iOS16.3 首度支援實體解鎖、蘋果全新VR裝置Reality Pro 傳3月發布、第三廠推改裝配件解決Switch手掣「飄移」問題｜廣東話【Price Weekly #151 2023年1月】

Price.com.hk 香港格價網 | 科技類 | Jan 30, 2023

此影片謄本由沙律製作

★非作商業用途，本檔案版權歸版權持有人獨有★

主持：Price Weekly Kiki

我哋一齊睇吓本周最熱門嘅科技新聞。

＜Sennheiser IE 有線耳機系列入門級型號 IE 200＞

嚟到兔年，Sennheiser 率先為 IE 有線耳機系列加入新成員，推出入門級型號 IE 200。我哋宜家就一齊開箱睇下啦！

耳機採用灰黑色入耳式設計，配搭編織方式嘅耳機線，感覺相當高級。音色方面，搭載 7mm 超寬廣音頻單元，官方標榜採用自然頻率響應曲線，表示諧波失真率接近零，可以令聲音精準還原。同時，耳機都擁有雙重調音功能。只要將內置耳墊裝係唔同嘅深度位置，就可以用嚟強化高頻或者低頻。用家可以按個人喜好，去調校音色。

除此之外耳機唔單止支援 3.5mm 插頭，亦都可以用到 MMCX 插針，第時想進階升級都完全無問題。

＜私隱保護能力大躍進 iOS 16.3首次支援實體解鎖＞

Apple日前發布全新 iOS 16.3 ，當中重要更新之一就係首次支援實體安全裝置。當啟用之後，如果要登入 Apple ID，就要插入有 FIDO 認證嘅實體鎖匙先得。由於 FIDO 嘅運作方式係將認證資料儲存喺使用者硬體端，唔會因為網路資料而外洩，令用家嘅私隱得到非常高嘅保護。

目前 iOS 16.3 支援最多 6 條實體鎖匙，亦可以用唔同種類嘅連接方式，包括 NFC、USB-A、USB-C 同 Lightning。官方同時列舉幾款有 FIDO 認證的實體鑰匙，例如 YubiKey 同埋 FEITAN ePass，所以都建議用家最好同時 set 兩條實體鎖匙，萬一唔見咗都有後備鎖匙可以用。

除此之外，新 OS 對於緊急電話快捷鍵亦都有更新。由過往同時撳住開關掣同增加音量掣打出，改為需要同時撳住之後再放手，再一次確定先打出。同時新 OS 亦支援第二代HomePod 以及增加 Unity 背景圖片，向黑人歷史同文化致敬。

＜有傳 3 月發布蘋果全新 VR 裝置 Reality Pro＞

講完軟件就講埋硬件消息。有傳 Apple 將會推出全新嘅頭戴式 VR 裝置，叫做 Reality Pro。採用 M2 級數處理晶片，同圖像處理器。配搭 SONY 超高解像度屏幕，續航力方面可以連續用到兩個鐘。據知 Reality Pro 會有多組鏡頭同感應器，負責眼球追蹤、手勢同手指辨識。操作方面會採用類似 Apple Watch 嘅錶冠咁旋轉，用嚟轉換 AR 同 VR 。

佢採用全新嘅 xrOS ，喺應用上唔單止有多媒體娛樂，仲可以變成 Mac 嘅外置螢幕，而且會有專用 App 例如 Safari、Photos、Message 同 Calendar 等。而喺 Facetime 視像對話個陣，更加會模擬顯示返對方嘅全身影像，但係由於牽涉龐大嘅運算能力，所以暫時只可以做到一對一嘅視像通話。

下載檔案

所有資料非作商業用途，若有內容侵權，請即通知我們移除。

唔知嚟緊 3 月發佈會，會唔會見到真身呢？

＜提供 34 小時續航力瑞典 Urbanista 推太陽能無線耳機＞

針對可持續發展，好多品牌都嘗試喺產品加入環保元素。瑞典耳機品牌 Urbanista 前排就推出可以用太陽能充電嘅無線耳機 Phoenix。

耳機內置 10mm 動圈單元，而佢最特別地方就係充電盒採用瑞典 Exeger 公司嘅 Powerfoyle 太陽能電池，同埋一塊 1.3mm 嘅超薄太陽能板。廠方話當充電盒充滿電之後，可以提供 34 個鐘續航力，而耳機嘅續航力就有 8 個鐘。之但係因為要遷就塊充電板，所以充電盒都比較大個，淨係個盒就重 72g，連埋耳機就重 80g。Phoenix 現售賣為 $149 美金。

