個被折磨到失明，同埋被閹割嘅老人家。根據記載，佢60歲嗰年，有日佢正準備去廁所，原來個屎塔下面一早潛伏咗一個刺客。正當佢塞個蘿友埋嚟嗰陣，個刺客出茅招，一枝茅捅爆咗佢個肚。呢一招，就叫做「茅廁」。

「西多屎」

講完法國，我哋就講吓英國。英國佬就架勢嘞，亨利八世嘅年代有一個你意想唔到嘅職位 —— Groom of the Stool，即係廁所管家。佢哋就好似炭治郎噉，隨身孭住個木箱，而呢個木箱就係一個流動廁所。佢哋仲隨身攜帶水、毛巾同埋洗臉盤，個國王一急屎就即刻衝埋去擺陣，set個壇畀佢「開大」；有啲人工高嘅仲會幫手抆屎。但係，啲屎都係周圍倒，冇一個完善嘅處理方法。直到1582年，第一代抽水馬桶終於出現，係一個叫做John Harington嘅人發明，仲喺皇宮入面試用添。

不過呢個馬桶嘅設計有一個弊病，就係條排污管係直不甩嘅；呢頭痾完，嗰頭啲氣體就湧返上嚟，聞到都頭痛，真係「臭味傷頭」(笑)。所以就冇被廣泛使用。直到1775年，真正嘅現代馬桶正式出現，真係多得呢個人唔少。如果唔係，我哋仲臭緊......佢係一個鐘錶工匠Alexander Cumming。佢簡單噉將原本嘅直管改良做s型嘅彎管設計，仲加咗個有蓋嘅水箱，成功隔絕臭氣回流。不過呢個現代嘅設計，足足等咗100年先興起。因乜解究會噉樣呢？噉就要講吓倫敦嘅大惡臭時代，The Great Stink！

英國人早喺16世紀開始，起居生活已經離唔開泰晤士河。除咗係重要嘅交通要道，仲係最大嘅飲用水源。英國爆發第一次工廠革命之後，倫敦人口急劇膨脹，由100萬爆到去240萬人。人多就自然屎多尿多，積吓積吓，啲排泄物就連化糞池都塞爆埋。嗰班負責清理化糞池嘅工人就地起價，收取高昂嘅清潔費用，班平民實在負擔唔起，於是嗚~ 直接倒落泰晤士河，從此泰晤士河就變得「太唔是河」，直頭變咗條大屎渠；街頭倒完，街尾又俾人飲返。就係噉，引發咗1831年嘅倫敦大霍亂，死咗3萬人啊，慘......

呢件事驅使咗英國議會速速驅屎，1846年佢哋通過霍亂法案，鼓勵每個家庭安裝s型嘅抽水馬桶，諗住可以隔絕啲臭味。不過可惜治標唔治本，啲屎屎尿尿依然係排返落泰晤士河，泰晤士河依然「太唔是河」……1858年嘅倫敦直頭俾人叫做The Great Stink。

呢個大惡臭時代一路去到1875年終於搞得掂。一個英國工程師Joseph Bazalgette，佢建造咗一個新嘅排水系統，鋪設咗一set好長嘅地下水道，同埋兩個污水處理廠，將所有污水直接排出泰晤士河嘅下游。呢個操作令佢被封為爵士，s型抽水馬桶亦都正式廣泛使用。因為唔需要再擔心啲屎清唔走，Joseph就係噉喺歷史上留名青史，泰晤是河亦都「變回是河」，嗰班紳士亦都有新屎坑用嘞 (笑)。

