從澳門賭場無名小卒 一躍成風流億萬賭王 為何卻瞬間一鋪清袋？｜洗米華事件｜原子檔案

時間返去1994，年約二十歲嘅周焯華開始進入澳門博彩業，初時佢喺賭場做「扒仔」。而扒仔就係指「喺賭客旁邊吶喊助威，乘機拎打賞嘅人。佢哋仲會以教賭客贏錢為名接近賭客，當賭客賭輸錢之後，扒仔就會向對方威迫利誘借高利貸。

而喺一年之後即係1995年，21歲嘅周焯華拜入有住崩牙駒之稱嘅江湖猛人尹國駒門下。崩牙駒係澳門黑幫頭目，有傳媒曾經表示佢喺澳門嘅勢力比起當時嘅澳門總督仲大。但係1999年崩牙駒因為涉嫌以汽車炸彈計劃謀殺當時嘅澳門警察司司長白德安，而被捕入獄。

之後周焯華經常到獄中探望佢，逐漸獲得崩牙駒嘅信任同埋賞識，冇幾耐周焯華周接手咗崩牙駒部份嘅生意。其後佢借助崩牙駒嘅關係網同埋勢力，開始經營娛樂場貴賓會，亦即係賭廳。同一般賭場相比，賭廳只係會招待上流社會的豪客，每個賭局都會有大額投注。所以周焯華亦認識咗好多上流人士。

不過若果要成功打入當時被賭王何鴻燊獨大嘅澳門博彩世界，亦少不了賭王家族嘅相助。而當年何鴻燊嘅四太梁安琪積極參與何鴻燊嘅事業，為咗培植自己嘅勢力，梁安琪睇中咗周焯華。

喺對方嘅幫助下，周焯華承包咗好多賭廳，因為咁樣獲得咗賭廳之王嘅美名。除此之外佢乘住互聯網嘅興起，喺菲律賓取得網絡博彩牌照。佢致力經營博彩網站提供各式賭博，更直播真人莊家開牌，大受賭客歡迎。有指佢個網絡賭博平台有高達幾十萬會員，單單喺中國內地每月投注金額就有1000億人民幣。佢賭業有聲有色，而往後多年，佢繼續擴大業務開始涉獵唔同嘅行業。

第二章 成為愛國人士

時間到咗2007年，周焯華受到澳門一間酒店拉攏，開設賭場貴賓廳，仲成立太陽城集團。當時澳門開放賭博專營權，太陽城集團亦因為咁樣迅速發展。根據澳門日報報導指出，太陽城集團憑著貴賓廳業務賺到大量資金，周焯華就開始拓展業務至唔同的領域，包括電影、餐飲、金融、房地產、拍賣行、車業、奢侈品、旅遊娛樂、演唱會等。

喺2009年，佢投資嘅電影撲克王上映，正式踏足影視圈。之後佢多次投資電影，身兼製片人監製演員等多職。除此之外，佢更加喺菲律賓越南等地投資興建綜合旅遊娛樂度假村，仲透過收購，將業務擴展至俄羅斯。同時有傳媒指佢喺中國成立資產管理公司，為賭客提供換籌碼、追賭債、跨國匯款等服務。亦都利用地下錢莊等非法管道為賭客提供資金。

周焯華透過多種生意途徑，資產淨值至少105億港幣。而作為一個億萬富翁嘅周焯華，亦同時成為咗一個愛國人士。除咗喺事業打拼，佢亦多次參與慈善活動。佢唔單止喺家鄉肇興興建醫院同埋學校，更多次向唔同嘅機構捐款。喺2011年佢成立澳門勵志青年會，旨在透過舉行唔同嘅社會活動，積極栽培年青人。佢嘅努力亦得到咗澳門政府以及中國肯定。

不過當時已經名成利就嘅周焯華，就被指疏遠當年提攜佢嘅大佬崩牙駒。外間有傳言指出，2012年出獄既崩牙駒曾經走到周焯華嘅公司，希望對方能夠回報佢太陽城集團十分一嘅股份。不過周焯華就非常唔情願，最後只係畀咗崩牙駒當年畀人資助佢嘅同額資金就將對方打發離開。自此之後周焯華更加對呢個過往嘅老大避而遠之，只是偶爾喺場合相遇，亦只會簡單寒暄。

