❓迷因第二集，一口氣講解更多常見memes的出處｜格物冷知識｜格物致知

(播出Meme: Jojo to be continued) 大家係咪等咗好耐呢?呢一個JoJo meme我都想講好耐㗎喇，佢就係出自《Jojo的奇妙冒險》動畫版第一季嘅片尾曲。通常每集結尾時，主角都會面臨危機，呢個「To be continued」就會出現，其他網民亦都陸續仿效，嗱，就好似咁喇 (片中主角似乎將會有不幸結局)。呢一首歌其實係出自1971年前衛搖滾樂隊「Yes」嘅Roundabout，呢一隊band其實喺外國係好紅嘅，鼓手Alan White亦都有份參加錄制John Lenon嘅Imagine。而呢一首Roundabout輕快嘅結他前奏，跟住一個快速變奏，就算唔需要睇個結局，都幻想到嗰條友瀨嘢。

(播出Meme: Coffin Dance)同樣道理，呢一個黑人抬棺嘅Meme，都係形容啲人出事嘅，呢個meme呢幾年嚟都好紅㗎喇。其實呢班人抬住棺材跳舞，係一個叫Benjamin嘅人所創立嘅殯儀公司，係一個殯儀服務嚟。因為喺加納人眼中，死亡係人生其中一個旅程，喪禮只係一個歡送會，唔需要下下都喊苦喊忽嘅，所有Benjamin就創立咗呢一個咁歡樂嘅送殯服務，喺2017年嗰陣，BBC都訪問過佢添，不過當時呢條片就未變Meme嘅。直到2020年，有人將EDM組合Vicetone嘅歌Astronomia配咗上去，又咁啱，fit哂個bit，襯埋個舞步，完全冇違和感，所以呢條片就變成一個meme喇。爆紅之後，正籍冇廢肆虐，佢哋仲畀人邀請防疫片，呼籲大家跳舞要留喺屋企跳，如果唔係就要同佢哋跳㗎喇。......

(播出Meme: Side Eyeing Chloe)咁樣畀人捉去拍防疫廣告，係咪好無奈呢?而呢個叫做Chole嘅小妹妹，點解會擺出一副嫌棄+鄙視+疑惑+無奈嘅表情呢?事關Chloe同家姐Lily喺如常翻學嘅途中，佢呀媽突然間同佢哋講「喂今日唔好翻學喇，去迪士尼啦好冇呀?」呀家姐Lily一聽到，難掩無法置信嘅激動心情，哭成淚人。而呀妹就好似聽到陳同佳終於去自首咁樣，完全冇辦法相信，嚇到講唔到嘢。呢一個咁傳神嘅表情，就即刻畀網民瘋傳。去到2021年，Chloe已經十歲，佢曾經試過模仿翻當年嘅表情，但係已經做唔翻喇，不過呢一個cap圖嘅NFT就幫佢賺咗101,770美金，供佢讀大學。10萬美金讀4年大學，再除翻每年12個月，即係每個月有幾錢洗呢?唔準諗，即刻答......

(播出Meme: Math Lady) Wow，係咪好難計呢?一遇到呢啲咁複雜嘅問題，Math Lady就會出現。呢個女人係嚟自2004年嘅巴西電視劇，個演員叫做Renata Sorrah，佢喺劇中係飾演一個反派。其實原版係冇嗰啲方程式嘅，而係諗緊點樣著草嘅啫。去到2016年，有網民係9GAG就post咗一張四格諗樣嘅cap圖，再加埋啲數學formula，於是成張圖嘅情況就睇嚟更加複雜難解喇，就好似而加啲香港年青人出路咁樣呀......

(播出Meme: 講呢啲) 「X! 講呢啲。」係咪咁呀?(笑)。係喇，唔講呢啲，就講「X! 講呢啲。」呢個Meme。呢個Meme家傳戶曉，唔識都唔好話自己係香港人喇，記得嗰陣時WhatsApp啱啱興起圖戰，咁大家就好興用呢啲cap圖嚟溝通，而呢句「X! 講呢啲。」嘅對白其實係改圖嚟嘅，本身係出自《拳王》第22集其中一幕，大家一齊重溫一下。「我知，所以我未激小你啲囉」(男主角對劉江嘅回應，而劉江只以笑容作回應，當刻冇講任何嘢) 嗱，就係咁喇，呢個表情，唔配講呢啲，仲可以講邊啲呢?呢句對白實在太好用喇，好快就畀人廣泛流傳，就連劉江後來都自己演繹多次，而當時佢亦都變咗紅極一時嘅網絡紅人，唔知幾時到我哋呢?......

(播出Meme: Pablo Escobar Waiting)等咗咁耐，睇嚟都唔會㗎喇。呢個呀叔一出現就知，係齋等喇。呢個Meme係Netflix改編自哥倫比亞傳奇毒臬《Pablo Escobar》嘅劇集。第二季嘅劇情講述主角嘅毒品帝國殞落，佢個人就開始跟住頹，就好似阿輝咁，佢個時畀人飛咗之後呢，一個人行公園、一個人食飯、一個人9企，真係淒涼......

