CES 2023｜LG 真・無線電視、Samsung 狂攻 QD-OLED、處理器全面變天｜廣東話【Price Weekly #148 2023年1月 】

音響方面，LG 都發表咗兩款新 soundbar SC9 同 SE6，支援 Dolby Atmos、DTS:X 同埋 iMAX Enhanced。亦都有 LG 最新嘅三維聲音技術 Triple Sound Optimize營造虛擬嘅中層聲音，加強空間感，同時都支援 VRR、ALLM 同 4K 120Hz。另外新 Soundbar 提供 WOW Orchestra 功能，可以同無線方式同其他支援 WOW Cast 產品連接，令音場可以更廣闊。

LG 喺會場上亦都展示全新 Gram Style 手提電腦，以第三代 Gorilla 玻璃同納米鎂合金作為主要物料，16 吋型號只係重 1.2kg。除咗夠輕，新 notebook 另一個特別嘅地方，就係用上隱藏式 touch pad。當手指喺 touch pad 上掃過個陣先會顯示 touch pad 嘅範圍，都幾有新意。

其實除咗影音電腦產品，LG 都有全新玩意。好似呢個叫做 Breeze 嘅耳機，唔單止識得播歌，仲會因應用家嘅腦電波活動，自動播放音樂或者 ASMR 音頻，幫助用家可以瞓個好覺。同埋仲識得測量睡眠模式，睡眠姿勢以及淺深層睡眠時間等等。

而另一韓國品牌 Samsung都有唔少技術改進。上年年底推出品牌首個 QD-OLED 電視 S95B，已經預視到今年焦點繼續都會係 QD-OLED。喺會場上面Samsung 就展出第二代 QD-OLED，相比起第一代，新一代採用第二代面板，峰值亮度提升到 2000 nits，唔單止令螢幕光左，更提升每種顏色嘅純淨度。除左 55 吋 65 吋外，仲有新加入嘅 77 吋，相信鐘意睇電影嘅用家同高要求嘅 GAMER 都會好期待。

另外發布會上面，Samsung 都花咗唔少篇幅去講智能家居，宣布推出全的智能家居管理裝置 SmartThings Station。作用就好似 Hubs 連接屋企嘅智能裝置，例如用嚟控制燈光、窗簾。Samsung 亦都加強同飛利浦智能燈光 Hue 嘅整合，可以喺 Samsung 電視上面同時見到 Hue 嘅狀態，甚至控制燈光。

講到智能家居，當然唔少得一眾家電。Samsung 亦發表咗最新嘅 Bespoke 4 門 Flex 雪櫃，櫃門裝有 32 吋大熒幕，操作更加方便之外亦可以用嚟播放影片。廚電方面就有具備 AI 功能嘅 AI 焗爐，當烤焗個陣會用內置鏡頭拍攝住，再透過 AI 去判斷食材嘅烹調過程，以及具有燒燶偵測。焗爐系統可以自動分析用家嘅健身數據同飲食目標，再依據食材向用家適合嘅菜式。

今年會場上嘅耳機唔算太多，JBL 展出嘅 Tour Pro 2 無線耳機就受到唔少人嘅注目。除左佢有 10mm 單元、ANC 同 IPX5 功能之外，佢個差電盒仲裝咗個 1.45 吋 LED 熒幕，用嚟睇通知、音樂同有關耳機嘅資訊。

唔知大家又會唔會習慣拎個差電盒出嚟睇呢？同場 JBL 都發表咗 Quantum 電競耳機系列，型號係 Quantum 910P 同 910X，兩款都採用 50mm 單元，具有 ANC 功能，支援 7.1 環迴聲效同頭部追蹤空間音效。另外仲有以環保物料製造嘅 Go 3 Eco 同 JBL Clip 4 Eco 手提喇叭，支援 IP67 防水防塵。

而最令人驚喜嘅就係 Spinner BT，唔單止係黑膠唱盤，更支援藍牙 5.2 同 aptX HD，兼且內置擴音機，直接駁喇叭就聽得。

而 Sennheiser 發表嘅 Conversation Clear Plus，同樣都好有新意。佢唔單止可以聽歌，講電話，甚至有埋 ANC。不過佢真正嘅身份其實係一對助聽器，仲可以調校環境音量，售價係 850 美元。

嚟到電競環節，今年可以話係相當熱鬧。先講 Alienware，隨地展出旗下首部 500Hz 電競熒幕，採用 Full HD IPS 面板，支援 NVIDIA G-Sync 同 DisplayHDR 400。雖然暫時未知價錢，不過 3 月就會係北美開賣。

Alienware 另一款重點電競新產品就係 m18 notebook，配備 18 吋熒幕相當有份量，有 165Hz Quad-HD 同 480Hz FHD 兩個選擇。另外新機採用 Intel 第13 代 HX 處理器同埋 NVIDIA 最新 GPU。新機係散熱方面都更重手，合共有 7 條熱管同 4 個風扇，排氣量提升咗 25%。

除咗 Alienware，兩個台灣電腦品牌對於電競產品一樣好積極。華碩 ROG 推出採用 Mini LED 嘅 Nebula Display，有 1024 區控光，支援 4K 120Hz或者係 1080p 240Hz，同時針對第 13 代 Intel 以及 AMD Ryzen Zen 4 CPU亦都加強散熱效能，例如散熱風扇增加到 3 個，同時亦增加導熱管數目。新機方面，就有 Strix SCAR 16 / 18 系列，熒幕由上代 15 同 17吋升級到 16 同 18吋，而 Zephyrus M16 就採用 16：10 嘅 16 吋熒幕，提供 160W 總散熱力。

