21/4 《圍爐取戀》 兩隻貓幫我溝到個老婆

東方昇：我冇呢種情況啦，但我有類似，我係好欣賞我女朋友對動物嘅愛心，佢呢樣嘢係征服咗我嘅。因為本身佢係一個好__粗魯嘅人嚟嘅，但佢對啲貓點呢？對動物就好有愛心，跟住我覺得，呀佢會唔會對我都係咁？原來唔會嘅！
眾人：哈哈哈
Kneta：呢樣嘢咪就係引證返，即係女人就算幾暴躁，但係對住小朋友同動物呢，都一樣係非常之有母愛嘅。
東方昇：你有冇啲經歷呢？

Terry：我經歷冇呀，我啲貓係我同女朋友一齊之後先領養。
東方昇：哦，一齊之後先領養嘅。
Kneta：四隻喎！
Terry：四隻呀，四隻全部都係。
Kneta：好勁呀！
東方昇：咁你哋兩個咁啱都係鐘意貓，所以咁樣嘅。
Terry：本身諗住睇吓貓㗎咋，跟住咦睇睇吓咁得意嘅，就接一隻返嚟望下先囉。跟住就養吓一隻又兩隻，跟住就變四隻。
東方昇：即係嗱，有啲基督徒就會話搵另一半一定要係基督徒啦。
Kneta：係，或者係有信仰啦。
東方昇：係，我哋養貓嘅，如果對方係好唔鍾意，佢一定唔准你養貓㗎喇，你會點呢？
Terry：但如果我養貓嘅時候啦，我本身有養啦。之後我識咗呢個女朋友，跟住佢話好唔鍾意喇，即飛！
東方昇：Bye！
Dickson：唔係唔係，你講飛隻貓定係飛女朋友先？
Terry：梗係飛女朋友啦，你可以唔鍾意我，但係你唔可以唔鍾意啲貓。
Dickson：我澄清咗先，嗱我呢係鐘意貓嘅，但我唔敢養啫。
Kneta：係，我明嘅明嘅，責任嚟嘅。
東方昇：反而我會覺得，因為我唔想有小朋友，所以我覺得貓係緊要㗎。
Kneta：啊！寄託落去。
東方昇：係呀，代替咗嗰個小朋友嗰個角色呀。
Kneta：咁有冇諗住養多幾隻，代替多幾個小朋友？
東方昇：可能會呀，因為蚊滋勁得意，咁養多幾隻，我有呢個諗法。

東方昇：喂好，咁我哋睇下今日呢個case係點樣因為寵物而結緣喇？咁我哋有阿Steven同埋Yvonne，你好！
Steven：Hello！
東方昇：你哋係兩個一齊打上嚟，因為你哋就係因為寵物而一齊咗㗎係嘛？
Steven：係呀。
東方昇：喂咁講你哋嘅寵物嘅愛情故事嚟聽吓先。
Steven：我哋...係因為養貓，跟住都係交友App度識嘅，咁但係最主要係因為一開始我哋就傾關於貓嘅嘢。
東方昇：哦～我冇玩交友Apps，但係我知道呢，好多人喺交友Apps嗰度呢，就唔係擺自己嘅樣呀，擺架名車嗰啲啦，但係呢啲都令到大家覺得好拜金呀。咁有一種方式呢，就係擺自己隻貓喺度嘅，你哋係咪嗰啲人先？
Steven：係呀 我...
Terry：招數嚟嘅！
東方昇：你都幾老實喎，咁所以你就有話明你係鐘意貓嘅，搵異性同你傾貓嘅。
Steven：可以咁講啦。

東方昇：哦，咁我想問阿Yvonne，係咪因為呢樣嘢而覺得好似啱嘴型咁樣呢？
Yvonne：係呀，因為我本身自己冇養寵物。
東方昇：哦，但係你都鍾意貓嘅？
Yvonne：係呀係呀！
東方昇：嗯～咁你哋點樣講貓呢？
Yvonne：因為嗰個交友app呢，佢係冇相嘅，咁所以我哋係交換咗telegram之後，我見到佢個icon係一隻貓，係一隻貓貓嘅肉球。
Kneta：肉球不滿。
Yvonne：係呀，跟住之後先同佢開始講貓。