時間到咗2015年，佢獲委任為澳門政府文化產業委員會委員，同年佢創立澳門影視製作文化協會，仲出任會長一職。呢個係一個非營利團體，宗旨為推動澳門影視人才發展同埋推廣澳門電影。佢曾經喺人民日報嘅訪問中表示︰澳門背靠祖國，經濟社會近年發展繁盛，電影行業也是如此。

而佢掌舵嘅太陽城集團喺過去十幾年，參與投資製作65部電影。當中包括咗掃毒、湄公河行動、紅海行動等讚頌大陸警察嘅「愛國主旋律電影」。呢類型嘅電影通常都會配合內地推行嘅意識形態，弘揚內地主流價值觀。其中湄公河行動上映的時候就得到咗好多官員大力支持，更有官員親自出席電影喺北京嘅座談活動。

的確周焯華多年嚟都高調咁參與唔同類型嘅生意同埋喺傳媒前亮相，但要講到佢最廣為人知嘅事件，相信就一定係佢豐富嘅情史。

第三章 坐大腿事件

外間除咗關注周焯華嘅成就之外，佢嘅感情經歷亦備受注目。佢性格風流經常拈花惹草，唔少傳媒都形容佢係情場殺手。喺娛樂圈入面，唔少美麗嘅女星都同佢傳過緋聞，包陳雅倫、馮雪冰、松岡李娜、王秀琳。不過當中只有三段戀情得到佢正式嘅承認，而且都廣為人知。

第一段關係係佢同首任妻子楊素梅嘅戀情，喺周焯華未名成利就嘅時候，佢就結識咗楊素梅仲擦出愛火。佢哋結婚之後，由於周焯華當時仲未出人頭地，所以妻子就算有左bb都要繼續努力賺錢。可惜佢哋之後嘅關係出現裂痕，婚姻只係維持咗一年就和平離婚。不過楊素梅仍然喺1996年為佢生咗大仔，改名做周柏豪。

喺離婚之後兩年，周焯華認識咗現任妻子陳慧玲，兩人喺2005年結婚，重生咗兩個女。當時有傳媒推斷陳慧玲係介入周焯華同前妻婚姻嘅第三者，不過現任妻子陳慧玲就好錫個繼仔，亦同丈夫嘅前妻關係良好。而兩妻子都曾經喺公開活動中同場合出現，佢哋大方咁影相，相處融洽。

但有錢又有型嘅周焯華並唔滿足於現狀，有傳媒喺2014揭發佢同混血模特兒mandy lieu已經秘密交往半年，其後更有人拍咗一段喺網絡上爆紅嘅影片。喺片段中，正喺賭場賭緊錢嘅周焯華公然坐喺mandy嘅大髀上，可以見到兩個人關係非常親密。

而消息傳出之後，兩個人亦冇咩忌諱，mandy之後更加花咗九千幾萬購入西半山豪宅「珒然」嘅單位，而外界都認為呢個地方就係兩個人嘅愛巢。之後幾年兩人仍然交往甚密，由2014年至到2019年，Mandy為周焯華生咗三女一子。

期間面對第三者介入，周焯華嘅正印妻子陳慧玲都曾經兩度提出離婚，更加喺係社交平台上表示︰我從來都唔鍾意同人爭嘢，你鍾意就攞去，攞得走就攞去。但係佢最終都係畀丈夫說服留低。時間到咗2019年，周焯華畀咗mandy三億港幣作為分手費，終結長達五年嘅婚外情。

對兩個人點解分開，外界有唔少揣測。有人認為mandy一直希望得到名份，但佢用咗五年時間生咗四個仔女，周焯華仍然唔畀佢坐正，於是決意離開，之後就帶著四個小朋友長居英國。

而正印陳慧玲就同周焯華重修舊好，兩個人不時喺社交網絡上傳幸福嘅合照。周焯華更加表示︰我只得一個周太。2021年佢哋又上載個女生日會嘅照片，一家人樂也融融。而妻子平日經常喺社交平台上分享健身心得，大曬泳衣相。好多網民同傳媒都大讚佢凍齡有法，完全唔似一個年過四十、兩個小朋友嘅母親。

但正當佢哋係人前表現出幸福家庭之際，周焯華美滿嘅生活就即將完結。

第四章 白手套？

2021年11月26日，浙江溫州檢察院批准逮捕周焯華，第二日，澳門司警拘捕周焯華同埋同案嘅11人，仲移交檢察院起訴。然後澳門司法局起訴佢共289項罪名，包括係中國境內開設賭場、經營跨境賭博、犯罪集團、創立同埋指揮犯罪集團、非法賭博、洗黑錢等。

