☠️ 認識閻王地獄的架構，何謂十殿，十八層地獄又有何刑罰？｜格物冷知識｜格物致知

因為各大經書所記載嘅內容都唔同，佢哋有唔同嘅世界觀，有啲就話喺好深好深嘅地底、有啲就話喺好高好高嘅山上面、有啲仲話喺世界盡頭之外，真係一日唔死都唔知。「佛說十八泥犁經」裏面嘅世界觀，地獄係有分冰同埋火嘅。火地獄即係喺地心同埋地面中間嗰層，寒地獄即係喺二千里高嘅山群之中，嗰度烏雲密佈不見天日嘅。另外，「大樓炭經」嘅世界觀覺得地獄係屬於人間以外嘅地方，而人間係被鐵造嘅山包圍住嘅，外圍再被一層更大嘅鐵山圍住 ，而地獄就喺兩大鐵圍山之間嘅陸地上面。《佛說立世柯毘曇論》嘅世界觀 覺得地獄並唔喺地球入面嘅，而喺地球對落二萬由旬嘅位置，乜春野由旬呀喂？由旬呢係古印度嘅量度單位，即係一隻公牛一日可以行嘅路程，大約11.2公里，所以二萬油洶即係22.4萬公里，嗰度就係無間地獄喇！所以單係佛教嘅地獄已經有好多版本喇！不過大家最熟悉嘅就梗係閻羅王喇！以下落嚟將會係今次獄蒲團嘅戲肉，我哋會落去昅一昅。今舖真係獄窮千里目，更落一層樓。

各位團友好聲行呀！呢度就係鬼門關喇！唔俾影相㗎！小心啲喎！呢度其實係一間好大嘅陰間公司嚟嘅，簡稱陰公，所以做人真係無陰公嘅！人間過咗身之後呢，呢度就會派出實Q即係我哋所講嘅黑白無常，咁就會上去人間帶佢哋嘅魂魄落嚟呢度鬼門關喇！咁一班Junior就會出嚟接應㗎喇喎！咁就負責執頭執尾呀點齊名呀帶佢哋過關呀咁樣啦！冇錯喇！呢班人就係牛頭馬面呀！所以陰間同人間係一樣，初級職員都係做牛做馬姐。

唔講咁多先啦！咁就行過嚟啦跟緊啲啦咁我哋即將過鬼門關㗎喇！過鬼門關之後呢淨係得一條路嘅姐就係黃泉路喇！呢條路直接貫通咗成個地府，沿路係有十個殿，即係呢度嘅十個審判部門呀！每個部門入面都有十六層小地獄，因應你嘅罪孽睇下點樣招呼你。側邊呢一啲呢你唔好踩到呀嗰個，呢啲紅色花叫彼岸花。咁離遠睇呢就好似成條血路咁喇！襯返成個地府啦！夠曬陰森嘅！所以呢度亦都俾人叫做「幽冥之路」。嗱！各位呢度可以影相嘅咁隨便啦！但係嗰個⋯⋯喂！嗰條友你唔好屙尿先得㗎！

順便講講呢間陰公嘅架構啦！呢度嘅CEO叫做閻羅王，即係大閻生呀！佢嘅原型係古印度神話之中掌管陰間嘅天王叫做琰摩羅，意思姐係「縛」呀，姐係束縛有罪之人。傳入唐朝之後就成為閻羅大王掌管陰間輪迴啦！嗱大閻生只係CEO嚟嘅啫！真正做嘢嘅就係頭先講嗰十個審判部門，每個部門都有一個Manager亦都稱為十殿閻王，姐係細閻生呀！嗱佢哋本身都係凡人嚟嘅，不過佢哋每一個都有強烈嘅特質，俾人招攬入嚟呢間公司做判官，例如第三殿嘅負責人叫做宋帝王，本身好有雷嘅所以佢就專門喺度審判背信棄義嘅罪行。好啦咁我哋參觀下啲殿啦！

第一個殿中間有一個「孽鏡台」上面有一座好大嘅銅鏡，新嚟報到嘅魂魄呢就一定要入嚟照照鏡先嘅。因為呢塊鏡可以照到死者生前做過嘅嘢，無論好事壞事，全部都照得出。如果呢個人一啲罪孽都無呢就會直接Send佢去極樂世界。善惡參半呢？咁就會按照罪孽嘅程度直接送佢第十殿投胎，進入六道輪迴。如果你壞事做得多啦話，咁之後逐個殿就會慢慢同你計㗎啦！第二殿就係審你有無騙人塊地、傷人個鼻。第三殿就係審你有無欺師滅祖、背夫勾佬。第四殿就係審你有無專騙人錢、走私金鏈。嚟到第五殿啦！呢一度就巴閉啦！相傳呢一度嘅話事人呢！係包！青！天！呢一度專門審你有無視因果、 阻人救火嘅！呢一邊呢就有一個打卡位呀！大家可以過一過去啦！呢一度叫做「望鄉台」，魂魄可以喺呢一度睇到自己人間子孫嘅現況，俾你知道你種下嘅善惡有無報喺佢哋身上。然之後就嚟到第六殿啦！呢一度就係審你係咪無業遊民、怨天尤人。呢一度仲有一個地方好貼心嘅叫做「枉死城」因為突然意外而死，陽壽未盡嘅人係無得接受審判嘅。但係啲鬼魂都落咗嚟，咁就唯有喺呢一個枉死城繼續陽間嘅生活，用埋你本身嘅壽命直至你自然死亡，先至正式再接受審判嘅。好啦！我哋繼續行啦！第七殿就係審你有無搬弄是非、拐人嘅Babe。第八殿就係審你有無孝順父母、得閒祭祖。第九殿就係審你有無殺人放火、強姦販毒。睇完呢九個殿係咪即刻好想做返啲行善積德嘅嘢呢？歡迎Subscribe格物同埋叫人Subscribe格物，功德無量呀施主！