東方昇：其實呢個真係好好講嘅，即係尤其喺網絡呢，如果唔係你就問對方你做咩呀？你幾多歲呀？
Terry：都有啲尷尬。
東方昇：好鬼尷尬㗎嘛，一講貓就自然㷫烚烚。Dickson：咦，你好似有隻貓喎，好得意喎，你養咗佢幾耐呀咁樣？
東方昇：係咁樣㗎嘛，係嘛？
Yvonne：係呀係呀！
東方昇：嗯，跟住阿Steven就不斷出隻貓嚟溝女。
Dickson：啱喇，啱位呀！
Steven：有個位喎，就入㗎喇。
Yvonne：係呀，佢成日send啲貓貓相過嚟
東方昇：哦，Steven係咪特登㗎？
Steven：都算係嘅，因為知道佢都鍾意貓，咁就係要畀佢知道，呀我有隻貓好得意㗎！
Kneta：係咪好吸引呀？
Steven：分享畀佢睇，等佢對我有啲印象分。
東方昇：感覺上呀好有愛心呀，係咪呢阿Yvonne？
Yvonne：係呀，即表面上好似好有愛心嘅一個男人。

東方昇：嗯，我想問女仔係咪真係覺得養寵物嘅男仔，係有啲特別嘅好嘅特質呢？
Yvonne：我覺得係會相對有耐性囉，同埋比較溫柔。
東方昇：嗯～即係有呢啲好嘅嘢。咁有冇曾經有一次約會，阿Steven係搵阿Yvonne上嚟睇貓先？
Steven：哈哈哈！
Terry：嘩，笑到咁，係咪有先？
Yvonne：第一次上佢屋企...
東方昇：第一次就係，哦，仲諗住第一次都係出嚟食飯，第一次就係睇貓…
Steven：唔係唔係…我哋即係叫做一齊咗冇幾耐，咁跟住我就話，呀可以上嚟睇。
東方昇：我明我明，即係食飯就照食飯，但上屋企呢，就係貓喇。即係唔係Netflix and Chill，係Cat and Chill 咁樣嘅。
Steven：係喇，當時我仲有兩隻貓，咁所以就即係畀佢睇下咁樣。
東方昇：嗯～咁呀女仔又放下戒心啦。
Yvonne：係呀，就畀佢呃咗上去。
眾人：哈哈哈！

Dickson：我反而想問喎，譬如如果個男仔同你講話就咁叫你上嚟，可能話不如你上嚟坐吓睇吓Netflix，或者飲吓咖啡吖，係咪會覺得突兀啲？但係上嚟睇貓，就突然之間好似係另一樣嘢咁呢？
Yvonne：係囉，如果係Netflix嘅話就好似呃你上去咁，但如果有貓好似，個性質好似唔一樣，好似單純一啲。
Terry：嗯，所以呢個係養貓嘅好處。
東方昇：我想問Terry，你隻貓會唔會見證過你好多女朋友呀？
Terry ：冇x3！
東方昇：隻貓認得唉又係呢啲女仔。
Terry：嗱，Steven有冇先？
Steven：冇x3！
Kneta：死都話冇㗎啦！
Steven：真係冇。

東方昇：哦，咁嗰日就真係睇貓？
Yvonne：係囉，睇貓同睇戲。
東方昇：哦，都有睇戲嘅。咁嗰日你真係見到貓，其實都幾開心吖係嘛？
Yvonne：開心呀，因為佢啲貓都好親人囉。
東方昇：哦，係係係，即啲貓都好幫手。
Kneta：呢啲係要訓練㗎！
東方昇：咁即係咪你哋好多話題都係圍繞住啲貓呢？
Yvonne：一半一半囉，因為我哋都好快同居。
Kneta：你唔使咁尷尬，因為我都係咁嘅。
東方昇：係係，佢都係呀。

東方昇：我問過其他幾位啦，阿Steven 嗱如果你嘅另一半係好憎貓嘅，你會唔會揀佢做你另一半呢？
Steven：我諗應該唔會一齊㗎喇，因為我覺得貓都係我嘅生命之一。譬如有好多朋友成日都會問我，喂點解你身上咁多貓毛嘅？我都會同佢講，我有貓我自豪呀！
東方昇：嗯，啱唔啱呀，好典型嘅貓奴。我都係喎，永遠衫呀都會有毛，所以大家都係，其實養貓嘅人呢，如果另一半係唔鍾意貓，其實真係...
Terry：一齊唔到㗎。
東方昇：不能行埋一齊！