另一台灣電腦品牌 Acer就發表 Nitro 16 同 Nitro 17，分別有 16 吋 同 17.3 吋熒幕，處理器可以選擇 Intel 13 代嘅 i5 或者 i7，仲有 NVIDIA RTX 40 系列顯示卡，設有兩個 Thunderbolt 4、HDMI 2.1同三個 USB 3.2 Gen 2 插位。

講完電競嘢我哋依家再睇埋電腦硬件，首先 Intel 正式發佈咗第13代 Core 嘅 Notebook 處理器，今次推出嘅型號一共分咗四類，分別係追求極致效能嘅 HX 系、高效能嘅 H 系、輕薄商用嘅 P系以及超輕薄嘅 U系。不過當中最矚目嘅一定係最勁嘅 Core i9-13980HX，佢由8個 P-Core 同16 E-Core 組成，擁有 24 個核心，而最高時脈高達 5.6GHz，好適合用嚟剪片或者做 3D Rendering。

另外舊年被 Intel 放棄嘅 Pentium 同 Celeron 系列，今年亦都以 Intel Processor 呢個新名回歸，新系列定位同之前類似，主要針對教育市場以及入門級嘅電腦。首批登場嘅型號有 N100 與 N200 兩款，當中四核 N200 處理器比起前代 Pentium Silver N6000效能同圖像表現，就分別提升有 28% 同 64%。除咗 Notebook 處理器，Intel 亦都喺 CES 加推 10 個 Non K 系嘅 CPU，補齊返舊年9月底發佈嘅 13 代 Core 系列。

而打算過年想砌新機嘅朋友，嚟緊亦都會有個平啲嘅選擇喇！睇返官方資料，Non K 系嘅 CPU 主要規格同 K 系列差唔多，主要分別在於時脈、功耗同價格。以 i9-13900 為例，24 核心、32 線程嘅規格，同 13900K 完全一樣，只係佢嘅P-Core 同 E-Core 時脈低咗 0.2GHz 及 0.1GHz，而 Max Turbo Power 就少咗 34W。所以如果你唔超頻嘅話，兩者嘅性能其實差得唔多，而平 US$40 嘅 Non K 版可能仲更加抵玩。

除咗intel，AMD 亦都喺 CES 推出咗幾款新CPU，補完成個 Ryzen 7000 系列。不過當中最令人興奮嘅都係3款採用咗 3D V-Cache 嘅Ryzen 7000 系列 CPU，因為呢3款CPU擁有大容量嘅Cache，理論上遊戲表現會更加強勁。而當中最高階嘅 Ryzen 9 7950X3D，Level 2 加 Level 3 嘅Cache總容量達到 144 MB，更加好有機會成為最強嘅「遊戲CPU」！3款新處理器都會喺 2 月上架，實際嘅效能係點都要試過先知。不過睇返之前 5800X3D 超強嘅遊戲表現，今次 AMD 呢3款新U都真係幾值得期待。

睇完處理器，我哋跟著再睇埋顯示卡。NVIDIA 宣佈將 RTX 40 系列帶入Notebook，加埋啱啱提到 Intel 13代 Notebook 處理器，相信 Gaming Laptop 好快會改朝換代。不過 NVIDIA 就無講到嚟緊會出啲咩型號，只係話 4090 同 4080可以駁到3個mon 打機，並且已行到4K 60fps。而主流嘅 4050、60 同 70 性能亦都拍得住上代嘅 3080，可以喺 2K 解像度下穩定出到 80 格。配備新顯示卡嘅Notebook 預計會喺 2月頭登場，就好似 MSI 佢哋已經率先宣佈咗旗下嘅 Titan GT77HX會採用 40 系列嘅顯示卡。

我哋之前一直都有同大家跟進Sony同Honda 聯手搞電動車嘅進度，雙方係舊年6月成立嘅Sony Honda Mobility亦都終於喺今次 CES 展出實物，有真車到場。新車名叫 Afeela，採用 4 門 coupe 設計，最搶眼就係車頭條 media bar，唔單止負責照明，仲可以顯示充電狀況。有關 AFEELA 車內嘅智能系統，暫時就未有詳細資料，但就見到車外有至少 45個鏡頭同超聲波感應器用嚟監察車外四周環境。之前有傳新車會採用 PS5 嘅系統，不過今次發表會上面就未有講到相關資料，而且距離交車時間仲有排，變數仍然十分高。廠方透露 2025 上半年會喺北美開始接受買家預訂，年底會正式開售，去到 2026 年春季先會交車。

而係發布會上面，SONY 同時宣布賽車大作 GT7將會推出 VR2 版本，喺 VR2 發售當日，即係下個月 22 號，就會同時推出更新檔，準備入手 VR2 嘅 GT7 玩家就要留意喇。

其實愈黎愈多汽車品牌選擇喺 CES 發表新技術，甚至係新車。除咗 SONY 之外，寶馬就展出咗概念車 i Vision DEE，特別嘅地方在於車身用咗 E Ink Prism 3 可變色電子紙薄膜，能夠隨時改變成個車身顏色、部分唔同顏色，甚至做出唔同嘅花紋 pattern。

-完-