🛕古代七大世界奇觀，現存只剩一個！｜格物冷知識｜格物致知

去到公元四至五世紀，有一個叫做Philo of Byzantium嘅人，寫咗本書叫做on the seven wonders of the world，裡面就正式提出七大奇觀嘅概念。而家部分嘅手稿依然係收藏喺海德堡大學圖書館入面嘅。

而後世人就整合咗佢哋兩個嘅內容，定咗套世界奇觀嘅標準。簡單嚟講有三個重點，就係由人類建造，有劃時代嘅建築特色同埋要有深厚嘅歷史價值。所以由古至今都出現過好多世界奇觀嘅。而我哋今日會集中講吓古代七大奇觀。

胡夫金字塔

胡夫金字塔，係古代七大奇觀唯一仲完整存在緊嘅。佢嘅特點一個字講晒，大。係埃及所有金字塔之中規模最大嘅。起好嗰陣高146。5米，而正方形底每邊長230米，佔地面積大約三十二萬平方米，即係有半個香港機場一號客運大樓咁大。佢係由二百三十萬塊巨石組成，最輕嗰嚿1。5噸，最重嗰嚿有成160噸。根據考古學家推算，呢座嘢一共係用咗十萬人，同埋廿年時間先至起好嘅。

齋聽啲數字都已經震驚13億人，但係跟住落嚟要講嘅嘢係會震驚全球70億人。嗱講啲震驚嘢之前，首先講吓金字塔有咩用。

話說古埃及人有個概念，就係法老王死咗之後，個靈魂就會升天變成神。而金字塔銘文亦都明確提到，金字塔就係幫法老升天嘅天梯，而佢哋整成三角錐體咁樣，都係表示對太陽神嘅崇拜。可能有人會話︰嘩咁簡單就做到神？咁大把有錢都爭住起啦。但事實就並唔係咁簡單嘅，之所以話會震驚70億人，就係因為呢座建築物呈現出嚟嘅各種數字，實在太巧合。

首先，佢底部嘅正方形係完全Exact7ly Completedly Perfect池咁樣對正東南西北四個方位，誤差只係得0。057度。另外地球一路自轉嗰陣時，北極兩個軸心點係會有週期性移動嘅，要經過25827年先至會返返同一點。聽住啦，胡夫金字塔兩條對角線加埋就係25856。6厘米，四捨五入之後，就係25827。點解會咁橋嘅呢？真係一個不解之謎。

除咗呢啲巧合嘅數字，呢個金字塔仲有個特異功能，就係保鮮。有一位超自然科學專家Antonie Bovis，佢醉心於研究金字塔嘅神秘力量。佢喺靠近塔頂嘅位置，發現咗啲外來嘅動物屍體，唔單止冇腐爛到，反而仲會自行脫水變成乾屍。

當然就唔止動物，我哋睇下呢個埃及第十八代王朝嘅泰伊皇后，佢喺公元前1338年已經葬咗喺度啦，大約經過三千幾年之後，嗰把頭髮呀依然都仲係咁亮麗，而且重保存到成個面部輪廓。嘩你睇下呢張ai還原圖，幾靚㗎喎真係。

依家睇返當時起呢個世界奇觀，又冇電力、科技都唔係咁發達嘅啫，只不過係用啲岩石砌出嚟㗎咋喎，所以亦都有好多學者認為金字塔嘅角度、比例、擺位等等都蘊藏著一股神秘力量。由此可見佢唔單止係胡夫金字塔，仲係護膚金字塔。

羅德島太陽神巨像

除咗整建築物之外，佢哋仲會整figure嘅。日本橫濱就有隻高達啦，二千幾年前希臘都有個太陽神像。呢個巨像擘大對腳、得正喺港口度。啲船就一定要捐佢嘅褲浪先至入到去嘅。唔知佢會唔會走光呢？究竟佢咁巴閉係咩來頭呢？

呢一座世界奇觀係位於古希臘嘅羅德島。歷史上古希臘大部份時間都係由各個城邦組成。而羅德島就係由呢三個呢三個城邦Lalysos、Kamiros、Lindos聯合管理嘅一個區域。連接著愛琴海同埋地中海，所以佢哋喺羅德島得到絕對嘅商業優勢。個位又靚又多錢賺，實係好多人猴住呢塊地㗎啦。