東方昇：咁後尾發展成點呢？你哋同啲貓貓…
Steven：我哋後尾就...頭先都話啦，佢初初嚟我度就兩隻貓，佢嚟咗我屋企住之後呢，我哋就再養多咗一隻貓，咁就叫做金寶。咁就即係好似係我哋兩個嘅一個好似愛情嘅小結晶咁樣，就睇住佢成長囉而家。
東方昇：咦咁我想問Yvonne喇，本身係冇養貓㗎嘛，因為其實呢，真心鍾意去撚人哋啲貓呢，同真係要養貓，要鏟屎呀、跟住有時會瀨尿、跟住會爪人呀，係唔同㗎喎。
Terry：咬電線呀，好多乞人憎嘅嘢。
東方昇：係呀，你O唔OK呢Yvonne？
Yvonne：因為我本身有潔癖嘅…
東方昇：嘩，咁仲大鑊！
Steven：鏟屎嘅嘅動作全部都係我自己做返！
Yvonne：咩呀，我有鏟㗎！
眾人：哈哈哈。
Kneta：嗱嗱，嚟啦嚟啦…
Dickson：即係你有嘗試嘅。
Yvonne：你唔喺屋企係我鏟㗎！
Steven：哈哈哈，係係係。

東方昇：所以其實Yvonne本身都有潔癖，其實驚驚哋呢啲嘢嘅，咁你都要有段時間去接受㗎喎。
Yvonne：係呀我都用咗...一兩個月囉。因為一開始金寶嚟嘅時候會喺張床度痾尿。
東方昇：呀～係係係！
Yvonne：咁試過半夜喺我側邊痾尿，跟住我就畀佢痾醒咗。
Kneta：嗯~聽到吱吱聲呀！
東方昇：其實鏟屎都難頂，但係都頂得到，但係其實喺張床痾尿都...
Kneta ：頂唔順㗎！
東方昇：真係頂唔順㗎！
Kneta：咁我想問你有冇試過，即係因為呢啲寵物啦，而引發一個爭執呢？又點解決呢？

東方昇：嗱，我會有嘅，就係有時我另一半鬧我唔鏟屎。
Kneta：懶，話你。
東方昇：係呀，多數即係可能佢返咗工先啦，跟住我遲啲返工啦。跟住我...有時我忙趕住出門口咁，啲屎未鏟啦。跟住佢返到嚟見到有屎未鏟就會話我，做咩唔鏟屎呀？跟住我就會話咁我出門口佢未痾吖嘛！其實...哈哈哈…
Terry：已經乾晒喇。
東方昇：咁我都會有呢啲嘢嘅，咁你哋有冇呢啲呢？
Yvonne；我哋冇喎，係嘛？
Steven：好似係冇喎，冇乜拗撬嘅我哋關於寵物。最多可能會問我，即係金寶啲毛呢，佢係長毛嘅。咁上年就有啲熱嗰啲時候呢，咁就...呀帶佢落去剪毛啦。然後我就呀剪呀剪，就拖吓拖吓，拖到冇剪咁樣。
Yvonne：係呀拖到今年夏天都嚟。

東方昇：哦～對於點樣打扮隻貓嘅一啲一種...
Kneta：小情趣啫，唔係爭執嚟嘅。
東方昇：但其實呢啲都有嘅，如果兩個都係有養貓，即係同湊仔一樣啫。有啲係好縱佢，有啲放任嘅，如果兩種湊法唔同呢，其實係會有啲衝突㗎喎。
Kneta：所以我覺得分工好緊要囉，即係even係照顧隻貓啦，或者係湊嘅貓嗰個方法，都可以各取所需囉。
東方昇：我想問吓喇，嗱，除咗貓係可以即係撮合一啲情侶之外呢，其實喺啲鬧交嘅情況呢，貓都幫到手㗎。因為如果鬧咗交之後呢，唔夠膽同對方講嘢，咁咪攞隻貓嚟打破嗰啲冷戰。你哋有冇用貓去做呢啲咁嘅潤滑劑呢？
Steven：我有呀，通常會捉住隻貓，哎呀阿媽咪唔開心呀，媽咪發脾氣呀，快啲上去氹吓佢啦咁樣。
Terry：跟住然後你見到隻貓又真係嬲唔落。
Kneta：唔嬲隻貓囉，但繼續嬲爸爸。
係喇，唔嬲隻貓，佢又會攬住隻貓，哎呀佢衰呀Steven：佢討厭呀，跟住然後就繼續鬧緊我呀。
東方昇：Yvonne係咪受呢啲嘢呀？
Yvonne：一時時啦。
Dickson：今次我撐Yvonne呀理性呀，嗱因為有時我見你哋呢，一有動物或者好可愛嘅情況呢，你哋就好似冇咗理智呀，忘記咗件事情嘅本身呀。但Yvonne呢一點，嗱 OK！

