3/2《圍爐取戀》我男友係樓奴

《片頭音樂》
東方昇：大家好呀，新年快樂！咁啊梗係講啲恭祝嘅說話先啦！
叻叻：咁拍拖嘅祝大家長長久久！
Kneta：蜜運中嘅祝大家出入平安！
專家Dickson：單身緊嘅，我祝你自求多福啦！
東方昇：所有情侶有愛情問題都迎刃而解啦！
好恭喜恭喜！

東方昇：咁我哋今日嘅問題係咩嘢呢？
導演：今日個事主同佢嘅男朋友呀，個出身有差異，就影響咗佢哋嘅關係。
東方昇：哦～好聽下先。阿月你好！
阿月：你好！
東方昇：你嘅問題係點？
阿月：啱啱上個月就同男朋友嘈交啦，咁佢就同我講話，我好開心你搵到你自己嘅興趣，專注學韓文，但我覺得你學韓文就冇前途，對你來講就冇發展。咁跟住我就糾結咗好耐，因為佢係WhatsApp嚟嘅，跟住我就面對面問佢，我就話，其實可唔可以話我知點樣冇前途冇發展？跟住佢話我，成個人生學嘅嘢都係散修修，好似每樣嘢都識少少，好似冇樣嘢係專咁樣。
東方昇：等陣先，嗰個係你男朋友嚟嘅？唔係人生教練？我聽你好似同人生教練拍拖咁喎。
阿月：我都有問佢，既然你覺得我固步自封呀，或者無進步，咁你可唔可以具體少少話我聽，我應該點做呢？即係你覺得邊一部份係需要有進步？跟住佢就話如果我知，我就唔會企喺度同你講啦！跟住佢就…如果我話到俾你聽，我就唔係而家嗰個狀態啦！有時佢講啲嘢，我都真係唔係好明…

東方昇：佢個態度係點呢？係唔係串串地㗎？
阿月：串㗎，渺渺咀…
Kneta：我想了解吓佢男朋友個背景多啲，點解咁大口氣話你懶懶閒就一世，去做啲咩㗎？
阿月：佢而家做緊Digital Marketing嘅，咁佢嘅學歷呢就係PHD，同埋同時係有好多技能，接緊唔同嘅freelance，即係例如搞網頁呀、寫code呀、影相執相呀、寫post呀…
Kneta：好多喎！
阿月：落廣告呀…
東方昇：同我一樣囉，我都係做緊呢啲嘢呀！
Kneta：有冇讀到PHD呀？
東方昇：我冇讀到PHD咋嘛，我食PHD。
阿月：咁但係我呢，就係中五畢業，或者出嚟進修啲Diploma呀Cert呀咁嗰啲囉，咁總之我就冇學位咁囉。
東方昇：咦，但係我會問咁你哋係拍拖好耐嘅？
阿月：下個禮拜就四年。

東方昇：咁點解佢啱啱開始時，都覺得冇問題嘅，點解近排會覺得有問題呢？
阿月：我都有問過佢呢樣嘢，我話你開始一齊嘅時候，都已經知道成個background，叫佢諗清楚先再開始。
東方昇：佢就話嗰時我未讀PHD 呀嘛，係唔係咁呢？
阿月：我識佢嘅時候，佢係應該差唔多讀完出嚟做嘢，跟住我都有問佢，佢冇好具體咁答我囉，真係好玄。佢話過去咗嘅嘢返唔到轉頭，我同你講目前，咁樣囉。
專家Dickson：即係逃避左個問題啦！
阿月：我就同佢講呢，我就話其實會唔會你冇比較冇傷害，你會唔會攞咗你個女同事同我比呢？
Kneta：即係有段故嘅，吓嘛？
東方昇：你知邊個嘅？係指名某個女同事嘅？阿月：佢除咗佢阿姐得一個女同事啫，坐喺佢隔離，好近，冇距離。
Kneta：黐住嘅？
東方昇：成日着短裙嘅？
叻叻：但係點解你知嘅？
阿月：因為佢有時會影佢做嘢嗰啲相我睇，跟住我就話半年前你話我聽，你個女同事痴得你好埋今日遲咗嚟睇，之後你就開始有啲唔同啦。因為佢個女同事就同佢同年啦，都係Digital Marketing，同樣都係有佢部份嘅技能嘅。
東方昇：靚唔靚過你先？
阿月：我梗係覺得自己靚啲啦！