「廁世代」

去到現代廁所，功能上都升爆咗，不過佢哋嘅style同design就層出不窮，個層次都好唔同㗎，我哋就逐間廁所帶大家睇睇。

熱廁

除咗歐洲有隊熱刺，點解日本都有熱廁嘅呢？原來都有段故㗎喎，話說二戰後期，當時日本嘅經濟高速發展，搞到班人嘅工作壓力特別大，成日便秘。但當時日本好多都係踎廁，於是政府就好貼心噉，規定新起嘅屋都一定要係坐廁，而且喺1964年引入廁板噴水裝置。但係呢啲來佬貨馬力太勁，啲水溫有時去到80度......搞乜鬼呀大佬，沖菊花茶呀？所以呢款廁板早期就冇乜人用嘅。直到1980年，東陶公司 (TOTO)就研發咗一款廁板，可以調節水溫、力度同埋個方向。結果大受歡迎，成為國民產品。之後，創意無限嘅日本人就相繼加入更多功能，就係我哋今時今日用嘅日式馬桶嘞 —— 廁板發熱、洗蘿友、洗妹妹、冷暖風、播音樂，同埋見老闆都得...唔係呢個冇。

金廁發達了

有冇諗過去廁所都有黃金體驗呢？帶大家睇吓呢個2002年嘅健力士世界大全，世界最貴嘅廁所。佢係由香港黃金珠寶大亨林世榮製造，位於民樂街，耗資3,800萬港幣；用咗380公斤黃金，配埋鑽石、寶石、珍珠打造而成。整嚟做咩呀喂？洗錢囉！唔通洗手呀？所以呢個唔係金廁，係奢侈。

走掂廁所

呢閶「走掂」廁所唔係酒店，而係一個唔須要掂嘅廁所，位於澀谷畑谷區七子通嘅公園，由創意總監KAZOO SATO同埋建築師久保秀朗共同設計，叫做「Hi Toilet」。事關佢哋想整一個全聲控，唔須要掂到任何嘢嘅toilet。入面無論係開水、沖水、吹水，都係用把聲就得；波形設計仲可以幫助通風，排走異味。吖......唔知深水埗嗰啲公廁可唔可以整返個呢？其實呢個公廁係來自一個「The Tokyo Toilet」嘅公廁翻新計劃，由一個公益團體發起，每年都會改造東京地區17間公廁，有興趣嘅朋友可以去𥄫一𥄫其他設計。

餘廁

餘下落嚟嘅廁所，我哋會快講，然後電擊收工。嚟㗎啦喎！猶他州鮑威爾湖中心，喺水中央有一個浮動廁所，唔知道點上去嘅呢...？瑞士嘅透明廁所，好似魔鏡號噉，入面睇到出面，出面又睇唔返入面喎。墨西哥無底洞廁所，懸空15樓層高。唔係痾到腳軟呀，係嚇到腳軟。法國稻草廁所，直接痾喺稻草裡面。排泄物同啲稻草產生化學反應，形成肥料。嘩~ 好...好新鮮呀。

日本一間cafe有個水族館廁所，一路望住啲魚游嚟游去，呢鋪真係「魚」廁嘞。呢個倫敦升高toilet，係一間叫Urilift嘅公司設計，平時就收喺地底，要痾嗰陣就會升上嚟。嘩...玩捉依因真係一流。仲有壓軸呢一個震驚14億人口嘅廁所...... (畫面顯示大陸有假廁所，成張貼紙貼喺地下度扮係踎廁......)

勾草

關於廁所，阿輝就有啲經歷。不如同大家講吓呢~ ?

阿輝：話說我以前喺酒樓返過工。 (阿木笑) 笑咩呀！XD (阿木：返過咁多工嘅) 有一晚要招呼一對有錢人，大排筵席，部長去睇上菜嗰陣就話「去豬」。喔ok，「去豬」即係上乳豬啦。第二道菜嘞，「去蝦球」，ok上蝦球啦。我正想問佢下一道菜係上啲咩，佢話「去個翅先，快嘅」，噉就即刻急急腳入廚房落order啦。然後嗰晚我哋就俾人投訴，部長就「的」咗我入房，話「明明一對新人講咗唔食翅，仲出咩翅呀你！」，「部長你話去翅吖嘛，我咪照做囉做咩啫！」。俾人炒咗之後都係諗唔到，大家明唔明部長當初係講乜呢？

唔知大家關於「去個廁」又有咩經歷呢？歡迎喺下面...留言......(笑)...XD (按：部長係想講去個廁所，唔係上翅)。

阿木：笑得咁開心...bye~