(播出Meme: Best cry ever)嗱，呢個男人就真係慘喇，但係佢並唔係咁簡單。佢叫Rocky，係一個好有料嘅拳擊手，1984年畀世界拳擊協會評為世界冠軍，曾經分半鐘就KO咗Roger Mayweather，即係拳王Floyd Mayweather嘅uncle，真係唔惹小呀佢。但係一剎那嘅料輝唔代表永恆，係佢娶老婆、生埋仔、事業有成之後，佢染上毒癮，因為求勝嘅壓力，佢每打完一場比賽就要開party索K對酒，搞到體質愈嚟愈差，最後仲搞到妻離子散，淨翻佢一個孤伶伶搬咗去貧民窟到生活。正當佢個人又老，錢又冇嘅時候，有個專係紀錄道友生活嘅真人show - 《Intervention》搵咗佢上嚟呢個節目受訪，喺最後嘅環節，節目組好有心咁樣幫佢搵翻15年冇見個2個仔同佢見面，但係大仔好坦白咁樣話佢呢15年嚟都冇盡過做老竇嘅責任，但係佢依然都肯見佢，係因為...... 大仔:「因為我知道我內心的某處...... 我仍然愛你」(→ Rocky痛哭)。Rocky最終喺2019年因中風同埋肺炎嘅併發症已經過咗身，所以下次大家見到呢個Meme都仲笑嘅話......

(播出Meme: Shooting Stars)落地獄啦你班友!冇錯喇，當有啲嘢高速旋轉或者跌緊落嚟嘅時候呢，呢一首洗腦音樂《Shooting Stars》就會響起，本身移動緊嘅物體，就會又落水底，又飛上天，甚至會喺宇宙漂流添。呢首歌係2008年Bag Raiders發行嘅單曲，同年，仲用喺一隻動作反應game Audiosurf裡面添。開頭就冇咩特別嘅，由2015年開始，有人將呢首歌配落唔同嘅畫面。直到2017年有條片叫做Fat man does amazing dive就吸引咗好多人睇，自此之後，就開啟咗Shooting stars嘅玩法，各種「倒地」鏡頭配埋呢首歌，果然係睇人「倒地」最開心......

(播出Meme: Bobby Hill)你睇Bobby笑得幾開心。呢個肥仔表情多多，大家send開massage一定見過佢㗎喇。Singal、Whatsapp、IG、FB、TG、Line、Wechat，唔係，呢個...呢個唔知。而我哋見得最多嘅，就係呢張佛系圖，究竟呢一幕係做緊乜鬼嘢嘅呢?咁就要講下呢一套美國動畫《King of the hill》第4季第18集，呢一集就講到一班僧侶嚟到Bobby嘅社區，話要搵喇嘛嘅轉世，機緣巧合之下睇中咗Bobby，要佢做一個選拔測試。喺呢個時候，Bobby已經有個意中人叫Connie，萬一佢真係被選中，佢就要放棄愛情，令到Bobby十分之糾結，所以佢就喺房祈求自己fail 聽日個 text，呢一吓就係大家成日見到嘅佛系meme喇。不過，我哋都好想分享埋呢一集嘅結局畀大家知，原來都幾妙㗎喎，就係最後嗰個text，個僧侶同Bobby講:「呢一塊布上面，你眼見嘅嘢，都可以揀」只要Bobby揀中上一代喇嘛用過嘅遺物，佢就可以通過測試。Bobby諗咗一陣，好堅定咁樣同僧侶講:「我揀Connie，因為塊鏡上面，我見到Connie」正當大家都議論紛紛嘅時候，大師認同佢呢一個答案，亦都冇再留難Bobby，畀佢離開。其實，佢真係揀中咗上一代嗰塊鏡㗎喎，但係佢又唔真係揀中塊鏡，而係塊鏡照到嘅個條女。嘩呢個劇情，令到我哋都好佩服嗰個編劇，畀個Like佢......

(播出Meme: Rent Rambo)嗱呢個標準畀Like示範，係90年代初期Apple電腦宣傳片嘅其中一幕嚟嘅。呢條片搵咗幾個細路講下用Apple電腦嘅感想，嘩啲𡃁仔十歲都未夠就已經識寫code，畫graphics。最尾畀Like嗰個𡃁仔叫做Brent Rambo，佢用Mac機寫咗封信畀當時嘅Apple CEO，話「MAC RULES THE WORLD」。嗯，睇嚟呢位𡃁仔嘅身份牌，係預言家呀。你睇下而家，有邊個唔係用緊IPHONE㗎?就連熱愛祖國嘅同胞都抵抗唔到IPHONE嘅魅力呀......

(播出Meme: Left Exit 12 Off Ramp)一個急彎就掟過去買。呢一張極速扭車軚飄移Meme，就係形容緊呢一個無慮即抉，好firm嘅選擇喇。查實，佢係一張合成圖嚟嘅，上面嗰個路牌係P落去嘅。而下便嗰條片，係來自一個挪威Youtuber人揸揸下車冇意中影到嘅，於是就upload上網，影嘅tittle就係「如何霸氣駛出高速公路」。而2017年，有網民就Key咗個路牌上去，然後各位街坊就開始瘋狂二創喇，其中一張爆紅嘅創作就喺同年嘅12月31號，路牌左邊寫住「新嘅一年我會好好努力upgrade自己，創造更加多嘅機會呀喇」(A new year filled with new opportunities to better my self and make a difference)，右邊寫住「“HI”~今年未右係喺Reddit share 啲on8+1 meme」(Another year of shitposting memes on Reddit)。於是，呢一個玩法就一路玩到而家喇......

