Sennheiser全新Soundbar AMBEO Plus開箱、Sony L系列電視出爐、Moto RIZR捲芒概念機5吋芒變6.5吋｜廣東話【Price Weekly #156 2023年3月】

音效方面就有 7.1.4 聲道，內置有 7 個 2 吋發聲單元，其中兩個喺向上發聲，營造天空音效。另外 Soundbar 入面仲有 2 個 4 吋低音，用戶發聲有個 Night 模式，開啟之後就會關閉呢兩個低音，啱晒夜晚睇戲煲劇，唔怕會震到隔離鄰舍。

除此之外，機身嘅插位都好齊全。有 3 個 HDMI 其中一個支援 eARC，仲有光纖同埋 USB，以及比較少見嘅 AUX 插頭。另外仲有插位畀用家以有線方式，去駁其他品牌嘅重低音。

Sennheiser 同時亦發表全新重低音 AMBEO Sub，內置 8 吋低音單元，提供 350W 輸出功率。可以用無線連接 AMBEO Plus，而且最多可以連接 4 個 AMBEO Sub，用家可以透過 Sennheiser Smart Control App 去控制，甚至將重低音關閉。

喺音效格式方面除左支援 Dolby Atmos、DTS-HD Master Audio 之外，亦都同 MAX 一樣 Support SONY 嘅 360 Reality Audio。


＜ QD-OLED再任高階代表 Sony L 系列電視出爐 ＞

相信好多人都等緊 SONY 今年嘅新電視，日前終於都有喇！廠方發表新一代 L 系列 4K 電視，包括 A95L、A80L、X90L、X85L 同 X80L 系列。

先講 A95L 同 A80L 系列：採用 QD-OLED 面板，沿用 Cognitive Processor XR 處理器，新機內置溫度感應器同埋散熱板，可以偵測螢幕溫度以及控制光度。廠方稱亮度比過往型號多一倍，而且亦都支援 Creator Calibrated Mode、IMAX Enhanced 同 Dolby Vision，以及有 Netflix Adaptive Calibrated Mode，配合 BRAVIA XR 環境光功能：可以根據室內環境亮度自動去調整畫面亮度。A95L 有 55 吋同 65 吋。咁 A80L 尺寸方面就有多啲揀，分別有 55 吋、65 吋、77 吋同 83 吋。

而 X90L 就屬於 LED 系列，有 Cognitive Processor XR 處理器，尺寸方面有 55 吋、65 吋、75 吋同 85 吋。採用全陣列 LED 背光，同 A95L、A80L 系列一樣都係 Seamless Edge 設計，超窄邊框令畫面更容易同環境融為一體。

最後嘅 X85L 同 X80L 雖然同 X90L 都係全陣列 LED 背光機種，不過處理器就係用 4K HDR Processor X1 ，尺寸就由 43 吋到 75 吋，各自都有 5 種 size 畀大家揀。功能方面就支援 X-Balanced Speaker 同 Google TV。

全線 L 系列新機已經喺官網現身，不過暫時未有詳細 spec。相信 SONY 好快就會公布更多消息。大家又點睇今年嘅 L 系列電視呢？歡迎留言分享吓。


＜ 5 吋芒變 6.5 吋 Moto RIZR 捲芒概念手機 ＞

摺芒已經成為大趨勢，Motorola 日前就展示左佢地嘅概念機 RIZR。最大嘅特色就係用咗伸縮芒設計，個芒喺未伸展之前係個 5 吋 15：9 熒幕，當伸展之後就有 6.5 吋 22：9。同而家大家睇慣睇熟嘅摺芒機完全唔同，多出嚟嘅尺寸係捲向機背，就算無將個芒放大，收埋係機背嘅熒幕都可以繼續顯示，用嚟自拍或者顯示通知訊息。

目前有關呢部概念手機嘅硬件規格唔多，只係知道電池有 3000mAh，重量係 210g。不過睇到佢嘅成熟度都已經好高，希望快啲可以量產，咁大家就有更多選擇。


＜ 支援 Netflix、YouTube NVIDIA 新 Driver 殘片變 4K ＞

NVIDIA 最近為 RTX 30 同 RTX 40 系列推出咗最新 531.18 driver，最令用家雀躍嘅就係全新嘅 RTX 視訊增強超高解像度功能。因為呢個功能可以將一啲低解像度嘅影片提升到 4K 解像度，最實用就係睇 YouTube 或者 Netflix 嘅時候提升影片質素。RTX 係利用 AI 同 RTX Tensor 核芯，透過去除塊狀壓縮失真同提升影片解像度去改善影片質素，而用家只需要用 Chrome 或者 Edge 瀏覽器就可以用到呢個功能。不過目前只係支援 360p 至 1440p 嘅片，加上呢個 RTX 功能只係後期處理去改善畫質，同真正嘅 4K 片質素始終有距離。大家就唔好抱太大期望喇！


