#PSY｜世界仔冇咁專一？3 分鐘測試你會唔會「見鬼講鬼話」面面俱圓係職場、情場必勝法？｜#五分鐘心理學

我哋即刻講到「世界仔」呢個 concept ，或者我可以同大家講下作為一個心理學嘅人，我哋會點樣去處理呢啲問題。就係應該無一個係關於「世界仔」，exactly 係呢三個字嘅心理學研究。而當我哋要探討呢啲文化現象嘅時候，其實我哋會喺心理學上面盡量去揀一個類似嘅概念（理論模型）。而我最近就搵到一個叫 self-monitor（自我監控）嘅概念我發覺佢同「世界仔」呢個 concept 非常之相似。

或者如果大家未試過測試嘅話，我哋都可以一齊去做下測試，睇吓自己係咪一個「世界仔」嚟嘅。基本上測試入面有啲乜嘢問題？就係話佢會問吓你「喺一個唔熟悉嘅社交場合嗰度，你會唔會睇下其他人嗰個 social cues （社交提示）去決定自己嘅行為？」亦都有啲問題去問吓「你會唔會係一個好嘅演員？」，同埋你「係咪無時無刻都係表裡如一？」咁如果喺呢個量表上面，你攞到越高分，你就應該越比較接近一個「世界仔」嘅行為模式；如果調返轉嘅，你（低分）就越唔屬於係「世界仔」。

我自己都試過玩過呢個咁嘅測試，我嘅結果就咁啱搭正喺中間，亦都係「兩邊都唔係」：既唔係好「唔世界仔」，亦都唔係「好世界仔」。

咁其實呢個 self-monitor （自我監控）嘅測試實際上係測試緊啲乜嘢呢？就係測試一個人「有幾大嘅能力同埋動機，透過環境嘅訊號改變自己嘅社交行為」，亦即係佢同「世界仔」嘅一啲概念係非常之相似嘅。普遍嚟講，我哋會將乜嘢叫做「世界仔」？就係「世界仔」會「見人講人話，同埋見鬼講鬼話」，或者例如佢哋會。好識得去睇人嘅眉頭眼喇，跟住再去行動」。咁呢個其實正正就係 self-monitor 嘅概念。

一般嚟講，self-monitor 得分高嘅人同埋 self-monitor 得分低嘅人佢哋最大嘅分別係乜嘢呢？就係佢哋係「用唔同嘅嘢去指引自己行動」。換言之，你可以當佢哋係用唔同嘅compass（指南針）去指導自己行為。

一個 self-monitor 程度比較低嘅人，我哋會話佢係用一個內部嘅感覺，自己內部嘅信念去指引佢自己行為／情感／選擇。我哋會話佢有一個 internal compass （內在的指南），所以例如佢喺唔同嘅社交場合下，點解佢可能表現出嚟嘅行為模式相對上比較類似？就係因為佢多數會依賴自己嘅感覺／信念去選擇自己做乜嘢行為，咁呢個就係一個低 self-monitor 嘅人會做嘢。

但係調返轉，你會發覺一個高 self-monitor 嘅人，佢哋係非常之識得做戲，或者可以喺好唔同場合下展現好唔同嘅自我。原因係乜嘢呢？決定佢哋自己行為或者感受嘅．未必係依賴一啲自己內在嘅指南，而係成個環境點樣運作。咁啱啱嗰句說話「見人講人話，見鬼講鬼話」就最演繹到一啲高 self-monitor 嘅人可能採取嘅行為模式。

咁究竟高 self-monitor 係咪一件好事呢？我諗喺好多指標嚟講都係嘅。包括有一啲研究發現，一啲高 self-monitor 嘅人係能夠有一個比較好嘅非語言社交技巧；比較識得去表達同理解其他人嘅情緒；（比起一啲低 self-monitor 嘅人）得到職場晉升嘅機會亦都係比較多。咁所以可想而知，佢哋多數收入亦都會比較多。而且甚至可能佢哋亦都會有一個比較好嘅領導技巧等等。咁喺呢啲客觀嘅指標上面,其實 self-monitor 往往係有好多強項，因為你諗吓？就係佢有一種好強嘅社交環境適應力，喺一個需要人與人接觸嘅社會入面，當然係會取得好多優勢。