公元前305年，馬其頓王國為咗擴充佢嘅土地，決定dap咗呢塊肥豬肉豬。於是重兵包圍著羅德島，以為可以攞得到羅德島，但係羅德島都唔係咁容易俾人攞得到。結合咗三個城邦嘅兵力，加上呢度嘅地形易守難攻，馬其頓攻極都攻唔入，都唔知仲攞唔攞到羅德島。一年之後馬其頓死傷慘重，就唯有撤軍。就係咁羅德島打贏咗呢場仗。

羅德島嘅人民好慶幸三個城邦嘅人都可以團結一致對抗敵人，佢哋就將敵方遺留落嚟嘅裝備同埋兵器全部拎去溶成銅鐵，決定起一個巨大宏偉嘅雕像紀念呢一場戰役。

呢一座雕像總共起咗12年，高度大約33米，即係同紐約嘅自由神像差唔多。佢裏面係空心嘅，用石頭同埋鐵嘅支架固定。再用收集返嚟嘅銅鐵做外層，整靚個外表。呢一個巨像就係希臘人嘅太陽神，赫利俄斯。

但係呢個巨像只係存在咗56年就俾一場大地震摧毀，亦都冇人再幫佢重新修葺。去到公元654年，一個猶太商人買入咗好多呢一個巨像嘅金屬殘骸，仲用咗900隻駱駝先至運得走添。殘骸碎片就係咁樣散落各地。

所以其實去到而家，呢一個巨像嘅形像只不過係個推測，因為有考古學家喺部份嘅殘骸發現一組銘文，裏面就提到赫利俄斯嘅讚頌，描述咗佢對住個海站立、燃點起自由之火嘅形象。而家眼見嘅呢張圖就係後人嘅推測，真實係點嘅呢？就不得而知呀。

奧林匹克宙斯巨像

古希臘人不嬲都好崇拜佢哋嘅神嘅，所以都起咗好多神殿畀佢哋自己供奉。而最架勢嗰座就係呢個奧林匹克宙斯巨像。佢位於希臘雅典衛城東南面，亦都係亞奧林匹克運動會嘅發源地。要起呢個希臘神之中嘅大佬，真係一啲都唔可以馬虎嘅，我哋就睇下佢有幾detail啦。

根據希臘遊記記載，宙斯巨像喺公元前457年起嘅，呢座嘢就高12米，相當於5層數高。宙斯主體用木做嘅，身體外露嘅部份就包咗一層象牙。件衫、皇冠同埋右手拎嘅勝利女神像都係用黃金造。而左手拎嗰枝權杖就鑲咗唔同嘅金屬。佢嘅寶座係用珍貴嘅杉木造，亦都鑲咗黃金、象牙同埋各種寶石。

為咗營造宙斯嗰種神聖地位，佢哋仲特登喺宙斯像嘅前面起咗個好大嘅橄欖油池。用嚟做咩㗎？油炸宙斯？唔係，佢哋透過橄欖油反射天窗嘅光線上宙斯身上，即係好似打燈咁呀。不過可惜而家去睇呢，得返幾碌柱嘅姐。

公元426年羅馬皇帝都路一世，佢眼中只有自己一套，其他信仰對佢嚟講都係邪教。所以佢就下令破壞所有其他教派神廟。而宙斯像整到咁奢華，當然亦都俾人洗劫一空。原隻宙斯亦都就咁俾人分屍。嘩咁似OOXX嘅？

巴比倫空中花園

呢一個奇觀到底係咪真實存在呢？到而家都依然係眾說紛紜。所謂嘅空中花園並唔係好似天空之城咁樣浮喺空中嘅，而係一座好高嘅花園嚟㗎啫。而喺佢背後其實係新巴比倫國王嘅愛情故事。

話說公元前六世紀，新巴比倫國王Nebuchadnezzar II娶咗個米底王國嘅公主。米底王國係美索不達米亞北部嘅山區，嗰度草木茂盛、鳥語花香。呢一個公主嫁咗過嚟新巴比倫之後，住咗一排就有公主病啦。

你呢一度呀冇山都算啦仲要冇樹，好啦好啦冇樹都算啦，你連花都冇呀大佬，日日望出去就係個死人平原，又曬又熱又乾又燥，搞到我成日出汗，皮膚起粒粒呀，差咗好多呀，我唔理呀我聽日就要個花園，有咁大得咁大