東方昇：咁我想問你覺得佢話你唔上進，係唔係佢對嗰個女仔有意思呀？當佢對佢有意思，佢梗係覺得佢乜嘢都好啲。
阿月：其實我有問過佢，啱啱先嘈完交前幾日，我有講過話其實可以退出嘅，等你哋兩個傾到天昏地暗，乜都好啦，但係佢又話唔係，只係同佢係一個啱傾嘅朋友。
東方昇：反而我覺得呢啲情況都常見嘅，即係大家一齊嘅時候呢，可能啱feel就一齊啦，咁跟住每個人做嘢又唔同啦，社會階層又唔同啦，咁有啲唔同嘅諗法。但係反而我覺得有問題就係，佢同你講嗰個態度係將你睇低。就算可能我覺得我女朋友冇野心，我真係想有個更好嘅未來，一齊打拼，其實呢我哋諗住有個將來，不如我哋學吓啲嘢，係有用嘅，將來點樣做，一齊進步吖。佢咁樣好客氣呢，其實女仔會好舒服㗎。

Kneta：我feel到你男朋友個未來好似冇你呀。
東方昇：係呀，你覺得佢係咪有啲嫌棄呢？
阿月：係呀，因為我都有同屋企人傾佢，我阿媽都會覺得咁而家你係唔係嫌我住公屋呀？咁我係要養屋企，我有負擔，咁佢冇負擔呀嘛，佢自己搵自己洗。佢上年自己上咗車，有層樓，唔使攞錢返屋企，但係我唔係㗎嘛，我搵到錢要養屋企呀嘛，屋企啲水電煤全部都係我交㗎嘛。其實所以你哋提出話，佢嘅將來好似冇我，反而係佢會話係我嘅將來冇佢。
東方昇：點解呢？
阿月：因為佢其實一開始冇耐，其實都想結婚。咁但係佢幾年前先至啱啱PHD出嚟做嘢，咁有冇經濟基礎啦，佢工作未穩定，我哋兩個一齊未穩定吖。咁最重要嘅一樣嘢就係，如果我結婚呢，我屋企公屋呢就要除名，咁就要搬細屋，咁而我又未能夠幫到屋企人上車，或者轉居屋，咁我唔想屋企人，即係阿媽都60+，唔想佢幾十歲大屋搬細屋。因為佢呢，係一個極度需要安全感嗰啲人，佢係買好多份保險，跟住萬一有咩事嘅時候可以claim返啦。咁我一份保險都冇買㗎嘛，咁然後佢就會好擔心將來佢搵嘅錢，我有事，理我定唔理我好呢？
理我佢又會冇晒…
東方昇：哇！即係嫌棄啦。
叻叻：同埋一段關係計到咁現實嘅咩？
東方昇：我懷疑佢係唔係報復呀？嗰時我話想同你結婚，你又say no，而家我飛黃騰達啊，鬥氣定係佢真係嫌棄呀？我都覺得好似係真係嫌棄。
阿月：咁我都有同佢講，咁我有兩個家姐，萬一我真係有咩事，咁我家姐唔會見死不救嘅，即係除非我完全失去工作能力㗎啫，咁總之我有收入，我就可以幫自己㗎啦，無論係睇醫生咩都好。

東方昇：佢係唔係一個好重視錢嘅人？
阿月：佢睇錢真係睇得好緊。
東方昇：睇錢重要冇問題，如果睇錢重要過睇女朋友呢，咁就有問題啦，有冇例子呢？
阿月：即係例如好似驗樓費，即係我老細介紹$1200咁樣。咁佢前一日啱啱接完單job影相，好辛苦，由朝做到晚，先做到$1200，而要佢攞$1200去驗樓，佢會好肉赤，心理好唔平衡。然後就同佢講，得啦我冇，我都分返$600落去，跟住佢先平衡返。
東方昇：但係層樓你冇份㗎喎…
Kneta：我feel到佢係base on錢去情緒勒索佢，所有嘢唔單只係錢唔錢啦，佢連佢嗰個將來嘅人生計劃，如果係行得唔美滿嘅時候，我都要嚟到鬧你。
專家Dickson：某程度上，因為我就係拖住你呢個所謂窮嘅拖油瓶。

