夫婦出海後神秘失蹤 室友突然遭遇不測 原來魔鬼竟藏在恐龍戰隊？｜原子檔案

喺1992年，國際著名大導演史提芬史匹堡對外透露，正執導一部改編自1990年推出嘅小說《侏羅紀公園》，以恐龍為題材嘅電影。隨即世界各地都掀起咗一陣恐龍熱潮，各式各樣嘅恐龍產品不斷出現。喺呢個情況下，東映亦以恐龍為主題，製作咗《恐龍戰隊獸連者》，亦成為咗第16部《超級戰隊系列》嘅作品。呢個新劇集除咗以恐龍為主題，亦融入咗當年大熱嘅電子遊戲奇幻風格，講述恐龍守護獸同王族與邪靈妖魔爭鬥嘅故事。早期戰隊主要嘅成員係四男一女嘅組合，顏色次序為紅、黑、藍、黃同埋粉紅。當時除咗《侏羅紀公園》一度成為電影史上最賣座嘅作品，受到恐龍熱潮影響嘅《恐龍戰隊獸連者》亦非常受歡迎，為公司帶嚟咗唔錯嘅收入。

更重要嘅係，呢部作品引起咗一間美國公司嘅注意，喺1993年，佢哋就出資購買咗《超級戰隊系列》嘅版權。喺同年，首部美國版嘅《恐龍戰隊》正式推出，角色背景都改為大學校園為主。不過有趣嘅係，原來美國版嘅隊員變身、變身後嘅打鬥同埋巨型機械人出場嘅片段都係「循環再用」日本版嘅畫面。而喺90年代，鬥到你死我活嘅香港兩大電視台，無線電視同埋亞洲電視都相繼購買咗《恐龍戰隊》嘅播放權，無線購買咗日本版，而亞視就買入咗美版。時至今日美版《恐龍戰隊》已經總共播放近一千集，多年嚟好多年輕嘅演員同埋童星都參與過《恐龍戰隊》，但當中竟然有兩名演員牽涉喺多件可怕嘅兇案入面。

［第二章 出售遊艇廣告］
第一件案件嘅人物包括咗一對中年夫婦，丈夫個名係托馬斯，57歲，係一個退咗休嘅緩刑犯監督員，同埋健碩嘅健美運動員。佢同47歲嘅妻子積琦 擁有一艘叫做「Well Deserved」嘅55英呎遊艇。夫婦二人都好鍾意航海活動，喺過去兩年，佢哋都喺太平洋同埋加利福尼亞灣一帶進行航海旅程。直到2004年，佢哋嘅孫出世，佢哋就決定出售遊艇，打算定居喺紐波特港，專心照顧個孫，享受家庭樂。喺同年11月，為咗有足夠嘅資金應付日後生活，夫婦二人決定出售價值44萬美元嘅遊艇，仲喺報紙上刊登出售遊艇嘅廣告。但喺2004年11月15日嘅朝頭早，佢哋由港口駕駛遊艇出海之後就從此人間蒸發。托馬斯嘅家人一直發現未聯絡到對方，以為佢哋喺出售遊艇嘅時候出現突發嘅事，所以未能夠同家人聯繫。但係托馬斯嘅屋企人好快就認為事有蹺蹊，因為托馬斯同埋妻子絕對唔會無故失蹤。加上托馬斯嘅兄長詹姆，發現遊艇停泊嘅位置同平日慣常嘅位置有好大嘅出入。而一向保養得好好嘅遊艇，如今竟然破敗不堪。事實上托馬斯已經擁有遊艇多年，佢一直都好好咁愛護佢，每次出行返嚟都會仔細咁清潔佢，仲有著一定嘅航行習慣。由於事件非常唔尋常，家人好擔心兩個人嘅安全，所以佢哋喺商量後決定報警求助，而警方亦即刻展開調查。當時有目擊者表示，喺夫婦失蹤之前，見到夫婦同一班陌生嘅年輕人，駕駛住遊艇從港口出發。之後目擊者表示，見到遊艇被人駛返港口，但就無人見到夫婦落船嘅痕跡。究竟當中發生咗啲咩令兩個成年人憑空消失呢？而嗰班陌生人又同事件有咩關係呢？