嗱身為男人聽到呢段嘢呢，本應就應該打到佢爆缸㗎啦，但又的確無可厚非喎。巴比倫位於平原地區，氣候乾燥，年均降雨量淨係得200毫米左右嘅啫，最熱仲可以去到50度，難怪老婆咋形嘅。所以為咗令呢條八婆收嗲，佢決定起一座空中花園。

呢座嘢總共22米高，最底層有兩個標準足球場咁大，然之後一層一層咁樣搭上去，總共有四層。每一層都有唔同種類嘅植物，呢一啲都係佢特登由其他地方連埋啲泥一齊運返嚟種嘅。最把炮嘅係佢供水系統呀，為咗應付平原缺水嘅問題，佢喺地底起咗個龐大嘅儲水池，透過水泵嘅原理，一班奴隸用人力泵啲水上頂層，再逐層流返落嚟，灌溉曬成個花園。

有學者認為，每日水用量有成31000公升，31000公升係一個咩概念？即係澤尻繪里香每日要做31000套一公升的眼淚，先至可以淋得曬成個花園。

就係咁，呢一個巧奪天工嘅花園終於醫好咗條八婆嘅公主病。不過隨著新巴比倫王朝滅亡，空中花園亦都消失喺歷史當中。以上講嘅嘢都係考古學家嘅猜測嚟㗎啫。十九世紀尾，德國考古學家發掘出巴比倫城嘅位置，喺當中搵到一排排嘅水槽，面積有成1260平方米咁大。但係都好難證明佢就係空中花園，所以去到而家都係口同鼻拗嘅。唔知你又信唔信呢？

阿緹蜜絲神廟

呢個世界奇觀，而家就淨係得返一碌柱嘅啫。究竟經歷咗啲咩搞到咁樣樣呢？咁就要講返公元前六世紀嘅時候啦。呢一座叫做阿緹蜜絲神廟，位於土耳其西岸嘅以弗所附近。係當時最大嘅神廟。推算佢嘅面積係1萬平方米以上，總共係由126碌18米高嘅柱撐起成個建築，而且全部都係用大理石起嘅。呢啲柱望落去一排排直不甩非常之功整，都唔會話斜咗呀歪咗呀咁樣。

嗱你唔好以為排得靚就得，其實內裏暗藏乾坤，建築學家發現呢啲柱並唔係單純嘅直線，而係配合埋角度，每條柱都有微細嘅曲線調節返視覺上嘅誤差喎。嘩起到咁真係嘆為觀止。

叫得呢個名當然就係用嚟供奉阿提密斯嘅，佢亦都被稱為掌管分娩嘅月亮女神，保佑大肚婆順產同埋保護啲BB仔。希臘人好崇拜呢個女神嘅，所以呢一座神廟嘅地位亦都好崇高。入得嚟嘅人都會保持莊重，唔會立亂喺度搞搞震嘅。久而久之呢度就成為一個庇護所。

不過對於外族人嚟講，我理得你係月亮女神定係sailor moon呀，我唔妥你嘅話王母娘娘嘅蟠桃我都照食呀。就喺公元前365年嘅721，有班外族人一把火燒咗成座神廟。而喺同一晚，元朗。。。呀唔係，亞歷山大大帝亦都係嗰晚出世，所以班古希臘人就話，月亮女神嗰晚去咗接生，所以就保護唔到個神廟啦。

好多年之後，亞歷山大事業有成，大個仔啦，於是佢就返去同班希臘人講︰嗱不如咁，我畀錢你哋重建個神廟，不過個名呢就要改做亞歷山大神廟，制唔制先？「唔得」亞歷山大就係咁食咗檸檬徒勞無功。

等佢死咗之後，班希臘人先至重建神廟。不過好景不常啊，喺之後800年裏面，呢座廟先後俾歌德人同埋羅馬人蹂躪，佢哋每次又拆啲，每次又拎走啲嘢。經過時間洗禮去到依家，淨係得返碌柱。

摩索拉斯陵墓

喺香港，死人都冇位住呀。但係呢一個世界奇觀就係一個有錢佬起畀自己好_大嘅墳墓。佢點解要自掘墳墓嘅呢？

嗱呢個墓地嘅主人叫做摩索拉斯，佢並唔係國王，只係呢撻地方總督。佢係一個好自大、好自負、好自卑嘅人，雖然佢under波斯國，但係佢就唔甘於平凡，走去做二五仔幫希臘人打返波斯。所以就喺呢度自立成為一個政權啦。當佢有權有勢，佢就更加覺得死都唔想平凡，要後世嘅人都記得佢，所以就大興土木幫自己起座墳墓。