東方昇：嗱嗱，你問我呢，其實我哋都知道答案係點樣做㗎喇，但我想聽吓你諗住點決定啦。
阿月：其實睇佢會唔會轉工啦，因為佢而家間公司近排開始日日炒人，炒剩幾個。
東方昇：即係你望佢俾人炒？
叻叻：個問題唔係個女同事嗰度喎，係佢自己本身喎。
東方昇：點解睇佢使唔使轉工呢？係咩原因呢？
阿月：因為佢而家間公司係咁炒人，炒剩幾個人，咁應該差唔多輪到佢㗎啦。咁睇吓佢轉咗第二間公司之後，係唔係都會受他人影響，即係如果佢咁容易受他人影響，即係唔關個女同事事，係佢本身個人有問題囉。

叻叻：你同佢一齊四年，你有冇留意到佢本身都係一個好着重錢嘅人呢？
阿月：其實係自從佢上咗車之後，先咁着重錢。
Kneta：上咗居屋先開始囂張！
東方昇：我覺得睇返你其實都仲想同佢一齊㗎喎。
阿月：都係觀察期，頂唔順就諗辦法甩但甩唔到。
東方昇：講吓我哋嘅睇法先啦，因為佢會恃住自己有層樓，也文也武。
叻叻：你諗吓佢未結婚嗰下，佢已經對你呼呼喝喝啦，唔尊重你啦，更何況你結咗婚之後，點會突然間捧你上天呢？
Kneta：如果你話for我呢，我同你一齊咗四年，你做乜嘢都計啦，同埋你咁了解我嘅性格，我又冇話真係洗過你一分一毫啦，你已經喺度阿吱阿咗，又話我唔上進，又話我成日廢呀，咁我覺得呢個人嘅價值觀係好現實囉。
東方昇：因為我睇到你唔係唔上進，你好孝順，你事事以你屋企人爸爸媽媽為先。而佢就係睇錢重要過你，仲要佢有少少高高在上，有左錢之後。因為結婚對象就係，無論你係窮定係有錢，都一齊捱呀嘛！
Kneta：一齊負擔…呢樣我想講，買份保險千零蚊或者幾百蚊，你真係錫你女朋友，你咪幫佢買埋囉。
東方昇：即係各種行為佢都係睇錢多過愛你囉。所以我覺得由呢個角度，佢唔體諒你要照顧屋企，而佢冇諗住take care埋你。
專家Dickson：呢個就係我諗嗰個point，就係咁佢其實都唔係好叻啫，如果佢叻嘅話，譬如佢又夠鍾意你，我咪養埋你囉！
東方昇：男人大丈夫，啱啊！

專家Dickson：你明唔明呀？我覺得而家個狀況係咩呢，就係你只不過係想學下韓文啫，其實已經好上進啦，佢仲要覺得你學韓文廢喎。
東方昇：佢要咁，佢咪搵另一半，佢老豆老母幫佢供樓㗎囉。
叻叻：姨姨不想努力了嗰啲囉！
東方昇：我理解供樓個壓力，雖然我都未買樓，我都冇供樓。但係咁佢點啫，如果佢供樓供30幾年㗎嘛，咁佢咪呢30幾年都咁樣，咁你咪好唔開心？我會覺得佢不是一個值得付托終身…
Kneta：暫時未係囉。
阿月：我都有同佢講呢樣嘢，即係我話你好多時好多嘢呢，你都係先話人哋，唔會諗自己先。前幾日啱啱先新鮮嘈完交，就係佢星期日接完job啦，又係$1200做影相嘅，跟住然後過兩日就同我講，其實我之前病完都仲未好返，天氣又凍我都出去做咗成日，其實我都唔想接。跟住我話，下，我冇逼你接，你接咗唔係俾我㗎喎，你接咗你自己嘅。
東方昇：佢變咗樓奴呀，我覺得佢自己都身不由己呀，佢比層樓綁住咗，佢直情佢自己嘅性格都變咗呀。佢每個月：我要供樓啊！要萬幾蚊！我要計住數！佢嗰樣嘢變咗佔據佢嘅人生。