［第三章 可疑的童星］
喺呢個時候，警方發現咗兩個重要嘅線索。首先，有人試圖喺墨西哥使用托馬斯嘅銀行戶口。除此之外，有知情人士向警方透露，托馬斯夫婦喺失蹤當日，曾經同幾個想買遊艇嘅年輕人一齊。警方根據線索，查出夫婦打算將遊艇買畀一個白人男子。而夫婦最後一次露面，就正係同嗰個男人交易嘅當日。警方認為呢個男人同失蹤事件有莫大關係，於是就鎖定佢為疑犯，即刻拘捕佢問話。呢個男人名叫斯凱勒，出生於1979年，父親係一個毒販。佢細個嘅時候，父親發現佢有唔錯嘅表演天賦，於是就比佢成為童星，賺取可觀嘅收入。斯凱勒細個嘅時候曾經演過唔少影集同埋廣告，更加喺14歲嘅時候參演過美國版嘅恐龍戰隊。可惜係大個之後，佢因為記唔住台詞但又唔肯努力，佢嘅演藝生涯就此完結，而後嚟佢20歲嘅時候，就加入咗美國嘅海軍陸戰隊，但係短短15日佢就因為私自離隊被部隊開除。喺調查嘅時候，斯凱勒向警方出示遊艇購買嘅憑證，證明佢從托馬斯夫婦手中買咗呢艘遊艇，還稱對方攞咗錢之後就揸車離開，佢表示自己完全唔知兩個人之後嘅去向。斯凱勒又指佢嘅好朋友係在場人士之一，可以為佢作證，而當被問起購買遊艇嘅目的時，斯凱勒就解釋係為咗洗黑錢，呢筆錢係同佢喺兩年之前所犯下嘅一件持槍行劫案有關。原來早喺2002年佢就因為持槍行劫而被判入獄，佢就喺監獄中認識佢所提及嘅好朋友，其後兩個人成為咗最佳損友。但可疑嘅係，警方根據斯凱勒嘅口供，追查到失蹤夫婦所駕駛汽車嘅下落。佢哋發現嗰架車停泊喺墨西哥一戶人家嘅後院，經查問之後，該戶人家向警方表示汽車係由斯凱勒贈送。好明顯，夫婦嘅失蹤必然同斯凱勒有莫大關係。

［第四章 3600尺深海］
喺案件發生後一年，警方再次拘捕斯凱勒同埋佢嘅妻子，當時警方已經非常懷疑佢殺害失蹤夫婦，但當時無確實嘅證據，只好以洗黑錢嘅罪名拘捕佢哋，以免佢哋畏罪潛逃。而當警方問及失蹤事件嘅時候，斯凱勒一直堅稱自己同案件無關，反指夫婦可能因為毒品交易而慘遭滅口。而就喺呢個時候，警方搵到斯凱勒早前提及，喺遊艇交易時候喺現場嘅好朋友，原來呢個好朋友曾經係一個獄警，喺失蹤事件發生之前兩年，斯凱勒因為盜竊入獄同對方成為好朋友，喺出獄之後兩個人一直保持聯絡。而喺警方盤問下，佢承認自己當日同斯凱納仲有另一名男子一齊登艇，而且合謀殺害托馬斯夫婦。經警方長時間嘅調查同埋根據證人嘅口供，終於得出以下嘅案發經過。時間返返去2004年，托馬斯夫婦喺報章上刊登咗出售遊艇嘅廣告之後，好快就有買家聯絡佢哋，而呢個買家就係斯凱勒。但由於斯凱納好年輕，而且唔似真正鍾意航海活動嘅人，所以身為前監督員嘅托馬斯初時對斯凱勒保持一定嘅警惕。其後斯凱勒向夫婦自稱係一名演員，仲先後兩次帶同懷孕嘅妻子同埋一個小朋友同佢哋見面。喺交流中，佢不時向托馬斯夫婦分享自己兒時演出嘅經歷同埋家庭生活，風趣嘅佢將兩個人哄到非常開心，令對方放低戒心，認為斯凱勒真係對遊艇有好大嘅興趣，係潛在嘅買家，於是斯凱勒就借機建議，喺交易之前同夫婦一齊試駕遊艇，而夫婦亦欣然接受咗呢個建議。由於托馬斯好大隻，於是喺交易當日，斯凱勒就帶咗兩名同伴一齊登艇，佢謊稱兩個人係佢嘅會計師。喺呢個時候夫婦已經毫無戒心，五個人一齊登艇出海，但係佢哋點都估唔到呢次將會係一次一去不返嘅旅程。當遊艇駛到海嘅中央，周圍都無其他船隻嘅時候，斯凱勒同兩名同伴分別向夫婦兩人施襲。夫婦被三人制服之後，先被強迫簽署遊艇轉讓嘅協議書，仲講出銀行密碼。當時遊艇女主人積琦曾經驚恐咁向三個人求饒，請求唔好傷害佢哋，因為佢哋啱啱先做咗祖父母，佢好想見到自己嘅孫，可惜三個人無動於衷，將夫婦綁喺鐵錨上再拋入海入面，就係咁夫婦兩人就沉入咗3600英呎深嘅大海入面，而屍體亦從此無辦法被尋回。跟住斯凱勒等人就將遊艇駛返岸邊，仲喺艇上到處清潔同消毒，試圖毀屍滅跡。另外斯凱勒仲將對方嘅銀行存款轉帳入一個墨西哥銀行戶口，試圖偽造死者兩人前往墨西哥嘅證據。但無幾耐警方又再發現另一件驚人事件。