呢一度係位於哈利卡納素斯，即係而家土耳其西南部一個古城。佢佔地1200平方米，高45米，最頂部仲有一個6米高嘅馬車雕像。嗱我哋拜山都係去墳場裏面嘅其中一格墳墓嘅啫，但係要拜呢個人呢，佢個墳墓就已經係座山。哇真係裝柱香都蕩失路。

佢呢一個咁病態嘅自負心理，當然成個陵墓嘅一磚一瓦都要showoff喇。首先個牆身採用全白嘅大理石砌成，沿住外牆全部都係浮雕同埋石像嘅裝飾。入到去裏面簡直就係行緊美術館咁呀，佢特登請咗當時最出名嘅四個雕刻家，每人負責一個方位嘅雕塑，主題都唔同嘅。例如希臘人同亞馬遜族女戰士嘅戰爭，又或者啲神話傳說等等。另外為咗展示佢嘅英姿，屋頂上面嗰個馬車雕像就係佢同佢老婆呀，一眼睇得出呢個陵墓係佢㗎喇。

嗱搞咁大壇嘢，究竟佢嘅下場係點呢？就係冇好下場。考古學家喺入面係冇發現任何遺體嘅。相傳呢條友死咗之後，佢老婆並冇將佢埋葬喺入面，因為太愛佢呀，於是又將佢燒成灰，溝埋啲酒咕一聲飲落肚，然後佢就唔知死咗去邊啦。歷史上真係唔知佢老婆死嘅時候喺邊。而呢躉嘢去到中世紀就被當時侵略者拆毀，攞曬啲材料去起其他嘢。淨係得返少量嘅浮雕而家保存喺大英博物館。Wooo咩都冇喇。拼搏一生最後都係得場空。

亞歷山大燈塔

喺勾草之前，我哋聽埋最後一個奇觀先。佢係燈塔嘅始祖，亞歷山大燈塔。佢亦都係一個比較有實際用途嘅建築。

話說公元前288年左右，埃及國王托勒密開開心心諗住娶老婆，佢就派咗隊豪華嘅船隊由尼羅河港口出發去接新娘。不過接返嚟嘅係鬼新娘。因為佢哋回程嗰陣已經係夜晚呀，個港口黑蚊蚊好難辨認方向，所以就不幸觸礁陷船剷。

事後佢下定決心要起一個世界最高最大嘅燈塔，然之後同大家講︰有我照住，大家唔使驚，你哋即管娶老婆啦...

佢下令希臘最著名嘅建築師Sostratus of Cnidus幫手設計，用咗20年時間，就係法羅斯島起咗呢座亞歷山大燈塔。

燈塔大約高125米，分為三層。底層係四邊形嘅，中間嗰層八角柱型，最頂嗰層就係圓柱體。而且塔頂仲有一個海神波塞冬嘅雕像。嗱靚就靚啦，但係燈塔最緊要係燈呀嘛。嗰陣時邊有電力姐？查實佢第三層全部都係鏡，夜晚就可以反射塔裏面嘅火光。就係咁1500年嚟就係咁樣一直照住班水手。

直到公元十四世紀，又係一場地震整冧咗佢。不過喺2015年埃及政府就決定重建呢一座燈塔。咁我哋拭目以待啦。

勾草

嗱關於世界奇觀呢，阿輝都有啲經歷，不如你同大家講吓呢？

係啦大學嗰陣時呢就有啲交流生，咁又有個埃及嚟嘅同學，咁啱就揀咗同一科就係歷史科啦，梗係問佢關於埃及歷史啦。有問下佢獅身人面像呀。一講到金字塔呢佢就好熟，原來佢係發燒友嚟。即刻問佢多啲關於金字塔嘅一啲神秘現象呀。我有問佢喂其實金字塔頂部呢係點樣樣㗎？佢即刻勁緊張，佢就話千祈唔好掂，好危險，嗰陣時呀佢阿叔呢就係接觸太多頂層嘅嘢呢死咗呀。

跟住我問佢吓？你講咩呀？之後先發現佢最熟嘅

係食物金字塔。

佢啊叔糖尿病發死咗。

唔知大家對世界奇觀仲有啲咩特別嘅經歷呢？歡迎喺下面留言話俾我哋知，Bye

今集完。支持我哋嘅創作嘅話記得comment Like share 同埋Subscribe我哋，我哋下集再見。