(播出Meme: First Time)喇係咪又估我哋唔到呢?不過有睇上集嘅，都已經唔係first time㗎喇。點解呢個男人畀人吊死都可以咁輕挑嘅呢?其實呢個Meme係出自一部電影《細說當年話西部》，嗱Netflix都有得睇㗎。呢套戲好睇囉，佢係由6個獨立小故事組成嘅西部電影，呢個Meme就係講述主角2度被判絞刑。第一次係因為打劫失敗，但係佢死唔去。至於第2次嘅原因係更加意想不到嘅好笑，所以佢就表現到咁淡定，迎接佢嘅命運喇，個情形就好似格物團隊咁樣，雖然未有女，但係已經迎接緊下一次失戀喇......

(播出Meme: 死神逐間房問候)嗱各位唔好笑，呢個Meme好認真嘅，因為係關乎政治議題，最早喺2013年嘅時候，一個社交平台Taringa入便發佈嘅一張諷刺漫畫圖，內容就講述美國就好似死神咁，逐個國家擊殺，分別有中ioawdhniowdoawndo(放送時故)……，分別有伊拉克、利比亞、埃及同埋敘利亞，用意係批評美國嘅外交政策同埋軍事行動。各位小粉紅同埋billibili偷片嗰班「倒地」，聽到呢到係咪好開心呢?

「食屎啦你!」係喇，呢個就係另一個著名香港Meme，係出自1988年嘅旺角卡門，被譽為最唔王家衛嘅王家衛電影，裡邊張學友對住萬梓良講嘅呢一句「吔屎丫你！」呀學友呢一個咁扭打嘅樣，直情睇圖都有聲呀，於是呢句對白就畀香港人袋住落袋看門口喇，凡係遇到啲人偷片呀同偷Research嗰啲，就可以同佢哋講呀喇。(場外阿輝: 好!完得好!)!?咦係喎完喇喎



勾草
阿木: 嗱嚟到Meme嘅第二集喇，阿輝都有啲經歷，不如你同大家講下。
阿輝: 唔係喎真係好勁喎，我想講翻頭先Bobby嗰個Meme呀，我睇翻嗰一集呢，好高呀嗰集
阿木: 係呀(笑)，你啱啱靜靜地自己睇哂嗰集
阿輝: 睇哂成集呀，叫佢做轉世喇嘛，跟住佢發現原來佢做喇嘛呢係要放下七情六欲，啫係拋棄佢嘅愛人。而喺呢個試驗之中呢，反而佢搵到一啲真理喎，啫係當佢見到地下上便嗰塊布啦，舖咗好多嘢啦，咁佢唔知點揀好啦，佢要揀㗎嘛，跟住然之後佢就見到嗰塊鏡，嗰塊鏡就反映到佢嘅愛人Connie，跟住佢就話: 「我揀呢個，因為我見到佢」。喺佛教嗰個觀念入便呢，啫係成日都會提到鏡呢樣嘢
阿木: 有個教派都會提到鏡㗎喎，有個教派叫「鏡教」，佢有一首......
阿輝: 妖呢啲唔講啦
阿木: 有首歌叫「鏡中鏡」(笑)......
阿輝: 唔係呀...佢真係用作品說話㗎
阿木: 真係用作品說話呀(笑)
阿輝: 係，呢套嘢真係用作品說話㗎。頭先講到就係佛教有時用啲鏡做啲比喻，有句嘢呢就係(以長輩蓮花圖作背景)「身是菩提树，心如明鏡台，時時勤拂拭，勿使惹塵埃」。
阿木: 點解呢而句嘢?
阿輝: 我都唔係好明呀，但係佢就話你個心呢就好似一塊鏡咁，啫係如果你唔去觀照你自己呀，你塊鏡就會愈嚟愈模，愈嚟愈污糟
阿木: 哦!
阿輝: 好多塵，積塵
阿木: 所以要盡力掃!(影射Mirror)掃走啲塵。哦好有道理呀真係
阿輝: 係喇，要盡力掃，諗翻起自己想要啲咩囉，咁你塊鏡就會愈嚟愈清晰喇。就好似呢一集Bobby咁樣，佢望到塊鏡好清呀，佢清就見到自己嗰塊鏡嘅反射就係佢所愛嘅人，阿Connie。編劇就係用咗呢個概念放咗喺呢一個轉折位入便，所以，高!妙!建議大家睇下 (細聲: 喺Biliblili睇㗎)，好多人擺啲片上去，我哋啲片都有
阿木: 係喇，唔知大家對於其他Meme仲有冇其他唔同嘅感受呢?咁你(指阿輝)睇得咁透，睇嚟你失戀呢一關都過咗喇............ 今集，完。