AI 答錯問題累 Google 股價蒸發千億美元、 MSI 新顯示卡全白色造型、S23 Ultra 聯乘 BMW 限量版 ｜ 廣東話【Price Weekly #153 2023年2月 】

擁有 ChatGPT 嘅 Microsoft日前亦都發表全新搜尋引擎，稱為新 Bing。新 Bing 搜尋引擎提供兩種 ChatGPT方式，第一種「Search」係喺傳統搜尋結果嘅右邊，顯示由人工智能提供的內容註釋，第二種「Chat」就係俾用家直接向 Bing 問問題，顯示結果就好似同人傾計咁。不過，官方話新版 Bing 唔係直接整合ChatGPT 所採用嘅 GPT-3.5，而係用咗 Microsoft 自行開發嘅新一代語言模型--「Prometheus（普羅米修斯）」，因為佢識得用最新資訊同埋會有註釋答案，所以答問題會更加準確。外國有記者進行測試，佢哋都對新版 Bing 嘅表現好滿意，仲話 Bing 識得配合表情符號嚟答問題，令到 AI 都變得人性化。

包括 RTX 4080 及 4070 MSI 新顯示卡全白色造型
依家砌機唔單止各種硬件要著重效能，外形都好緊要。MSI 就發表名為 GAMING X TRIO WHITE 嘅新版，NVIDIA GeForce RTX 4080 同 4070 Ti 顯示卡，用咗全銀白色飾面設計。三個 TORX 風扇一樣都係白色，而風扇葉片同外框相連，將氣流集中去 TRI FROZR 3 散熱系統，可以透過 Mystic Light Sync、 Ambient Link，或者同其他 PC 組件同步燈效。新嘅 GAMING TRIO WHITE 系列都配備咗雙BIOS，可按照用家需要，自由轉換低噪音安靜模式或者高效能遊戲模式。除此之外，仲會有白色版嘅 GAMING TRIO 支架跟埋，最啱襯返個白色機箱。兩款新卡預計今個月中喺台灣開賣。

無窗框都抹到 ECOVACS 全新抹窗機械人
好多時一講起抹窗就令人相當頭痛。ECOVACS 近排就喺香港推出全新抹窗機械人 WINBOT W1 PRO，配備雙向交叉式自動噴水系統，令噴灑範圍更加廣闊，亦可以根據窗戶大細選擇噴灑水量。內置大水箱同雙層過濾濾芯，一次過可以抹到 20 平方米大嘅窗戶。全新設計嘅輪胎除咗運行個陣更穩定，更有自動清潔功能，可以同時將灰塵掃除。新機可以選擇唔同嘅清潔路線，包括弓字型、重點清潔同反覆清潔，另外，亦有適用於無框窗戶嘅智慧探測模式。喺安全性方面，除咗有可以承受 80kg 嘅繩索連繫之外，系統仲會檢測到氣壓唔夠個陣，自動將吸力提升到 2800Pa 去保持吸力。WINBOT W1 PRO 會喺今個月 13 號開始接受預訂，早鳥價係 3199 元。

EOS R50支援直播拍攝 Canon最平全片幅 EOS R8
Canon 最近發表兩款新相機，分別係 EOS R8 同埋 EOS R50.當中 EOS R8 定位係入門級全片幅相機，採用 2400 萬像素感光元件，支援 4K/60p 影片拍攝同 Dual Pixel 自動對焦，以及最高 40fps 的電子快門連拍。而感光器、影像處理器同埋對焦系統都係沿用自 R6 Mark II，不過就無咗焦點控制桿。相比 R6 Mark II，R8 亦都無咗五軸防手震，只可以靠鏡頭提供嘅光學防手震。價錢係 1500 美元，係目前 Canon 價錢最平嘅全片幅相機。

至於 EOS R50同樣都係走入門級路線，價錢只係 680 美元。採用 2,420 萬像素 APS-C CMOS 影像感應器，同埋 DIGIC X 數碼影像處理器，提供 4K/30p 同 1080p/60p 影片拍攝，以及 120p S&Q 快／慢動作錄影。廠方話唔單止可以連續拍一個鐘頭影片，仲有 Dual Pixel AF 技術，可以針對人物、動物同車輛追焦。機身亦都有 micro HDMI、耳機、收音咪插位，亦支援直播攝影，連埋電池重量只係 375g。香港官網亦已經有兩部新機資料，不過港版價錢就暫時仲未公布。

暫支援流動裝置操作 YouTube 推二人同步直播
YouTube 最近針對 Live 推出咗雙人直播嘅功能，YouTube Go Live Together，俾 YouTuber 可以更容易同朋友一齊開直播。不過要用到呢個雙人 Live 功能都有符合一啲要求，首先就係開 Live 嘅主持一方訂閱人數一定要超過 50 人，嘉賓個邊就無額外要求。而主持人就要負責埋 set live 時間、開直播房間、入標題內容，同邀請嘉賓等等嘅工作，仲可以獨自享有直播廣告所帶嚟嘅收益。不過目前只係限兩個人，同埋只限手機、平板電腦等裝置做直播，暫時仲未支援電腦同相機去拍攝。

有指用 8+ Gen2 處理器 傳Nothing Phone（2）第三季現身
日前有傳言指 Nothing 將會喺今年第三季推出新手機 Nothing Phone(2)，外形就同依家嘅 Phone(1) 差唔多。喺規格方面，會採用 120Hz 自適應嘅 AMOLED 熒幕，配備 12GB RAM 同 256GB ROM。電池亦都由 4500mAh 增加到 5000mAh。最重要嘅處理器方面，有指會用全新嘅 Snapdragon 8 系列，坊間就估計係 8+ Gen2。而 Nothing CEO 斐宇早前講到 Phone(2) 個陣，就話新機同 Phone(1) 一樣都係旗艦機，只係Phone(2) 會更加高級。其實睇返 Nothing Ear 嘅規格，新出亦未必一定代表會勁過上一代。但係講到玩味性，就肯定唔會令大家失望。

韓電訊商限量 1000 部 S23 Ultra 聯乘 BMW 限量版
Samsung 最新嘅 Galaxy S23 系列日前正式喺香港搞咗發布會，比大家一次過睇晒 S23、S23+ 同 S23 Ultra，當中邊款最吸引你呢?如果鍾意車嘅朋友，嚟緊同大家介紹嘅特別版相信一定會心心眼。因為韓國電訊商 SK Telecom就推出咗 S23 Ultra 嘅 BMW M Edition，唔單止開機會有 BMW 動畫，包裝仲用咗 1986 年初代 E30 M3 嘅造型。手機殼圖案就係新一代 M3 大鼻哥窿鬼面罩。

除此之外，仲有好多有心思嘅配件，例如七種唔同時期嘅 BMW 迷你廠徽俾用家隨時換落個鎖匙扣度。另外亦都有 M series 時鐘、太陽檔夾、打氣機，仲有 BMW 歷史相簿同海報，好有收藏價值。不過限量只有 1000 部，相信都會一機難求。不過如果你想入手 S23 系列，我哋 Price 網購為大家準備咗預購優惠。除咗有豐富嘅贈品之外，仲有唔同嘅付款方式優惠。有興趣嘅朋友可以去下面嘅 link 度睇吓。

今集Price Weekly又差不多，你們最喜歡期待邊件新product呢？歡迎在下面留言告訴我們，我們很快就會有新片跟大家見面。記得訂閱Price的YouTube channel，再按旁邊的鐘。