東方昇：跟住後尾你哋嘅故事發展成點呢？
Yvonne：跟住後尾...舊年十二月我哋其中一隻貓年紀大跟住過咗身啦。係囉平安夜嗰陣過咗身，跟住就...嗰陣都喊咗好耐。
東方昇：嗯，呢個都係嘅，如果隻貓過咗身呢，一個人承受其實好鬼慘！
Kneta：係呀，係係係。
東方昇：即係有兩個人其實好啲㗎。
Kneta：難聽啲講句呢，其實係大家有一個共同嘅經歷，即係大家互相扶持呀，為呢一段關係，即係加深咗囉。
東方昇：我就好啲，我未經歷動物過身，嗯，暫時未經歷。
Kneta：好傷心呀。

Yvonne：因為本身十二月仲有即係其他嘢發生咗啦，即係本身已經好唔開心㗎喇我哋，跟住加上隻貓貓鬼妹又走咗，跟住所以嗰陣成個星期，成個星期個心情都好差咁樣樣。但係佢又喺同一個星期，佢又喺廿四號嗰陣求婚。
東方昇：哦，點解揀呢個時機呢阿Steven？係咪覺得要珍惜眼前貓同珍惜眼前人呢？
Steven：都係嘅，其實你而家問返我，我都唔係好記得係咪真係廿四號。
Yvonne：係呀！
Terry：喂呀，喂求婚喎，打死都話係，就係廿四號！
東方昇：但係你嗰刻，點解喺嗰個moment求呢你覺得？
Steven：珍惜眼前人好緊要啦，即係我都想佢感受到，其實...即係大家喺呢段時間經歷咗好多嘢，咁我都好重視佢，重視對方咁樣，咁所以...就揀咗嗰個時刻囉。
東方昇：唔係，的確係，因為始終大家對啲貓呀，啲寵物都係好似親人。
Kneta：係呀！
東方昇：即係佢離去咗，其實你會更加覺得要珍惜現有身邊嘅人，呢個係的確係好現實嘅情況。
Terry：嗰刻你係會冇心情諗呢啲嘢吖？定係其實你都應承咗呢？
Yvonne：因為嗰陣個心情都好大起大落啦，跟住佢嗰陣，即係成個情景就係佢叫我自己落床搵聖誕禮物。跟住我落床搵，之後就搵到隻戒指，跟住佢就喺張床上面瞓住喺度同我求婚囉。
眾人：哈哈哈。
Dickson：咁你當下你嘅心情係點樣？
Yvonne：佢講咗一大堆嘢，嗰陣都好感動囉，跟住所以就應承咗佢。

東方昇：嗯，咁我想問一個問題就係，即係你哋同你啲寵物，你覺得經歷咗咁多啦，最難忘嘅moment係乜嘢？
Yvonne：有一個搞笑啲嘅都算難忘，上年夏天嘅時候，跟住嗰陣金寶好似未夠一歲。跟住佢係長毛貓嚟嘅，跟住佢有時候痾完屎之後呢，啲屎會吊住咗喺pat pat嗰啲毛。
Steven：同埋因為啲屎比較軟身呀，咁呀跟住佢又周圍走喎。咁你知周圍走變相周圍high，同埋好臭啦，咁我哋就會take care佢，點樣幫佢清潔啦，咁我哋又會幫佢剪走pat pat啲毛呀咁樣。嗰段時間其實唔係一日半日，係可能係keep住一個禮拜兩個禮拜都係咁樣，咁我哋就會兩個都更加close囉。
Kneta：係，有個默契。
東方昇：係，我都諗起一個，我有一個moment我覺得我同女朋友同隻貓都幾sweet嘅。就係呢每次呢，剪隻貓嘅指甲呢，因為一個人係好難剪嘅。
Kneta：係呀係呀！
東方昇：咁呢就要呢，多數就我女朋友就抱住，跟住我就要呵住隻貓，跟住呢佢就會剪，呢個moment真係我哋貓奴先會有嘅。

Dickson：所以下一個問題我就想問喇，嗱，有冇一刻你試過妒忌隻貓？喂你對佢就咁包容嘅，佢瀨尿又得，你幫佢清屎又得，但係你對我就完全唔包容喎，我講兩句你又鬧我咁樣，有冇咁嘅情況呢？
Steven：我就...有陣時會妒忌啲貓呀，你成日攬住佢又唔見你攬住我。
Dickson：嗱，係嘅有嘅。
Terry：都係，我女朋友都會妒忌我對啲貓點解咁樣嘅，因為我成日抱住佢就會，哎呀，BB咁樣抱。
Kneta ：我想話你有四隻呀，你要輪住嚟抱。
東方昇：女朋友排第尾㗎喇。
Kneta：係呀！
東方昇：同埋的確隻隻貓係好錫過女人。
Terry：同埋啲貓係...啲貓好香㗎
東方昇：係呀。
Kneta：即係你女朋友唔香？
東方昇：唔係，佢任畀你錫呀任畀你搓圓...
Dickson：你哋係癲晒我想講！

