Galaxy S23 Ultra配備2億像素鏡頭、Panasonic新洗碗碟機主打一人用、傳Netflix 4 月起推新監測措施｜廣東話【Price Weekly #152 2023年2月 】

Galaxy Unpacked 揭盅 S23 Ultra 配備 2 億像素鏡頭
期待已久嘅 Samsung Galaxy Unpacked 發布會日前終於都完滿結束。焦點當然係旗艦機皇 Galaxy S23 Ultra，採用 6.8 吋 AMOLED 屏幕，解像度係 3088 x 1440 像素，支援 120Hz 更新率。拍攝功能方面，配備最新 ISOCELL HP2 兩億像素鏡頭之外，另外兩個 1000 萬像素鏡頭，分別有 3 倍同 10 倍光學變焦，仲有支援 8K 30p 影片拍攝。新機強調夜景拍攝功能，可以係極暗環境之下影到清晰相片，同時防手震亦都有升級。另外新機仲有 S23+ 同 S23，屏幕尺寸分別係 6.6 同 6.1 吋 AMOLED，支援 2340 x 1080 解像度，主鏡頭就有 5000 萬像素。Samsung 同場亦都發表全新 Galaxy Book3 系列，分別係 Galaxy Book3 Ultra、Galaxy Book3 Pro 360 同Galaxy Book3 Pro，配備 16 吋屏幕。當中 Pro 版就多咗款 14 吋畀用家揀。全線嘅屏幕都係用 Dynamic AMOLED 2X，支援 3K 高清解像度同 120 Hz 更新率。規格方面有第 13 代 Intel 處理器，當中 Ultra 版更會有NVIDIA GeForce RTX 40 系列顯示卡。想知道更多關於今次發布會嘅新產品資料，我哋都專門有另一條影片去介紹，可以 click 下面條 link 去睇吓。

電子支付平台整合 Samsung Wallet 登陸香港
除咗新機之外，Samsung 早前都宣布會推出全新服務Samsung Wallet。新服務會將現有嘅 Samsung Pay、Samsung Pass 同 Smart Octopus整合成為一個新嘅平台，令用家喺管理同操作上會更加方便。可以喺 Wallet 入便一次過睇到所有登記咗嘅銀行卡、會員卡之外，
Samsung 都表示嚟緊 Wallet 仲可以支援埋數碼 key 同登機證等嘅服務，而新服務由即日起會陸續透過程式更新。另外都提提大家，如果轉用 Samsung Wallet 之後，就唔可以同時再用Samsung Pass 同 Samsung Pay 呢兩個 App。

14 吋屏幕只重 689g　Fujitsu 新 Notebook 全球最輕
每隔一段時間就會聽到有最輕 Notebook 嘅消息。日前 Fujitsu 發表嘅 UH-X/H1 Notebook，雖然配備 14 吋屏幕，但係重量只有 689g，只係重 12.9 吋嘅 Wi-Fi 版 iPad Pro 7g。廠方話新機咁輕嘅原因唔單止用咗碳纖維物料，喺 keyboard 同機身底部亦用咗鎂鋁合金。而規格方面，採用 Intel Core i7 - 1355U 處理器，機身連接能力亦相當齊全，包括兩個USB 3.2 Type-C 插位、兩個 USB Type-A 插位同 HDMI，另外支援 45W Type C 充電。電池使用更有 11 個鐘。售價大約 22 萬 5 千日圓。

的骰慳水兼殺菌 Panasonic 新洗碗碟機主打一人用
好多人買洗碗碟機都鍾意愈大愈好，貪佢可以一口氣洗多啲碗碟。早前 Panasonic 喺日本推出嘅新款洗碗碟機 NP-TML1反而係照顧獨居嘅朋友，因為新機嘅體積比一般洗碗碟機細得多，闊度同深度分別只有 31cm 同 22.5cm，加上採用透視設計，就算放喺蝸居都可以好開揚。而內部空間亦都算闊落，容量有 10 公升，最多可以放入 6 件高度 21cm 以下嘅器皿。另一個重點就係唔使駁來水喉，因為機底設有水箱去負責供水洗碗，用家只需要擺條去水喉去鋅盤就用到。廠方話呢部一人用洗碗碟機，唔單止比用手洗更乾淨，兼且仲可以殺菌。耗水量比起手洗更可以慳水到近八成。新機今個月中就會喺日本開賣，價錢係 37,620 日圓。大家覺得呢部機係實用定係嘥位呢？歡迎留言討論吓。