而且亦都有研究發現：高同低 self-monitor 嘅人，其實喺佢哋嘅感情取向上面亦都會有啲分別。例如高 self-monitor 嘅人會傾向會有比較多嘅伴侶，相對上冇咁專一；而低 self-monitor 嘅人，佢哋其實對伴侶專一嘅程度相對上係比較高。對一啲低 self-monitor 嘅人嚟講，佢發展完一段感情嘅時間，同埋佢感情嘅親密程度，某程度上個正向相關會比較大。亦即係低 self-monitor 嘅人，係有辦法透過不斷同其他人去接觸，去慢慢建立一段親密關係 ；而反而高 self-monitor 嘅人，呢個傾向就比較少。咁其實當然係可以理解，因為你會見到，例如我當一個人假設佢有極高嘅 self-monitor ，可能佢會好依賴一啲環境嘅訊號，去決定自己點樣行動。但我哋不妨可以問嘅另一個問題就係「咦咁其實佢嘅『自己』又係去咗邊度呢？」

咁而且類似嘅行為係一啲職場嘅研究亦都有發生。有研究發現「高 self-monitor 同一個人做一啲破壞組織利益嘅行為係有關係」嘅。即係喺一個職場入面一啲破壞組織嘅行為（counterproductive behavior ，簡稱 CPB）CPB 分為兩類：對組織嘅、對人際關係嘅。例如乜嘢係對組織嘅 CPB 呢?舉個例子，例如我當係講大話／專登不去做一啲工作，呢啲就係對組織嘅 CPB 。而對人嘅 CPB 可能有邊啲呢？就係例如我當係欺凌同事，或者例如喺職場上面起衝突咁樣啦。

咁呢份研究發現，一啲高 self-monitor 嘅人，就同對組織嘅 CPB 有一個正向相關；但係對於對其他人嘅 CPB 就無一個正向相關。咁我哋可以點樣理解呢樣嘢呢？就係其實高 self-monitor 嘅人可能會相對上比較重視自己嘅「人設」（人物設定，即對外的個人形象），一般嚟講呢類人係會幾受歡迎，所以佢哋未必會做一啲好直接同其他人起衝突／欺凌其他同事嘅行為，因為咁樣基本上係會破壞咗佢哋自己嘅人設。但係暗地裏面，可能佢哋亦都係未必咁重視一啲價值／忠誠嗰類嘢嘅。故之然佢哋嘅重心可能反而比較多放喺自己嘅 self-gain ，亦即係幫自己去爭取一啲利益嗰度，所以就會解釋到一啲類似咁樣行為嘅發生。而且高 self-monitor 嘅人亦都同誠實同埋謙虛嘅程度，某程度上都有一個負面嘅相關，即係換言之可能佢哋會做得比較多欺騙嘅行為。咁我哋將呢啲種種數據擺埋一齊，其實我哋就好容易睇到一啲現象，例如當好多企業嘅高層可能都係畀人嗰類型咁嘅感覺：講嘢把口攞過油，但係好似未必真係好信奉一啲真實嘅價值，咁呢個其實可能就係 self-monitor 反映出嚟嘅其中一個現象。

咁最後尾我想講少啲 advice 分別畀一啲「自覺係低 self-monitor」，同埋「自覺係高 self-monitor」嘅人去聽嘅。

咁首先話就可以由低 self-monitor 去講起，我諗一般嚟講低 self-monitor 嘅人，如果你真係好低嘅話，我相信可能喺你哋人際關係或者職場入面，的而且確會遇到好多挫折。你可能心入面有啲好強嘅信念，好想去表達出嚟，但係點解覺得好似個世界硬係唔明白我／唔聽我講嘅呢？其實你好容易有咁嘅感受。因為如果你係低 self-monitor 嘅話，你嘅行為方針好多時候係基於一啲自己內在嘅價值／信念／情緒，而你冇足夠接收一啲社交嘅訊號，導致呢樣嘢去放畀世界嘅時候，其實往往係一個好大嘅衝突。當然 self-monitor 可能都係一個幾根深蒂固嘅心理特徵，但其實我哋可以不妨去注意呢樣嘢：既然你知道自己行為模式，可能好多時候都係源自於自己嘅信念，決定自己點樣行動。咁其實之後你反而可以試下去轉自己嘅注意力，就係例如我當一啲社交場合／要同人相處嘅情境入面，試下將你嘅注意力放多少少喺其他人，而非自己內在嘅狀態。