專家Dickson：同埋我覺得佢突然之間對錢銀有咁大嘅變化，係唔係佢啲朋輩都係嘉亨灣，嗰個就乜乜乜，所以就令到佢更加自卑扭曲，跟住然後就打落你度啊？
阿月：反而唔係佢啲朋輩，反而係佢個女同事個男朋友，轉左份工六萬蚊。
Kneta：六萬蚊咋。
東方昇：自己冇六萬蚊冇資格溝佢條女…
Kneta：所以佢就自卑！點解你唔努力啲？講笑啫，佢應該唔會嘅。
東方昇：我唔可以話佢錯，因為香港就係逼所有人都係跟呢個遊戲規則，難聽啲講而家啲樓冧緊，咁就大鑊啦真係，佢隨時又租唔到出去，又要揹住。
Kneta：所以佢更加大壓力囉而家。
東方昇：係呀，我明呀，就係我覺得你同佢個價值觀上係有啲分別嘅，未必行到埋一齊，甚至乎我會覺得，如果阿月係貪慕虛榮嘅女人，佢反而呢唔會打上嚟，哇我男朋友有層樓喎，乜都忍呀。你要我唔學韓文，我唔學韓文，我要令到個男朋友貼貼服服，跟住我擸咗層樓。但係你打得上嚟，其實你都唔係咁嘅人吖，你係想係關係好，所以除非你扭轉到佢呢個諗法，如果唔係我覺得比較難一齊行落去。
專家Dickson：個方向唔同，所以你哋嘅行動，將會有更多不一致嘅地方。

阿月：其實如果講行動不一致，其實一開始嘅時候已經sync（同步）唔到，佢話我啲時間俾晒屋企人冇俾佢。我約朋友食飯，我係星期一至五放工，我星期六日係唔會約㗎，已經係鐵定咗係陪男朋友，但佢都係覺得一星期先見得嗰兩日，即係覺得好唔夠囉，淨係佢話我成日都唔理佢呀，呢一樣嘢呢，我已經好困擾呀！
叻叻：佢每一個出發點，都係為咗自己諗咗先。
Kneta：所以要求勁高囉，又要佢女朋友搵到錢，又要日日陪到佢，又要叻。
東方昇：所以冇呀，狠心同佢分手啦，雖然新年流流…
Kneta：傾一傾先。
東方昇：唔傾啦，你自己決定啦，我覺得新年流流都要分手㗎啦，但係你都祝福佢嘅，就同部提款機拍拖囉。真係真係，因為你哋真係唔夾囉，所以你面對嘅問題反而係諗一個和平啲嘅方法同佢分手。
阿月：我都有思考過呢一樣嘢，但係要搵機會。
東方昇：好啊，下定決心先啦，起碼第一步。
阿月：多謝你哋。
東方昇：咁呀，新年就祝你分手成功！
叻叻：我祝你有新開始。
Kneta：祝你步步高昇。
東方昇：感謝您，拜拜。

東方昇：其實頭先阿月嘅case，其實好典型嘅，就係好多人一拍長拖呢，可能開始嗰時大家都差唔多背景，但係跟住你拍咗長拖之後呢，開始工作又唔同呀，咁變咗可能價值觀上呢，其實隨着人嘅成長都有少少唔同，咁究竟嗰兩個人可唔可以繼續行埋一齊呢？呢個情況其實大家一定要溝通，同埋包容，以錢為例，其實可能另一半嘅錢搵多咗，其實如果佢真係想同對方行落去，佢唔會諗嫌棄對方冇錢㗎，咁我有錢，咁我咪同對方分享囉，其實真正意義係共患難共富貴呀嘛。
專家Dickson：即係你所謂夠唔夠愛對方，就係你願唔願意，係你嗰個方面嗰度作出調整呀嘛，而唔係逼對方去調整。
東方昇：係呀係呀。
Kneta：好似我咁，我老公有好有唔好啦，咁正常人缺點一定會多啲㗎嘛，所以我淨係會捉住佢一個嘅優點，無限放大，就令自己好過啲囉。
專家Dickson：哇，你咁快講呢啲價值觀，你因住佢聽到。
Kneta：唔會嘅佢知，我成日都鬧佢。
東方昇：所以有時我去出席人哋嘅婚禮呢，又或者嗰啲證婚嗰啲啦，佢講嗰句誓詞就係無論富貴疾病貧窮，其實都要一同面對，其實就係講緊呢個意義呀嘛。所以當大家諗緊分唔分手，其實諗返結婚係咩先，就係一齊面對，咁你就決定到。好啦，雖然新年講埋晒啲咁唔開心嘅嘢，不過都係為咗更好嘅愛情。好，拜拜！