24/2 《圍爐取戀》16歲天真妹慘被呃蝦條

毛記電視 | 娛樂類 | Feb 27, 2023

此影片謄本由呀清＆Machiko製作

★非作商業用途，本檔案版權歸版權持有人獨有★

話啱啱拍MV嘅時候一直都有留意到我，因為我好長腿、我好靚……總之就去到後尾每次見面佢都會同我發生性行為，結果有一次上酒店先發現原來佢係有女朋友。佢一直狡辯話佢女朋友屋企最近死咗屋企人，跟住之後就話驚宜家再提分手佢女朋友會崩潰……
Kneta：仆街啦嗰啲藉口！！嚟嚟去去都係噉，聽過萬幾次！

下載檔案

所有資料非作商業用途，若有內容侵權，請即通知我們移除。

東方昇：大家好呀！嗱其實呢我哋有個《圍爐取戀》嘅IG啦，耐唔耐呢除咗有啲人係想交啲愛情問題想我哋傾之外，有啲人都會單方面inbox我哋講佢自己個問題，純粹分享㗎啫。或者佢希望講個故事俾我哋聽，就睇吓我哋可唔可以話俾大家聽，警惕吓、警世。噉我哋宜家收到個女事主send過嚟嘅故事的確係令人非常之嬲，同埋分享出嚟都令大家可以小心啲。好，嚟，播嚟聽吓先！
女事主：事源就係有一次我陪個friend拍MV，所以識咗個哥哥。噉拍MV嘅時候我有偷睇過哥哥，因為我覺得佢做嘢嘅時候好認真、好型。返到屋企冇耐我揾到哥哥個IG、follow咗佢，結果冇耐佢follow返我，仲主動打開話題，問我係咪住屯門呀，跟住之後又話啱啱拍MV嘅時候一直都有留意到我，因為我好長腿、我好靚嗰啲。打開話題冇耐我就開始不斷同佢傾偈，佢每日都會覆我story，係噉撩我講嘢。跟住因為其實我並唔覺得自己靚啦、對於自己個樣好自卑，佢會係噉鼓勵我，讚我又高又靚嗰啲，佢令我有自信咗好多。之後佢開始約我食糖水，一開頭我唔敢啦，因為我覺得我唔敢同陌生人單獨出去，跟住我就問佢我可唔可以叫埋一齊拍MV嗰個女仔嘅男朋友出嚟，佢都話OK，跟住我都放下戒心，同佢出去食咗第一次糖水。
食糖水嗰晚我同佢傾咗好耐偈啦，佢就送咗我返屋企。返屋企嘅時候佢問我可唔可以攬我一下，我覺得攬一下唔緊要所以就俾佢攬咗啦。跟住傾偈嘅頻率都係愈來愈頻密，佢會突然之間主動向我報備、會影俾我睇佢做緊啲咩，我哋有keep住出街同keep住見啦之後，佢會成日話佢鍾意我呀、成日返緊工嘅時候都會話咩我真係好掛住你呀嗰啲啦。跟住我哋就以好似情侶方式噉相處，佢都有約我上佢studio，但其中有一次上佢studio嘅時候我已經見到佢IG對話嗰度有好多唔同女仔嘅IG，跟住返到屋企我就睇吓佢follow啲咩人，發現佢follow原來好多都係同我差唔多年紀嘅妹妹。當時我覺得唔緊要吖，可能佢頂多都係同人傾吓偈啫。跟住佢上studio嗰陣就開始鍚我呀嗰啲，噉佢見我冇推開佢佢都愈來愈猖狂。

噉後來我同佢發生咗關係，跟住佢之後就會不斷約我上酒店，總之就去到後尾每次見面佢都會同我發生性行為，但係又keep住同我傾偈，結果有一次上酒店我發現佢電話冇熄mon，先發現原來佢係有女朋友。嗰陣時我係完全唔知點算，所以我唔敢講出嚟，亦都冇選擇講出嚟，但嗰段時間我開始好hea噉覆佢，佢應該都察覺到啦。過咗冇耐，佢有次send俾我睇佢做緊咩呢，結果佢電腦冇熄mon，電腦個mon上面就有佢同佢女朋友嘅對話，我就忍唔住同佢講，我話你電腦對話冇收埋，佢就話佢想同我傾、佢有苦衷、佢想解釋。