我一開頭喺睇 self-monitor 呢個概念嘅時候，我以為佢同 self-awareness（自我覺察）係有一個正向嘅相關（positive correlation）。但係之後我發覺原來有一份研究指出，原來一個人嘅自我覺察程度（self-awareness）同 self-monitor 反而係一個 negative correlation 喺度。 咁樣嘢令我幾驚奇，原來反而嗰啲社交能力比較好嘅人，佢自我覺察嘅程度可能反而仲係低過一啲低 self-monitor 嘅人。原因就係可能其實一個好高嘅社交能力，可能未必直接係依據喺自己嘅自我覺察嗰度，而係佢哋嘅注意力去咗「成個環境發生緊乜嘢事」。換言之就係內在心境提供一啲訊號畀你，定係外在環境提供一啲訊號畀你？咁如果你發覺自己嘅 self-monitor 好似好低，不妨去建立一個習慣，就係喺唔同嘅情境嗰度，試下將多少少注意力放喺身邊嘅人身邊嘅事身邊嘅環境嗰度，咁樣可能都會幫你處理一啲要面對人嘅情況，處理得更加順利。

咁但係調返轉對高 self-monitor 人嚟講，又有乜嘢建議或者有乜嘢可以分享？我諗其實呢個某程度上係一個禮物嚟嘅，就係可能喺好多嘅情境對你嚟講生活好如意嘅，相信你會好有一個技巧去處理唔同類型嘅社交關係。咁但係例如我當睇得呢條片可能都對自己有啲追求嘅，啱啱我講過一啲相對上高 self-monitor 嘅黑暗面，我哋可以點樣去避免呢啲黑暗面？咁我暫時喺網上又冇睇到一啲好詳細嘅研究去講呢樣嘢。咁但係呢個議題令我諗起一條片，就係講關於一啲美國嘅間諜究竟係點樣揀選？咁美國嘅間諜我相信係必須要有一個極高嘅 self-monitor ，因為佢基本上係要完全偽裝一個另外嘅身份。而呢條片入面嘅訪問對象都講過一句，就係「當我哋揀間諜嘅時候，係需要一個好強嘅人格魅力。其他嘢之後都可以授予，但唯獨係人格魅力係與生俱來（不能由教育而得）。我諗呢個其實係一個高 self-monitor 嘅特徵。

但係呢條間諜嘅片同時有講到，就係其實呢啲間諜佢收嘅利益唔係特別多，佢嘅人工同其他幫美國政府做嘅人其實都係差唔多，換而之未必係為咗金錢嘅利益。而且佢哋嘅處境亦都係好危險，佢講話成一段時期俄國係處決咗佢哋十幾個同儕。而且佢哋係放棄咗好多自己嘅社交生活去維持間諜嘅身份。點解呢群間諜會咁樣做呢？其中一個可能嘅原因就係因為佢哋對美國嘅國家嘅一種忠誠，佢想透過自己能力同埋身份去報效呢個國家。呢樣嘢未必係單純係自己嘅心理特質，即係 self-monitor 係一種心理特質，但係其實嗰個心理學角度，我哋話係一個關於人生嘅故事（narrative），亦即係搵得個好清晰嘅訊息／願景，點樣好好咁去用自己呢個比其他人好嘅 self-monitor 嘅能力。

一個心理學家叫 Anno Lavarus 佢都提出過一個叫 authentic chameleon （真誠嘅變色龍）嘅概念，呢個就係喺個治療手記入面發現。當佢對住唔同嘅治療對象，如果佢能夠令到嗰段治療關係，好對應到嗰個當事人嘅需要嘅，其實會令個治療更加有效果。而達到呢個效果我相信亦都牽涉需要一定程度嘅 self-monitor ，因為 self-monitor 就係能夠去攞環境嘅訊號，願意同埋有能力去改變自己嘅行為，而無論如何呢樣嘢都係真誠，都係為咗當事人嘅利益去著想。換言之如果你有一個高 self-monitor 嘅狀態嘅話，呢個當然係一個禮物。但係可能如果你想做一啲有意義嘅事，係要喺呢個能力之外真正搵到屬於自己嘅信念。

我哋今日嘅《五分鐘心理學》就差唔多講到呢度啦。我哋下次再見，拜拜！