［第五章 自行變性？］
事實上斯凱勒除咗策劃失蹤事件之外，警方更加揭發喺案發之前兩年，原來佢已經牽涉喺另一件發生喺墨西哥嘅謀殺案件。喺呢件案件入面，死者約翰生前曾經係斯凱勒嘅囚友，兩個人係出獄之後仍然保持聯繫，但由於斯凱勒遊手好閒債務纏身，而且仲要照顧懷孕嘅妻子同埋小朋友，約翰出於好心借咗五萬蚊美金畀佢，但係斯凱勒喺兩個鐘頭就揮霍咗一萬八千蚊美金，最後佢竟然仲向約翰狠下毒手。除此之外斯凱勒更加教唆另一名囚犯謀殺呢件墨西哥案件嘅目擊者，即係表兄弟同埋佢嘅父親。而喺遊艇事件發生後四年，斯凱勒喺囚室等待開審期間，竟然自行進行變性手術。佢嘅律師聲稱，斯凱勒同埋妻子喺案發之前已經負債纍纍，佢為咗籌集資金進行變性手術先會出手殺托馬斯夫婦。終於喺2008年9月，夫婦失蹤案正式開審，雖然斯凱勒一開始稱自己係無辜，但審判正式開始之後，佢就承認咗自己曾經犯下三宗謀殺案，而佢之所以認罪係為咗避免判處死刑。同時律師還說斯凱勒有過一段悲慘嘅童年，年幼嘅時候遭到父親虐待，而喺父親死於愛滋病之後，斯凱勒就無家可歸，欠缺家庭溫暖。最終佢嘅妻子亦被視為共犯，一級謀殺罪名成立，被判無期徒刑不得假釋，喺呢個時候佢已經同斯凱勒離婚，而斯凱勒嘅好朋友因為願意為檢方作證，獲輕判入獄20年零4個月，至於斯凱勒同埋另一名男被告就被判死刑，但係由於加利福尼亞州暫停執行死刑，所以佢哋將會喺死囚牢房度過餘生，不得假釋。而喺失蹤事件發生後15年，即係2019年，斯凱勒終於得償所願，佢嘅性別獲合法更改為女性。而雖然案件喺法律上早已經告一段落，但係被害夫婦兩個人嘅屍體依然未被尋回，仍然喺深海中不見天日。事實上除咗呢件令人不寒而栗嘅案件之外，跟住落嚟發生嘅案件，更加同《恐龍戰隊》當中嘅主角有關。

［最終章 紅戰士的室友］
喺2015年2月，一個美國男星被捕，引起咗媒體嘅關注。呢個男星叫做里卡多，出生喺1979年1月24日，美國加利福尼亞州。喺2002年，佢曾經演出《恐龍戰隊》，而佢喺劇中更加飾演主角亦即係紅戰士，之後多年佢亦拍過唔少劇集。而喺2011年，佢又再次拍《恐龍戰隊》系列，喺劇中飾演反派。但時間到咗2015年1月，里卡多突然牽涉喺一件室友殺人事件入面。當時有人報警指一名38歲嘅男子喺屋企受傷，警方隨即趕到現場，將男子送往醫院救治，可惜佢因為失血過多而救唔返。警方之後拘捕死者嘅室友里卡多，里卡多坦言自己同對方出現口角爭執，繼而動武。里卡多同女朋友躲喺臥室躲避對方追打，但係對方強行闖入房門追打佢地。為咗自保，里卡多先至會刺傷對方，事後佢亦主動報警，後來佢獲准以100萬美金保釋，期間未被起訴。時間一年之後，即係2016年1月，里卡多再次因為呢件案件被捕，終於佢被落案起訴謀殺室友，面臨最高刑罰無期徒刑，但由於證據不足，所以獲改判為故意殺人罪。而故意殺人控罪，即係被告受到案發時候環境影響，先至有意圖咁殺人，並非有預謀咁殺害對方，所以判刑上會比謀殺輕。最終里卡多在庭上認罪，他承認自己同室友因為女朋友嘅泊車問題而起咗爭執，佢一怒之下先至會刺傷對方，錯手令對方身亡，最終佢被判6年有期徒刑。而死者嘅家姐表示，對方認罪終於令佢放下心頭大石，可以重新過新生活。而喺2020年，里卡多獲釋，並公開接受媒體訪問。正所謂「人心比萬物都詭詐」，有時候外表善良正義嘅人，都會為咗利益處心積慮咁加害同類，或者因為爭執而防不勝防咁殺害同伴，其實相比起《恐龍戰隊》故事入面，明目張膽咁侵略地球嘅怪獸，人類極端冷血嘅案件先至真正係令人毛骨悚然嘅故事。