後來就約咗喺我屋企樓下傾偈啦，佢就坦白同我講佢有個拍咗好多年拖嘅女朋友，但其實佢一早已經唔係好鍾意佢女朋友，但係佢話佢女朋友有情緒問題要陪住佢，唔可以做衰人，又話佢女朋友屋企最近死咗屋企人，跟住之後就話驚宜家再提分手佢女朋友會崩潰。佢一直狡辯話佢女朋友陪咗佢咁多年，佢唔忍心飛咗佢女朋友。之後佢有提出我哋仲可唔可以見呀？我同佢講話我唔想見佢，跟住我就返咗上屋企。之後佢IG有一直keep住同我講嘢，但我都係好hea噉覆，跟住我自己認真諗咗一排，我就unfollow加remove咗佢，跟住就冇來往喇。宜家諗返，因為事發當年我都係得16歲，我好多問題都唔識處理，我都見到自己有好多做得不足嘅地方就係點解我一開頭發現而冇即刻同佢斬纜呢？一諗返我就覺得好過份、好後悔，所以就好想分享返呢個故事出嚟，警誡吓人又好。

東方昇：嗯……你聽完覺得點呀Kneta？
Kneta：因為呢我自己睇返其實，我想講俾各位妹妹又好啦，即係迷途小羔羊又好啦，因為正常男仔approach你呢，正常一段關係係會慢慢嚟，唔會一嚟就話：我可唔可以攬你、拖你、錫你。噉通常個技倆呢都係噉㗎喇，下一步就直接跳去性行為，完㗎喇。
Dickson：你好似試過噉喎。
Kneta：唔使講啦係咪呀Dickson？喂！！！！！！！！！！！！！！！！
Dickson：都係過來人，你好熟喎。
Kneta：遇過好多，但係有試過上當有試過唔上當嘅，因為基本上個套路都係噉㗎喇，先係讚你呀，話我覺得你好好呀，大家好夾呀價值觀點點點。跟住約你出去喇，之後呢扮好似好關心你，之後就開始摸身摸勢喇。噉女仔呢個時候呢就會開始沉船㗎喇，噉佢哋就發動攻勢。
Charlie：但我覺得女仔呢特別咁細個，鍾意咗個男仔，佢仲要當自己公主噉鍚喎，仲噉樣呵護我，就覺得佢一定係我嘅唯一呀。可能佢講啲咩，就算我唔想做又喺度半推半就都會做，點知呢個男仔仲要漁翁撒網，佢發現咗都唔篤穿佢呀。其實呢一下就知道個女仔就已經沉咗喇。
東方昇：唔係淨係佢啦，佢甚至同好多女仔都有傾偈啦頭先佢都有講。
Kneta：呢個漁翁撒網都係常用嘅技倆之一，因為我聽講過有啲人佢哋唔sure自己媾唔媾到女嘛，噉咪係噉媾咗先囉。噉媾到邊個，就係嗰個㗎喇，咁唔得我咪再嚟過囉

