評測獲低分Dyson指誤導消費者、Philips新風扇AI偵測吹風暖氣兼淨化、Google Home疑正研發新一代Chromecast｜ 廣東話【Price Weekly #150 2023年1月 】

而報告排頭 3 位總評分都係 4 分，大家可以參考以下順序：

Miele Triflex HX2 Cat&Dog $7588

Dyson V12 Detect Slim Absolute $5980

LG A9T-Ultra $9280


＜吹風暖氣兼淨化 Philips 新風扇靠 AI 偵測＞

講完吸塵機都講下風扇。Philips 新出嘅 Air Performer 3 合 1 風扇暖風空氣清新機 AMF870 ，採用無扇葉設計，外形都幾有份量，高度有成 1062mm 。唔單止有風扇、暖風同空氣清新功能，仲用咗 AI 人工智能，會因應室內環境狀況同埋所在位置嘅室外數據，例如溫度、空氣質素同埋 PM 數值，以及所處空間嘅大細，去調校風速、溫度同空氣淨化功能。而且透過機身屏幕或者專用手機 app，可以睇埋室內過敏原同氣體數據。

新風扇嘅潔淨空氣輸送率每小時有 270 立方米，採用陶瓷發熱同埋 10 段風速，可以喺 3 秒內發熱同埋開始吹出暖風。底部內置 NanoProtect HEPA 濾網可以去除 99.97% 細至 0.003 微米嘅超微細粒子，價錢係 6988 元。

另外都有白色嘅 AMF765 ，無咗暖風功能，同埋少左室內過敏原同氣體感測器，外形亦都窄身啲，高度只係比 AMF870 少 2mm。其他功能就同 AMF870 一樣，價錢係 5988 元。


＜超薄洗衣機 RO 飲水機 Toshiba 蒸氣焗爐駁 app 烹調＞

剛剛 Toshiba 都舉行左 2023 年新品巡禮，針對香港嘅蝸居市場，發表嘅家電都會比較窄身，而且可以一機多用。首先有皇牌產品：纖巧蒸氣焗爐，容量升級到 20L，而且可以連接專用嘅 TSmartLife APP，用家就可以喺 app 度做遙控操作，在手機㩒個制就可以做好烹調 Setting。
之後有以超薄身作為賣點嘅 T15 系列前置式變頻洗衣乾衣機，機身以極纖薄 525mm 設計，有洗衣 8 公斤及乾衣 5 公斤嘅容量，就真啱哂香港寸金尺土嘅單位嘞。

仲有 RO 座檯式飲水機 TWP-TSR75SHK，特別之處係採用創新 RO 逆向滲透系統有效去除 110 種有害物質，淨水箱內置 UVC 燈可以抑制細菌滋生，售價 $3,180。


＜測試版加強 eSIM 功能 Android 13 實體 SIM 卡資料轉 eSIM＞

蘋果近年積極推動 eSim，喺美版 iPhone 14 系列甚至有純 eSIM 版本。而 Android 陣營方面，亦都準備加強 eSIM 嘅應用。喺最新嘅測試版 Android 13 QPR2 Beta 2 入面，就有人發現更多有關 eSIM 嘅功能。例如將實體 SIM卡資料轉移到 eSIM，甚至可以將兩部同品牌手機嘅 eSIM 資料進行快速轉移，唔使再經電訊商先可以開通新 eSIM。對於換手機嘅用家就更加方便，相信亦都有望加快 eSIM 嘅普及。


＜Google Home 測試版洩密 疑正研發新一代 Chromecast＞

跟住係Google 測試版流出嘅新聞，就係 Google 嘅 Chromecast。雖然目前 4K 版嘅 Chromecast 喺規格上已經支援絕大部分頂級制式，例如係 Dolby Vision 同 Dolby Atmos。不過喺 Google Home App 嘅測試版入面，就發現一個代號叫 YTC 嘅裝置。根據過往經驗之前 4K 版 Chromecast 嘅代號叫做 YTV，而 1080p 版本就叫做 YTB，所以估計呢個叫 YTC 嘅裝置好大機會就係研發中嘅新一代 Chromecast。

不過現時未有流傳相關嘅規格流出，但係相信增加記憶體同支援 AV1 Codec 解碼都係好多用家希望加入嘅功能。

大家對新 Chromecast 有咩期望呢？歡迎留言話畀我哋知。


＜Samsung 2 億像素感光元件 傳成為 S23 Ultra 秘密武器＞

Samsung 嘅機皇下個月初就會現身，新機規格自然成為外間焦點。而之前 Samsung 發表嘅全新感光元件 ISOCELL HP2 ，相信好大機會會應用喺新機 S23 Ultra 上面。佢有兩億像素，面積有 1/1.3 吋，單一像素感光面積有 0.6 微米，支援 4 像素至到 16 像素合併。除此之外全新感光元件仲支援，最高 8K 30fps 影片拍攝，而且加入雙垂直傳輸門 D-VTG 技術　，減少過度曝光嘅問題。

據廠方所講呢個全新感光元件嘅快門延遲比過往產品更少，同埋仲會有 Smart ISO Pro，可以將唔同 ISO 嘅影片合併。究竟 S23 Ultra 會唔會用呢款感光元件？好快就會有答案。


＜原來一個 Short Cut 已做到 日女用 9 小時尋 Excel 最底排＞

無論係返工定返學，好多人都會用到 Excel。不過究竟 Excel 最多可以有幾多排（ROW）呢？日本有位女主播就喺一個節目分享自己嘅經歷。話說佢話有日喺 office 用緊 Excel 嘅時候，因為覺得好無聊，於是決心搵出呢個答案。結果一直撳一直撳，撳咗 5 個鐘之後，因為太肚餓而將呢個重任交咗畀另一位同事。而呢位同事亦都不負所托，兩個人最終花咗 9 個鐘頭，成功搵出答案就係 1,048,576。雖然佢地嘅努力好值得欣賞，不過有網民就話其實同時撳 「ctrl」同「向下掣」呢個 short cut key，就可以即刻去到 Excel 嘅最底一排。所以話：識得 Google 搵答案，係好緊要！