＜ 首次採用 Polar 演算法 新 G-SHOCK 支援多項運動 ＞

一直都好積極開發智能手錶市場嘅 Casio，日前發表全新嘅 G-Shock G-Squad GDB-H2000。新錶裝有 6 個 sensor，分別係：光學心率、高度、氣壓、溫度、速度感應器同陀螺儀，可以喺跑步、踩單車、游水等等多個運動入面做紀錄。

新錶除左用碳纖底蓋令重量比上代輕 38％ 之外，令一個值得關注嘅地方係用咗 Polar 提供嘅演算法，亦都係 Polar 開放演算法之後第一款採用呢個演算法嘅智能手錶。呢個演算法可以按照佩戴者心臟同肺部壓力，再對碳水化合物、蛋白質、脂肪能量比例進行分析，同時亦都有睡眠健康監測。

電力方面可以連續用到 19 個鐘，另外熒幕會用太陽能幫手差電，就算用 Always On Display 都唔怕。


＜ 預計夏季推出 《Pokémon Sleep》瞓住養精靈 ＞

相信好多人都玩過捉精靈遊戲 Pokemon Go，咁唔知大家宜家仲有無繼續玩呢？嚟緊 Pokemon 又有新遊戲啦！咁就係一個全新嘅手機遊戲 Pokemon Sleep。同 Pokemon Go 一樣，佢都係 AR 遊戲。不過，今次嘅遊戲玩法同以往唔同，因為佢係透過玩家嘅睡眠狀況去決定玩家喺遊戲入面嘅表現。至於玩法係點呢？咁就係當玩家瞓覺個陣 Pokemon Sleep 會透過手機加速度計同陀螺儀去記錄玩家嘅睡眠時間同質量。而喺遊戲入面玩家需要培養唔同嘅小精靈，呢啲小精靈嘅強度同能力都會隨著玩家嘅睡眠狀況而有分別。

如果玩家保持良好嘅睡眠習慣，佢嘅小精靈就會變得更強大；相反，如果瞓得唔好，玩家嘅小精靈就會比較弱。

除咗呢啲基本玩法之外， Pokemon Sleep 仲會有啲特殊挑戰。例如需要係特定時間內瞓覺，又或者喺特定環境瞓覺等等，都幾有挑戰性同得意㗎！

Pokemon Sleep 預計喺今年夏天上市，咁唔知大家有無興趣邊瞓邊玩呢？


＜ 傳發布會公布多款新遊戲 PS5 Pro 新機傳言整合 ＞

雖然今年 PlayStation 無參與 E3 遊戲展，不過大家都唔使失望，因為 Sony 已經確定會喺 3 月 4 號舉行 PS 發佈會。有消息透露指今次發佈會將會公佈一啲新遊戲同硬件，其中包括 PS5 遊戲同 PS VR 遊戲等等。而大家最關心嘅 PS5 Pro，近日有消息。新機唔單止係 PS5 嘅升級版，硬體性能同埋遊戲畫質都會大幅加強，等玩家可以享受更流暢、更高清晰度嘅遊戲體驗。唔知會唔會係支援 8K 呢？

雖然聽落好似無乜驚喜，但有指 PS5 Pro 會將 PS5 帶入另一個階段。的確都令人好期待！

PS發佈會上嘅最新消息，我哋亦會繼續同大家跟進。有興趣嘅朋友就記得留意住啦～


＜ 識玩燈光做埋露營燈 GravaStar 機械人藍牙喇叭 ＞

唔知大家有無想搵部外形特別嘅藍牙喇叭？向來鍾意用科幻題材做主題嘅 GravaStar 新推出嘅藍牙喇叭 Supernova 一樣無令人失望！外形似足太空八爪魚，唔單止可以用嚟聽歌，佢仲有照明功能識得發出唔同顏色嘅光線，甚至能夠跟住音樂不停咁變換燈光顏色。拎去露營之餘亦可以做埋氣氛燈，細細隻嘅 Supernova 內置左一個 3 吋全頻單元同一個半吋高音單元，雖然功率唔太只有 25W ，亦支援兩隻連接埋做立體聲喇叭，有 7 個鐘嘅續航力，價錢係 180 美元。



＜ 化身鏡子有寓意 羅馬尼亞以 AI 任官方顧問＞

近期 AI 人工智能相當火熱，連政府工都難佢唔到！羅馬尼亞政府日前就宣布推出一個名為 ION 嘅 AI 負責擔任政府榮譽顧問。羅馬尼亞總統丘卡話， ION 係由國家嘅研究人員、專家

同埋企業共同研究出嚟。

喺發表會上面 ION 化身做一塊鏡去同大家見面，寓意就係當總統見到佢嘅時候，就好似見到自己。而總統亦話 ION 會聽民意，唔單止會同人民傾偈，仲會利用社交網上面嘅公開數據，去分折羅馬尼亞人民嘅意見同批評，然後將 report 交畀政府審視。

雖然羅馬尼亞喺歐盟入面最窮嘅國家，但係佢地嘅創科企業相當蓬勃，亦都有人叫佢地做東歐矽谷。今次搵 AI 加入政府打工，都係全球第一個。唔知其他地方政府有無諗住試吓請 AI？

唔止容易請，仲可以慳返唔少公帑添！