離開第九殿進入第十殿之前，先要見一個女人嘅！佢去到81歲都仲係Keep住處子之身，而且外貌依然係童顏。無錯啦！呢個人就係孟婆！飲過孟婆湯就會清空哂你今世嘅記憶，然之後就會進入第十殿準備輪迴。嗱！呢度唔俾入㗎啦！不過我可以話過你聽嘅呢個殿入面有六道橋，分別係金橋、銀橋、玉橋、石橋、木橋同埋奈何橋。佢哋係分別對應住天道、阿修羅道、人道、畜生道、餓鬼道、地獄道。所謂嘅六道輪迴就係呢一道最後嘅審判結果，睇下你最後係去邊一道輪迴投胎。過完條橋之後呢記得講聲 Thank you！

各位肉蒲團友團友，嗱！地府嘅參觀完啦！我哋下一個節目係睇獄世界！正話我哋參觀完黃泉路，家陣又正式帶大家深入地獄睇睇佢哋嘅刑罰係幾咁淒厲。未落到去都聽到慘叫聲，大家做定心理準備，想試玩嘅可以拎張form先，心臟病、高血壓、孕婦兒童，請迴避！其實佛教嘅地獄並唔係統一地獄，佢哋連層數都唔同，四層又有，八層又有，十層又有，十六層都有。頭先講嘅十殿，佢哋各自都有十六層嘅地獄，而日本就有【水地獄】啦！

而我哋今日帶大家睇嘅就係「佛說十八泥犁經」提到嘅十八層地獄。呢度只有絕望同埋煎熬，佢嘅一日等於人間嘅三千七百五十年。每後一層嘅地獄受嘅痛苦就會多二十倍，刑期會多一倍，所以啲人話第十八層係無間地獄就係咁解啦！

第一層拔舌地獄，你哋講人是非、講大話、嘴蕉蕉、串柒柒，就會落嚟呢度受苦。一班鬼差會撬開你個口，用鐵鉗活生生夾你條脷出嚟。但係佢哋唔係就咁拔出嚟嘅，而係慢慢慢慢咁樣拉長，一路拉到你條脷嘅肌肉撕裂，爆開一個個傷口再喺上面灑鹽。

第二層剪刀地獄，呀！亂咁幫人做媒人、教唆人出軌就會落嚟呢一個剪刀地獄 ，即係會剪咗你條手指。所謂十指痛歸心，佢哋會逐隻手指剪落嚟，唔好以為剪完就完喎！你啲手指會生返出嚟，然之後再剪過。

第三層鐵樹地獄，凡係離間自己屋企人導致家庭不和嘅就會落嚟呢一個鐵樹地獄。呢度全部都係一棵棵嘅樹，但係上面嘅樹葉就變哂做刀片。受刑者需要喺呢度不斷爬樹，爬到手穿腳損、腸穿肚爛，甚至戒爆春袋都要繼續爬。玩我呀 變眼仔！

第四層孽鏡地獄，呢一個地獄係無刑罰嘅。佢嘅功能就係照哂你深層嘅罪孽出嚟，再轉介你去相應嘅地獄接受懲罰。唔好諗住隱藏到你嘅罪行呀！因為喺孽鏡面前，就算你喺超級市場手多多擰爆啲薯片佢都知呀！

第五層蒸籠地獄，屈人、鬧人、篤人背脊就會受蒸呀！講緊嘅就係呢一度嘅蒸籠地獄，受到高溫乾蒸之苦，會由Rare蒸到Well Done 然後再嘆凍恢復你嘅身體，再由Rare蒸到Well Done甚至Over Cook，然之後Good Job！呢一個就係慢煮人肉啦！

第六層銅柱地獄，蓄意放火就會落到嚟呢一個銅柱地獄。喺呢一度你要剝哂衫 攬住一條直徑一米既銅柱，然之後柱裏面會燒炭火直接整一條人肉串燒。

第七層刀山地獄，鬧動物、殺動物嘅人就會落到嚟呢一個刀山地獄，永無止境咁樣爬刀山。爬爬下你又冇一隻腳㗎啦，再爬爬下手都冇埋呀！最後你就會得返個頭繼續爬，爬到上去之後你仲要落返去執返啲手手腳腳，跟住再爬返上去 跟住又冇一隻腳啦！