＜專為跑友而設 Sony「掛住聽」耳機 Float Run＞

接住介紹另一款同樣都好有特色嘅耳機，就係 Sony 新推出嘅離耳式 Off-ear 無線耳機 Float Run。呢款專為跑友而設嘅耳機，特點係用咗掛頸加掛耳式設計，帶咗之後唔會塞住耳仔，但又可以好穩陣咁掛住喺耳朵，喺做運動個陣除咗聽到音樂，仲可以聽埋周圍環境聲，減少因為太過專注聽歌而發生嘅意外風險。

耳機內置 16mm 驅動單元同埋收音咪，有 IPX4 防水等級，支援通話功能、藍牙 5.0 同埋快叉，內置電池可以連續用到 10 個鐘，而待機時間更加長達 200 個鐘，足夠跑完成個全。新耳機下個月初喺日本開賣，香港 Sony 網頁就暫時未見到相關資料。

＜第三廠推改裝配件 Switch 手掣「飄移」有望徹底解決＞

唔知玩開 Switch嘅朋友，有無遇過Joy-Con嘅「飄移」問題呢？雖然坊間有唔少方法可以整返好個掣，但其實唔少人都反映只要玩多一排，個掣又會自己開始「飄移」。

最近一間專賣遊戲配件嘅公司 Gulikit 就出咗一個聲稱永遠都唔會「飄移」嘅 Switch 專用蘑菇掣。根據官方嘅講法呢個掣嘅設計同原廠個個好唔同，佢採用咗 Hall Effect Sensor：即係利用磁場去偵測 Joystick 嘅動作，所以搖杆唔會有摩擦，亦都唔會出現「飄移」嘅問題。呢個蘑菇掣一對賣 29.7 美元，咩版本嘅 Switch 都用到。但要注意嘅係，自己幫 joy con 換掣都唔算容易，所以有興趣 diy 嘅朋友，要做定心理準備。

＜按鈕齊全多功能操作　Yawman 發表模擬飛行專用手掣＞

有玩開 Microsoft Flight Sim 嘅玩家都知道，要齊哂成套硬件 PANEL 模擬真實飛機駕駛艙入面嘅實體制真係閒閒地都 5 位數字。有好多玩家都會用 Xbox 或者 PS 手制去控制，當好似打機一樣。美國公司 Yawman 就推出專為 MSF 而設嘅手制 Arrow，手制設計同 Xbox 手制外形好相似，但就多左好多唔同嘅實體鍵，例如會有兩個唔同功能嘅冬菇掣。一個係控制 Pitch and Roll，而另一個係控制鏡頭視點。另外右邊有兩個 Sliders，可以做油門同襟翼，同時左下仲有 Trim wheel。
而最有手感應該係用食指操控嘅 Rudders ，係模擬真實用腳控制方向嘅 Pedals。仲有 6 個按鍵做其他嘅飛行設定。呢個手制設計可以令原本玩 Flight Sim 硬件門檻大大降低，令到就咁一部 Notebook 接駁 Type- C 線就可以玩到，雖然同飛機駕駛艙仲有一段距離，但係相比用普通手掣玩都算比較有真實感。

＜Beta 版揭正研發新功能 WhatsApp 可分享原尺寸相片＞

好多人都知道，如果用 Whatspp Send 相畀人嘅話張相喺會有壓縮，雖然可以幫手機慳返唔少儲存空間，但係張相既解像度就降低左，對於要求高解像度既朋友就有啲唔方便。

不過最近有人喺 WhatsApp 最新 Beta 版之中，發現當用戶選擇分享相片畀其他人既時候喺繪圖工具中會出現一個新嘅設定，用戶可以喺當中選擇用原相畫質發送，唔一定只可以 send 低清相畀朋友喇！

不過呢個功能仍然係處於開發階段，仲未知幾時會正式推出。

＜Wordle 風格遊戲大熱　Quordle 被美國韋氏詞典收購＞

前年年尾推出嘅 Wordle 靠每日估英文單字嘅玩法大受玩家歡迎，上年更成為全球同美國搜索次數最多嘅單字。之後畀紐約時報用 7 位數字美金收購，同時亦都衍生唔少同類型遊戲，甚至有數字版同中文版。

其實唔少後來者都一樣成功出頭，例如估歌名嘅 Heardle 都有唔少玩家，結果就畀 Spotify 收購。另一款比 Wordle 難度更高嘅 Quordle ，要求玩家喺九次機會之中猜出四個由五個字母組成嘅單詞，同樣被人睇好。由美國詞典出版商韋氏詞典 (Merriam-Webster) 出手收購，不過就無透露收購金額。