東方昇：Dickson我話你聽呀，揸隻貓個肚腩，好揸過...哈哈哈，咩呀...真係！
Dickson：唔可以同樣咁愛嘅
東方昇：係咪先呀，認唔認同揸貓肚腩係舒服先？哈哈！
Steven：唔認同。
東方昇：點解呀？
Kneta：因為女朋友喺隔籬唔敢講。明嘅x3！
Steven：唔係嘅，攬住女朋友最舒服。
Kneta：嗯，明嘅x3！
Dickson：突然之間你係咁識撈嘅喂？

東方昇：哈哈，好喇好喇最後一個問題喇，好殘忍㗎！如果有一日你哋分開，隻貓嘅撫養權歸邊個？嘩！
Yvonne：我會帶金寶走囉！
Steven：係呀，佢成日都話會帶走佢呀。不過傻嘅咩，佢屋企都唔畀養貓，梗係唔畀佢帶走啦！
Kneta：即係連佢都唔准走，你應該咁答。
Steven：係喇，個重點係我點會畀佢走吖。
Kneta ：啱喇，係要聽呢啲㗎。
東方昇：根本就唔會分開，哈哈哈！結咗婚好啲，多數有啲係拍緊拖嗰啲呢，就會有呢個情況出現。
Kneta：因為拍拖嗰個同結婚嗰個諗法，個bounding無咁勁。
東方昇：係呀好慘嘅，有時分咗手之後唔係掛住個ex呀，係掛住ex嗰隻貓呀，或者狗呀。

Terry：唔係，但係咁樣其實都好啲嘅，我聽過以前有啲friend呢，就係貪得意兩個一齊嘅時候買咗隻貓。但係點知兩個都唔想要，即呢個先係最worse嘅，呢個case。
東方昇：呢個最慘，好似遺棄佢。
Steven：所以我哋一定要支持領養呀！
眾人：啱呀x5！
東方昇：係呀，好啦咁你哋咁有愛心，你哋咁錫貓，一定會好錫對方嘅，咁希望你哋繼續幸福快樂啦，同埋啲貓貓成家人咁樣！
Steven：多謝你哋！
東方昇：好，感謝你哋嘅分享呀！我哋聽都聽得好開心，好呀好呀感謝你，拜拜。

東方昇：嘩，聽到佢哋嘅故事真係好sweet！嗱，我真心強烈要求Dickson你真係要領養隻貓。首先你如果領咗隻貓之後呢，咁有啲女仔會因為鍾意你隻貓呢，而可能同你一齊啦。
Dickson：上嚟我屋企咁樣…
東方昇：Good啦！第二就係如果你真係孤獨終老，你都可以攬住隻貓，完美！唔係，真係呀！
Dickson：點解你哋諗到我個人咁目的性？
東方昇：哈哈哈，嗱我再說服吓你先，喺我身上我真係養咗貓之後呢，我覺得係瞭解咗女人係一個咩嘢。
Kneta：係係，我覺得女仔真係好似貓科動物。
東方昇：係呀係呀，即係狗呢就比較似小朋友單純啲，但貓其實係有一種女仔嘅特質㗎，即係有時愛理不理，但係有時就會好黐你。
Terry：佢嬲咗你，嬲咩呢？唔知 哈哈哈…係咪心情唔好呢？唔知。
東方昇：你要就佢嚟迎合佢，所以其實養貓係會瞭解女仔多啲。

Kneta：同埋我覺得養貓或者小動物呢，係陶冶性情嘅一種呀，即係我以前係好冇耐性㗎，我養咗貓呢就...或者寵物啦，就耐性好咗啲，都未必話非常之好。咁你耐性好咗喇，會唔會又成為一個...賣點？
Dickson：係，你哋講啲優點我梗係知啦，但係個問題就係我亦都知道呢，養寵物呢係有責任感㗎嘛，我連我自己都未養得掂，我仲要搞啲貓就唔係幾好。
Terry：到時到候就會有㗎喇。
東方昇：其實同識女朋友一樣，你開頭覺得好有責任感要點樣，冇啦你閉上眼㗎喇就閉上眼㗎喇！一於咁話啦養啦！
Kneta：結埋婚㗎啦！
東方昇：好啦好啦，咁呀希望大家有養寵物嘅都有共鳴。
Kneta：領養代替購買，係啦好啦，拜拜！