第八層冰山地獄，如果大家覺得最近天氣太熱可以嚟到呢一個冰山地獄。呢度會終日赤裸瞓喺冰山上面，全身凍傷，你一郁就會成塊皮扯落嚟。你一流血就會即刻結冰，你再郁就會再扯多塊皮落嚟，再流血、再結冰、再郁再扯、再流血，留喺呢度嘅條件就係不守婦道，惡意墮胎嘅女人呀！

第九層油鍋地獄，賣淫嫖妓嘅金魚佬同埋搶人家室嘅強盜，歡迎嚟到油鍋地獄。喺呢度會直接將個人掟落油鑊到炸，平時俾油彈到都會痛到意嘩鬼叫嘅，而家仲要揼埋落個咁大個油鑊到炸，今次真係大鑊啦！

第十層牛坑地獄，虐待動物嘅人會落嚟呢一個牛坑地獄，跌入個坑裏面然之後無數隻牛就會衝過嚟頂爆你個肺、踩爆你個胃、撞甩你副計，你就唔會有一個完整嘅身體。

第十一層石壓地獄，殺BB仔嘅人會落嚟呢一個石壓地獄，受刑者會瞓喺一個石槽裏面。天花板會吊住一嚿巨石，你唔知道嗰嚿巨石會幾時跌落嚟，喺無盡嘅恐懼之下BOOM你就死咗啦！然之後就會無限loop呢一個動作。

第十二層舂臼地獄，食飯講粗口同埋啲食剩嘢呢，就會落到嚟呢一個舂臼地獄㗎啦！跟住扔你落個樁度啦！跟住呢個係咁鐘係咁鐘！跟住鐘爛曬之後再砌返啦！嘩痴線喎呢個刑罰真係！食埋冷飯先！

第十三層血池地獄，呢一度嘅血全部都係經血同埋分娩時候嘅血，不孝之人就會落入嚟呢一度日日浸住呢一啲血，好好反省一下十月懷胎嘅痛苦。姐係點呀？姐係將呢條不肖子塞返落你老母嘅#@度呀！

第十四層枉死地獄，自殺嘅人唔好諗住好快就可以投胎，因為你會嚟到呢一度受540億年嘅監禁。呢一度只有虛無。每日就係思考人生，諗真啲活著嘅意義呀！

第十五層磔刑地獄，起人屍首真係好唔尊敬，呢啲人會落入磔刑地獄，姐係凌遲呀！有關凌遲呢個刑罰我哋喺中國酷刑嗰集有詳細嘅解釋，有興趣嘅朋友可以睇一睇幫我哋查查view！

第十六層火山地獄，穿櫃桶底、行賄受賄，同埋啲破戒嘅和尚就會落入嚟呢一個火山地獄。你會被扔入火山之中唔會燒死，但係每一刻 都會感受到火燒嘅痛楚，而且係冇得放break㗎！

第十七層石磨地獄，貪贓枉法、欺壓百姓嘅人會落入嚟呢一個石磨地獄。呢一度係舂臼地獄2.0，會由你隻腳開始磨起，你一路望住自己慢慢被磨成肉醬，然之後佢哋會恢復你嘅身體，再重複以上步驟。

第十八層刀鋸地獄，終於嚟到最尾嗰層啦！呢一層統稱阿鼻地獄，即係無限輪迴永無止境嘅刑期。十惡不赦嘅人就會落入嚟呢一個刀鋸地獄，即係剝曬你啲衫大字型咁樣將你倒轉吊喺碌木度，由胯下開始鋸起，一路鋸到個頭度你都唔會死，你淨係會感受到無比嘅痛苦。而呢一種痛苦係會持續到永遠，永遠即係幾耐呢？你永遠都唔會知。

關於地獄呢！阿輝都有啲經歷不如你同大家講吓呢！大家知唔知呢其實人間都有個地獄，我仲知道佢嘅確實地址喺邊度，就喺旺角西洋菜南街麥當勞（百老 匯戲院對面）樓梯落一層嘅廁所。我經歷咗咩叫地獄，行到落去嗰度門已經出事，係一個鬼門關好多漬喺度門度，當你入咗去之後又會見到一條黃泉路。喺你前面因為地下全部都係尿，漬起咗你見到一陣面喺度，地下有好多唔同顏色嘅彼岸花，有啲屎漬同埋有啲唔知有血漬嘅紙巾扔咗落地下。咁我就閉住氣一路去廁所，柯柯吓就會發現有啲牛鬼蛇神喺度。唔好笑好認真嘅！你會發現有啲牛鬼蛇神喺度，有個阿伯喺度打飛機，廁格入面呢傳出一啲聲音，有女人聲添既，喺一邊應該係有人受緊苦喇！閉完氣嗰30秒呢你就要衝出去門口喇！但係呢個係最難過嘅一關，因為呢你出去呢係要用手拉開嗰個門柄你先可以出到去。唔知大家對於呢個廁所係咪都有好深刻嘅經歷呢？今集完！我哋下集再見！