M2 Pro 性價比高 M2 Max 跑分不敵 M1 Ultra
早前蘋果發表新一代嘅 MacBook Pro，其中焦點之一就係全新嘅 M2 處理器分別有 12 核芯 CPU 同 19 核芯 GPU 嘅 M2 Pro，同埋有 38 核芯 GPU 嘅 M2 Max。而 M2 Max 嘅表現就令唔少人關注，因為 M2 Max 嘅表現竟然同 M1 Ultra 相差都幾多。從 GeekBench 嘅跑分可以睇到，M2 Max 嘅分數係15242，而 M1 Ultra 嘅分數就有 23369，兩者相差超過 8000 分，差距都幾大。咁 M2 Pro 嘅表現又點呢？佢嘅分數係 15079，同 M2 Max 嘅分數相差比較少。相比起 M1 Max 嘅 12590 分，其實 M2 Pro 嘅進步都唔算小。而我哋亦為新嘅 Macbook Pro 出咗評測片，可以 click 下面條 link 去睇吓。

嚴打帳戶共享用家 傳 Netflix 4 月起推新監測措施
早前 Netflix 已經預告要擴大展開打擊家庭共享用戶的「共享密碼」功能，向非同住者收取額外費用。最近就有消息指Netflix 將會係於4 月正式實施相關措施，系統會通過監測 IP 地址、設備 ID 同埋帳戶活動，嚟判斷用家係咪同非同住者 share account。只要睇 Netflix 嘅裝置同主 account 屋企嘅 wifi 連接，就會定為同住者。如果要保持同住者身份嘅話，就必須至少每 31 日連接主 account 屋企嘅 wifi，同埋開一次 Netflix 嘅 app 或者網站，咁就唔使再重新驗證。有唔少人就話咁做變相等於加價，唔知嗰啲用家又有咩應對呢？

加強保障閱後即焚內容 WhatsApp 推出防 Cap 圖功能
雖然 WhatsApp 已經加入圖片閱後即焚功能，但係接收者睇嘅時候仍然可以靠屏幕截圖或屏幕錄影，令 WhatsApp 閱後即焚嘅功能比人笑左好耐。
不過 WhatsApp 就係最近嘅更新入面，加入咗防止 cap 圖嘅功能，去彌補翻之前嘅𣎴足。如果係 Android 手機到開咗閱後即焚嘅相之後，想進行屏幕截圖或屏幕錄影嘅話，系統唔會出現任何通知，cap 出嚟嘅畫面會變成黑色。至於 iOS 用家，系統就會出現提示警告，出現屏幕截圖或錄影已經封鎖。WhatsApp 官方表示閱後即焚嘅相或影片都係唔可以轉發、儲存、備份或者還原，而且如果收件人 14 日內無睇個 message，咁個 msg 就會自動 deleted。咁以後用 WhatsApp 嘅私隱保障就更多。

可連接多個喇叭播放 Marshall 新喇叭充當外置充電器
Marshall 最近出咗一款新嘅藍牙喇叭 Middleton，它具備 IP67 嘅防塵防水等級，而頂部亦都多咗兩個掣去校高音同低音，但就會大隻過之前嘅 Emberton II 少少。喇叭配有2個 15W 嘅低音單元，2 個 10W 嘅高音單元，同埋一對被動輻射器，可以 360 度發聲。同時佢亦都支援 Stack Mode，用家可以透過 Marshall app將佢同 Emberton II 或者 Willen 連埋一齊用。續航力方面，佢配備 9,600mAh 嘅電池，中等音量下可以用到大約 20 個鐘。有需要嘅話，仲可以當佢尿袋咁用，幫手機叉電。Marshall Middleton 嘅售價係 $2799，黑色款已經開賣。有興趣可以上佢哋嘅官網睇睇。

高度自訂性 試玩行貨 DualSense Edge
Sony 早前就表示將會提高 PS5 嘅主機產量，吸引更多玩家加入。為高階玩家而設嘅新手掣 DualSense Edge，日前亦終於都喺香港正式開賣。咁宜家亦都到咗我哋手上啦，等我即刻同大家開箱睇先！DualSense Edge 手掣主打高度自訂性，外觀望落好似同 DualSense 分別唔大，但係特別之處在於細節位。玩家可以同手掣更換唔同嘅硬件，例如係跟機嘅搖桿，有標準、高同低圓頂三種選擇，背面嘅掣就有半圓頂同槓桿可以揀，而底部亦都多咗兩個掣比玩家Set。玩家仲可以自定搖桿同其他掣嘅靈敏度、死區等等，仲可以儲存幾組設定檔，去根據唔同 Game 去決定個掣嘅鍵程。另外新增嘅 Fn 掣，可以快速切換成另一組 Setting，啱晒同屋企人共用手掣，或者係習慣每隻 Game 唔同打法嘅朋友。跟機會仲會送一個支援盒內叉電嘅收納盒。

今集Price Weekly又差不多，你們最喜歡期待邊件新product呢？歡迎在下面留言告訴我們。我們很快就會有新片跟大家見面。記得訂閱Price的YouTube channel，再按旁邊的鐘。