澳門檢察院指出，警方早喺2020年已經掌握咗周焯華等人嘅證據，仲對佢嘅集團進行徹底偵查。起訴書稱，以周焯華為首嘅不法集團，由2013年至到2021年期間，喺6間賭博企業娛樂場所經營「賭底面」，即係私下以槓桿加大賭博金額，賭資達八千億港幣，從中賺取至少215億不正當利益，導致澳門政府少收博彩稅82.6億，令到政府同埋多間賭博企業提出民事損害賠償請求。

雖然警方明確咁指出周焯華嘅犯罪行為，不過有人猜測一切嘅操作可能涉及內地政權高層嘅權力鬥爭。有知名嘅法學家指出，周焯華絕對唔係一個簡單嘅商人。實際上佢係國內一啲權貴家族安排喺澳門嘅人，成為佢哋嘅白手套。

而政治上所謂嘅白手套，簡單啲嚟講就係充當黑錢漂白嘅中間人。表面上係從事合法生意，暗地裏就隱藏著非法事務。例如有指周焯華拍攝愛國主旋律電影嘅目的，就係要幫權貴轉移資產洗錢。而今次捉周焯華真正嘅原因，其實係要損害呢班權貴家族嘅經濟基礎。

而至於落難後嘅周焯華就畀紛紛割蓆。早前同佢喺電影方面合作嘅內地中國藝人經紀公司，就即刻同佢劃清界線，發聲明嗰間公司同太陽城集團冇任何關係。而喺2021年12月1日，太陽城集團亦發表聲明，宣佈周焯華辭去集團董事會主席。同時佢嘅妻子亦將社交平台由公開轉為私人帳戶，行事低調。

而同周焯華關係親密嘅mandy lieu就一直冇現身同埋回應事件，不過就有消息指出，喺周焯華被捕之後，Mandy將兩個單位抵押畀博彩公司新濠澳門，所以獲得唔少網民嘅掌聲，稱佢係周焯華落難嘅時候有情有義。

而正當大眾不時討論呢件喺賭業界轟動嘅事件嘅時候，時間亦到咗案件開審之時。

最終章 「我不賭錢」

案件原定於2022年9月2日開審，但係涉案嘅21名被告中，有11人缺席聆訊。於是法院宣佈將案件押後續審。當時周焯華喺庭上否認指控，不過控方喺庭上展示多項證據，例如佢手機程式嘅錄音同埋訊息、資產文件、數據報表等。

周焯華喺庭上極力反駁，仲聲稱我唔賭錢，賭枱嘢唔太識。又質疑控方「只係靠一個excel報表就指控二百幾個罪名」。

終於案件係2023年1月18日由初級法院宣判周焯華五項罪名成立，當中包括咗黑社會罪、喺許可地方不法經營賭博罪、巨額詐騙罪、同埋詐騙罪，不法經營賭博罪，被判18年刑期。同時需要向澳門政府、5家濠賭牌主分別賠償65億同埋21.5億港幣。

當周焯華被定罪之後，雖然好多業界人士就已經紛紛割席，不過而家定係喺台灣而且敢言嘅杜汶澤就發文支持佢。杜汶澤表示周焯華令佢成為咗2012年港產片票房冠軍低俗喜劇男主角。喺佢低潮嘅時候，周焯華冇同佢割席。杜汶澤指︰佢永遠都係我心中嘅好老闆。

另外周焯華被捕之後，家人一直支持佢。大仔周柏豪喺審訊嘅時候現身旁聽，庭停後更加表示曾經到監獄探望父親。至於妻子亦有到場旁聽，更有傳聞指佢蝕3000萬沽貨，協助丈夫解決債務危機。而媒體就以患難見真情嚟形容佢同周焯華之間嘅關係。

周焯華風流一生享盡榮華富貴，但最終鋃鐺入獄。而根據澳門法律，囚犯入獄期間唔會享有假期嘅刑期寬減，即係需要服足全部刑期。但囚犯可以喺服刑滿三分之二日子後申請提早出獄，等法院審批。

以周焯華服刑期18年計算，佢可以喺12年後申請提早出獄。而周焯華現年已經48歲，無論佢能否申請提早出獄，出獄嘅時候已經年過60。咁到底佢出獄嘅時候會低調咁同家人共聚天倫，定係打算會東山再起再次投入金錢嘅世界呢？