夾公仔機靈感來自巴拿馬運河，而且曾一度被禁？為何在日本光速發展？｜格物冷知識｜格物致知

要講夾公仔機嘅由來，就要講下點解會諗到咁樣夾嘢啦 ！1900年代開始，美國接手「巴拿嘩」 — 「巴拿華」? 美國接手巴拿馬運河開鑿工程，當時就引入咗好多新型嘅蒸汽挖掘。機班工人都係第一次見到啲咁先進嘅儀器，所以就係個個爭住揸呢部機。有個商人咁啱就見到，於是佢就心諗︰「嘩！個個都咁有好奇心嘅？如果我將呢部機縮細，再等喺條街度畀人玩，條隊又分分鐘長過巴拿馬運河啊！再每人收返一毫子，我再起多條「巴拿嘩」...... Sorry Sorry Sorry！嚟多次，嚟多次！我再起多條巴拿馬運河都得啊！」呢個idea一揚咗，就即刻好多人爭住投資。於是1924年開始，就陸續出現咗唔同款式嘅夾公仔機︰Eerie Digger、Miami Digger同埋Panama Digger。呢幾款就係夾公仔機嘅祖先啦！當時佢哋發明嘅呢幾款機係唔使用電嘅！因為裏面係全機械運作，只要入錢落去，一轉個開關就可以隨時玩得！佢哋嘅運作模式同埋包裝設計，都係大同小異，大家睇睇啦～就真係將成部挖掘機縮細放入去，班地盤佬就可以用佢嚟練下手勢啦！

而最大嘅分別係，Eerie Digger同埋Panama Digger主要係夾糖嘅，而Miami Digger係夾啲刀仔、火機等等嘅小工具，所以Miami Digger就成為1920至到50年代最受歡迎嘅夾夾機啦！當時啲人去party去蒲，都一定會放部機喺度俾人夾㗎啦。

既然咁受歡迎，班商家就出咗好多唔同款式嘅Digger。為嘅都係博取眼球，引大家過嚟玩下。以下落嚟，我哋就會睇吓幾款1930年代嘅Digger。

呢一部1930年嘅 Nervo T Merchantman。佢嘅賣點就係後面有一個模仿蒸汽輪船做背景，好玩得嚟又有嘢睇。

至於呢一部1932年嘅20th Century Digger，仲有進階模式。正常模式就係放個錢落去，就可以喺指定幾個位夾糖；而進階模式就係開放全部位置同埋角度，指定你夾特定味道嘅糖，挑戰自己。

之後嘅Digger就已經發展到唔係Dig嘢啦，而係「Predict嘢」呀！呢一款1948年嘅Love Pilot 係玩戀愛預告，只要入錢落去，再印隻手上去，就會抽到一個形容詞，描述你未來會出現嘅愛人。然後呢幾款就直頭真係放個人入去幫你占卜添！仲有得揀阿嫲、阿媽或者阿叉。只要入錢落去，佢就會幫你讀出一張卡，講講你未來嘅運程。就好似而家去OK買包紙巾，入面就會有張運程卡咁啦。

去到1940年代，Digger已經風靡全美國，行街睇戲食飯，公園藥房遊樂場賭場都會見到有部機等喺度㗎啦。當時仲有啲旗艦店專門俾人入去玩。嘩個場咁多部機，啲店員呀真係日理萬機呀！(Oh my god LOL)正因為咁多人玩，所以呢啲Digger嘅發展商開始加入更加吸引嘅獎品，就係現金！當時呢啲夾現金嘅機叫做Neko Digger。裏面有硬幣同埋紙幣，最大面額係一蚊美金。而當時玩一鋪就要十蚊美分，梁美芬呀。(Oh my god LOL)

1951年嘅時候，事關個個(人)日日密密夾夾夾，沉迷玩Digger，成日諗住不勞而獲。所以政府頒布咗一個法案，將所有Digger都列為賭博設備，只係可以喺賭場經營經。過咗兩年嘅爭議，發展商爭取到終於可以再公開營運Digger。不過獎品就唔可以再係現金，獎品嘅價值亦都唔可以超過一蚊美金。人客要玩呢就要去相關嘅舖頭畀錢，然後店員就會出嚟開機。玩一鋪都咁鬼麻煩，所以呢個Digger熱潮就喺1953年之後正式沒落。

但係！係無消失嘅，而係轉移咗去東洋！

日本嘅夾公仔機，而家已經開到成行成市，直頭大大間舖頭入面淨係俾人夾嘢。喺日本嘅概念其實夾公仔機係屬於街機嘅一種，所以要講佢嘅發展，就要講下日本街機界嘅一場鬥爭。六七十年代街機開始流行，風靡萬千少男少女叔伯兄弟。而當時嘅街機界，可以話係三分天下，龍頭嘅公司分別係Sega、Taito同埋Namco。當年佢哋不斷推出新款嘅街機遊戲，希望可以稱霸呢一行。但係佢哋始終發覺都係各有千秋嘅，無話邊款好玩啲。所以Taito就打算入一款全新嘅街機，衝擊一下個市場，於是一場大戰就一觸即發。