Terry：佢哋有個特質呢，就係會講嘢好進取，點解佢會進取呢？因為譬如你鍾意一個女仔，你可能會好care，死啦，如果等間佢唔鍾意我講呢句，點算呢？但嗰啲男仔特別進取嘅原因係因為佢唔怕講錯，呢個唔得咪第二個囉，但係如果我講嘢夠大膽呢，呢個OK咗呢，咁我咪同呢個繼續發展囉
專家Dickson：同埋你呢個方法，其實有人教過我
Terry：係咩？
專家Dickson：佢話呀Dickson呀你試吓呢，你唔好淨係追求一個女仔，你要追求好多唔同嘅女仔，但我無用，我無用！唔係！我無用！
Kneta：但我又想問吓，我都蠢過啦，咁男仔係點樣俾個女仔feel到，我係自信地想追你或者我係心急地想追你，還是係想漁翁式追你嘅？
Terry：即係如果啦，我自己覺得啦，如果佢真係想追你呢，佢唔會講一啲好general但係咁chur你嘅嘢，即譬如呀你好靚呀，
東方昇：同埋佢嗰個讚，讚佢對腳好長呀好靚呀
Kneta：變態
Terry：你就睇得出佢Focus喺邊度
東方昇：就算係個女仔佢都覺得，可能作為一個男仔做嘢好認真，欣賞個男仔啲才華嘅嘢，個男仔淨係欣賞佢腳長同好靚囉
Kneta：即下次如果話你個心好靚呀，即唔係Focus喺心口啊，係你個心好靚呀
Charlie：但都未必喎，因為個女仔自卑位喺個樣度嘛，所以佢先讚佢個樣姐，可能佢自卑位喺第二啲位，佢就讚返佢第二啲嘢
東方昇：咪你起碼見到佢Focus喺個女仔身體度囉，甚至乎咪就係走嗰陣要攬，攬乜鬼啫，我有冇攬過你哋丫？無攬過你哋！其實個女仔好容易覺得嗰個係愛嘅表現，但其實係一個扯旗嘅表現
Kneta：女仔呢，我覺得好易落入個保護套入面，即呢個保護圈套入面，好單純就話噓寒問暖，你有啲乜嘢唔開心話我聽，我會陪住你，呢啲句子通常好易中招
專家Dickson：我過來人話俾你聽，都要嗰個男仔本身有啲條件先吸引到
Kneta：Sorry，sorry我錯Dickson
專家Dickson：所以大家，第一呢樣嘢唔應該學習，第二你都唔好以為係成功之道走去學呀
東方昇：咁作為女仔有啲咩方法係可以防備呢？
Kneta：係好老土哋，你要俾時間男仔去考驗佢，如果佢唔鍾意你，或者佢唔係真心鍾意你啦，佢咁短時間又拖又盛，咁快想性行為你呀，咁我覺得你唔夠真心囉，同埋呢我覺得佢好差就係淨係呃啲無知少女囉！真係為非作歹，恃住自己揸住部機
東方昇：所以我有個方法嘅，唔好同啲男仔咁早發生性行為，我覺得係咩呢，純粹係一個經濟學嘅角度，增加男仔溝嗰個女仔嘅成本
Kneta：好深呀
Terry：經濟學家
Kneta：因為我蠢呀，所以咪成日俾人呃囉
東方昇：如果你一開始就攬你，跟住半推半就錫你，你就同佢上床，咁你咪俾佢呃蝦條囉，你咪叫佢等囉，你考驗下佢，令到佢嘅溝你嘅成本增加
專家Dickson：即係吊高嚟賣
東方昇：係呀係呀！就唔係話策略嗰啲，真心去考驗佢係咪真心先，佢愛你你都要俾啲時間啦
專家Dickson：即你要比得多啲付出
東方昇：如果佢係一個呃蝦條，或者佢係漁翁撒網嘅人，見到原來我要溝你，呃你上床要咁耐，佢自然會掉低你
Terry：通常嗰啲係取易捨難
東方昇：係呀！所以呢個係一個，即唔係話好老土，唔好同佢發生性行為，呢個年代講嚟我都覺得自己好嘥氣，但係起碼要增加佢嘅成本，真係覺得佢係你男朋友，你信佢個人，你先可能做啦
專家Dickson：令你自己矜貴一啲
Kneta：仲有個對話內容呢，都可以有跡可尋囉，即唔係一劈頭就話你好靚，你要講啲有營養嘅嘢囉，即唔係第二日就話我好得閒，不如出嚟嗒下個糖水，咁樣我覺得唔OK
東方昇：同埋佢頭先揭穿左個男仔原來有女朋友啦，講嗰個藉口真係嘩
Flashback: 又話佢女朋友屋企最近死咗屋企人，跟住之後就話驚依家再提分手，佢女朋友會崩潰
Kneta：仆街啦嗰啲藉口
東方昇：嚟嚟去去都係咁，聽過萬幾次就話哎呀我女朋友有抑鬱症，黐線，咁如果係咁你仲偷食！即係女仔就唔好咁耳仔軟，就信呢啲嘢，擺明係呃你㗎喇
Terry：同埋男仔睇中咗未夠成熟嘛，16歲
專家Dickson：佢見得人少
東方昇：佢真心係欺騙左女仔對佢嘅信任，我唔會話佢蠢，我覺得佢太好心地，就算佢見到佢同好多女仔傾偈，佢都覺得呀係咪正常社交啊，見到佢有女朋友有，又話佢有情緒病，佢又信咗佢，其實唔可以咁耳仔軟
專家Dickson：大部份人係咁，因為仍然有愛嘅時候，佢想情緒主導呢，佢就覺得希望唔好係咁
Kneta：因為呢其實好容易㗎，女仔呢係非常之聽男仔講，即係感情上面。所以我覺得呢一遇到呢啲情況，佢講咩藉口，死老豆老母，自己要乞食瞓街，乜嘢都唔好聽，一定係假嘅！你有咩藉口姐？你行得正企得正，你有女朋友咪有女朋友啦，你咪講囉！踢爆咗之後我有苦衷，食蕉啦！
Charlie：踢爆完仲話，咁我哋仲有冇得見多幾面？
Kneta：真係好乞人憎
東方昇：所以無呀，我哋都係血氣方剛嘅男仔啦，都了解男仔，其實男仔就係無所不用其極，用奇技淫巧嚟欺騙女仔，咁女仔要好好保護自己啦，真係冇辦法
Kneta：但有時真係蠢過先會成長囉
東方昇：係呀所以有啲底線啦！大家好似佢咁啦，如果你有故事想同我哋分享，但又唔想我哋打俾你驚俾人認到呢，其實你可以再喺inbox同我哋分享，如果我哋覺得大家都值得聽吓，我哋都會播出嚟嘅，咁我哋都會俾意見，希望都幫到大家，同埋幫到佢