15 吋 Macbook Air已投產?! 全球最輕VR眼鏡面世、聯發科中階處理器 Dimensity 7200 預計今年首季推出｜廣東話【Price Weekly #154 2023年2月】

Price.com.hk 香港格價網 | 科技類 | Feb 27, 2023

此影片謄本由阿晨製作

★非作商業用途，本檔案版權歸版權持有人獨有★

歡迎收看Price Weekly，我們一起看看今個星期最熱門的科技新聞。如果不想錯過我們的新片，就快點Subscribe Price youtube channel，再按旁邊的鐘。

日前消委會就市面上發售嘅 14 款抽濕機進行測試，當中發現惠而浦同金章牌抽濕機，當裝咗 HEPA 空氣濾網之後，抽濕量比廠方聲稱嘅少左約13.2% 及 23.1%，而且兩部機嘅能源效益分別只係達到 2 級同 4 級，並非產品所標示嘅 1 級。負責跟進嘅機電工程署就話已經安排第三方去監察測試，結果發現抽濕量唔符合強制性標籤計劃嘅規定，會根據產品能源標籤實務守則，要求進一步測試。如果發現都係唔符合要求，就會唔畀𠴱個型號嘅抽濕機喺香港發售。對於有關今次測試結果，金章嘅回應就話正常操作係唔使裝 HEPA 濾網，個 HEPA 濾網只係贈品。而係同一個測試入便，係滿分 5 星評級之中拎到 4.5 星嘅抽濕機，就有三菱電機 MJ-E160HR-H 同 LG MD16GQWE0 。當中 LG 喺溫度 26.7 度，相對濕度 60% 嘅標準環境之下，每度電可抽取約 3 升水。而三菱電機喺溫度30度，相對濕度 80% 嘅廠商慣用環境之下，每度電更加可以抽到約 4.7 升水，唔知大家對於呢個測試結果有乜野意見呢？歡迎留言同我地傾下。

下載檔案

所有資料非作商業用途，若有內容侵權，請即通知我們移除。

講完抽濕機都講吓吸塵機，德國寶近期推出咗一款全新手提式無線吸塵機 CVC-210，機身重 535g 都算好輕巧，吸力有 15kPa，內置有可以用水洗嘅 HEPA 濾網。除左可以用黎吸地板同埋窿窿罅罅嘅扁吸刷同窄吸嘴之外，仲會跟埋抽真空吸咀，可以用黎將衣物抽真空儲存。另外比較特別既就係有個吹風配件，將吸塵機變成吹風座，用黎吹走屋企一啲擺設上面嘅灰塵。電池方面內置 2000mAh 鋰電池，可以連續用到 25 分鐘。

上年已經有傳言話蘋果會推出 15 吋嘅 MacBook Air，日前就再有關於新機嘅消息，就係話全新嘅 15 吋 MacBook Air，已經喺上個月進入生產線，並且預計會喺 4 月嘅發布會上現身。由於要備貨，所以根據時間去推算，新 MacBook 會採用 M3 處理器嘅機會唔大，相信會繼續沿用目前嘅 M2 處理器，甚至會有 M2 Pro 或者 M2 Max 版本。而另一單關於蘋果新產品嘅消息，就係早前流傳同樣會喺 4 月發表嘅，首款 AR/VR 頭戴裝置，因為有軟硬件問題需要解決，會延遲到 6 月嘅 WWDC 先發表，其實蘋果已經好一段時間無全新嘅產品線推出，今次無論係蘋果定係外界都相當重視。有指全新嘅 AR/VR 裝置上會有先進嘅手部同眼球追蹤，超高解像度熒幕以及 M2 處理器，甚至有多達 10 幾個鏡頭同感應器，所以外界都估計價錢唔會平，可能要高達 3000 美元，相信要等多一段時間，先會有較為親民價嘅版本出現。

雖然蘋果嘅 VR 頭戴裝置仲未有，不過美國公司 Bigscreen 近日就推出咗一款，號稱係全世界最輕嘅VR眼鏡Bigscreen Beyond，呢副眼鏡支援 SteamVR 平台，配備有雙眼 5K 90Hz OLED 顯示面板，視野達到 90° × 93°。但最重要嘅係裝上綁帶佢都只係得 170g，比起其他同類型產品輕唔少，不過為咗實現輕量化，Bigscreen Beyond 係完全度身訂造嘅，所以佢連相機、喇叭同連調節鬆緊嘅功能都無。而官網提到 6DoF 嘅追蹤功能，其實都要靠 SteamVR 基站。至於售價方面，Beyond 賣 US$999，預計今年第三季率先喺美國上市。

AMD 近日為旗下顯示卡推出咗新嘅驅動程式，當中 RX 6000 系嘅舊卡亦都有份，實在係唔少玩家嘅福音。新嘅 23.2.1 版Driver，可以提升舊卡嘅遊戲效能，以RX 6950XT 為例，更新驅動之後喺 4K 解析度下玩《Cyberpunk 2077》、《F1 2022》，表現就分別有 10% 同 27% 嘅提升。另外新驅動仲將原先在 RX 7900 上推出嘅功能下放到 6000 系嘅卡度，好似係 H.264 同 H.265 串流最佳化，同堆增強 AMD Link 嘅連接穩定性。所以如果用緊A卡嘅朋友，睇完呢條片之後就好去更新個Driver喇！

聯發科近日宣佈推出全新嘅中階處理器Dimensity 7200，佢同旗艦級嘅 Dimensity 9200 一樣，都係採用台積電嘅 4nm 製程技術，但就由兩粒大核心＋6粒細核心組成。而 GPU 就採用咗 Mali-G610，廠方表示這款處理器主打遊戲和攝影，用到 MediaTek HyperEngine 5.0 遊戲引擎，亦都支援最高 144Hz 更新率的 Full HD 解像度螢幕，同時支援 HDR10+、CUVA HDR 和 Dolby HDR。而攝影方面，佢最高就支援 200MP 相機主鏡頭、4K HDR 錄影，以及雙鏡頭同時拍攝 FHD 影片。根據聯發科的計畫，預計首批配備 Dimensity 7200 嘅產品，會喺今年首季推出。

獲得 Nokia 授權嘅奧地利公司 StreamView，日前就以 Nokia 名義出咗一款遊戲手掣 GC5000 。外形方面唔算太突破，基本嘅掣都有齊，內置 6 軸陀螺儀同摩打，增加打機個陣嘅震動回饋感，內置電池能夠連續用到 14 個鐘。另外可以用藍牙同 Android 電視、機頂盒，或者 Android 手機連接，所以都支援 Google Assistant，方便用語音操作，價錢方面 52.9 歐元就有交易。

評測手機、平板、電腦經常都會用到嘅跨平台跑分軟件 Geekbench，最近就出咗新版本 Geekbench 6 。開發公司 Primate Labs 指近年好多處理器都採用大細核嘅架構，所以為咗反映CPU嘅效能，佢哋就喺多核測試中作出改動，由向各個核心指派獨立任務，改為測量各個核心喺協同處理任務嘅表現。除此之外，佢哋仲亦都加入新的測試項目，好似係背景模糊、相片filter套用，以及 AI 物體檢測等等，嘗試模擬返用家用電腦同手機嘅習慣。Geekbench 6 同之前一樣都係免費嘅，只係用個陣需要上網，而且跑分結果公開，如果想離線使用，先要比錢升級做Pro 版。