1965年Taito引入一款歐洲嘅夾夾機，再改造成日本第一款抓物機，叫做「Crown 602」。當時蒲開機鋪嗰班人一係玩頭D、灣岸；一係玩太鼓、泡泡龍。呢啲電子遊戲緊係要成日對住個mon！而Taito突然之間放部抓物機喺度，成張枱咁嘅。玩家就由俯瞰嘅視角去夾嘢。呢一種新鮮感就吸引咗好多街坊嚟試下手勢，就係咁抓物機全面進場！Sega見到咁樣嘅情況，亦都有樣學樣，出咗部Skill Digger同佢抗衡。仲快快手研究埋新一代嘅抓物機︰UFO Catcher。望落係咪同而家嗰啲款差唔多呢～而呢一款機嘅重點係公仔。究竟邊一個天才諗到放啲公仔落去嘅呢？試完Sega 有班研發團隊去韓國出Trip，佢哋喺街度經常見到有班阿婆推住一架好大嘅車，上面就放滿哂公仔嘅。於是佢哋忽發奇想︰「喂啲公仔Size Fit哂我哋部新機喎！而且成本低，擺幾耐都得呀！好適合放喺入面俾人夾。」於是佢哋大手入貨，喺1985年正式開創「夾公仔」嘅玩法因為呢啲公仔係韓國款式，大家都未見過嘅，所以個個都好好奇，想夾返隻。就係咁夾公仔機大受歡迎，當時Sega每部機嘅營業額，由平均每日7500円，一夜爆上3萬円，足足四倍咁多。Sega見個勢咁好，喂唔好俾佢停啦！佢哋直接買咗當時爆紅嘅麵包超人版權，整咗一系列嘅麵包超人角色公仔。對外售價就係平均5000円一隻，但係玩UFO Catcher嘅話︰ 200円一鋪就有機會夾到佢啦！於是就再次帶起夾公仔嘅熱潮。直到1992年，Sega淨係麵包超人嘅夾公仔機就已經賺咗300億円，直接KO咗Taito，成為夾公仔機嘅龍頭呀。

不過其他公司都唔係就咁收皮嘅，成個夾公仔界其實都發展咗好多唔同嘅玩法同埋特色。例如呢啲夾番薯呀、夾寶石呀、夾蛋糕都有添！ 呢個仲勁，成把武士刀都可以夾出嚟！不過以下落嚟，我哋主要係會同大家講吓一啲特別嘅玩法。睇下夾公仔機，由90年代去到2000年代嘅轉變。嚟呀～


【𠮩𠹌】(音: liu1 lang1 ，解: 少見或者奇怪)
呢一款1995年嘅Aqua Paradise 真係好「𠮩𠹌」㗎，佢改變咗夾嘅概念，轉為「撩」。 佢係一個旋轉圓形枱嘅設計，上面放滿禮物，玩家要配合時間，用條嘢撩啲禮物落去前面個窿度，咁就可以睇到佢有咩「龍撩」(解: 蠱惑的計仔)㗎啦！

【Outgoing 】
呢一款係2000年推出嘅UFO Prize Stage，而家都見唔少㗎啦。佢嘅玩法就係「勾」。只要撳個掣，隻「勾」going向前，食正個時機，就可以勾舊嘢出嚟。不過唔好係咁勾呀～因為會勾筆(Out Budget) 呀！

【成身衡】
呢款玩法係唔可以周身痕㗎~ 因為個身一痕，你就無得成身「衡 」(平衡) 㗎啦。呢隻game最緊要嘅就係平衡，呢款夾公仔機叫做UFO Balance Catcher。佢唔係用手控制嘅，只要你企喺塊平衡板上面，用個身體去移動隻爪。不過小心，千祈唔好玩到過咗身...... 因為個身過咗嘅話，又會輸㗎啦！

【壓軸登場】
壓軸登場嘅就係呢部機啦！呢款叫做「尖~ 風~ 」（糾正中）呢款叫做「尖~東~ 」
呢款叫做「Dream Throne」（正確)，只要你壓低個軸，啲禮物就會登場㗎啦！不過佢係唔會企定定俾你壓嘅，佢有一個不停旋轉嘅台，你係要預判落刀嘅時機，啱啱好劈中中間先至得嘅。

【勾草】
關於夾公仔呢，阿輝都有啲經歷㗎，不如你同大家講下呢～

呀輝︰「嘩我呢個經歷好難忘呀！去台灣旅行，有一晚呢就食完嗰啲台式火鍋啦。咁可能唔知係咪太油太熱氣呢，我返屋企嘅途中呢，肚痛喎！仆街呀即刻要搵廁所咁樣。點知入到公廁呢一張紙巾都冇喎！但係嗰個位呢真係渺無人煙㗎，咁就好撚絕望呀。行到一半就發現有一間士多開咗，點知呢嗰間士多呢係冇人㗎喎！同埋呢唔知點解嗰啲紙巾呢放喺一個夾公仔機入面......玩９我喎！無計可施之下你唯有夾嘅～點之夾極都夾唔到，嘩已經真係超肚痛，一路夾一路捏住個肚，夾紙巾最夾緊個肛門。嗰個人行過嚟，就應該係老闆嚟嘅，咁我就同佢講呀: 老闆老闆，救命呀，救命我嘅肚子很痛呀！咁佢就話: 你係可以買的~ 跟住佢就幫我打開咗個門，原來個門一直冇鎖，佢只不過係唔知點解要擺啲紙巾落去個夾公仔機入面咁樣。咁我最後就順利解決咗。」

唔知大家有咩夾公仔經歷呢？歡迎係下面留言話俾我地知！
今集完～支持我地嘅創作嘅話，記得Comment Like Share同埋Subscribe我地啦！我地下集再見。