2022年科技界大事回顧．到底發生過甚麼事？｜純 eSIM 成新趨勢？｜M2 晶片版圖擴張｜手提遊戲機百花齊放｜ 廣東話【Price Weekly #147 2022年12月 】

除此之外，今年嘅摺機發展亦都愈黎愈成熟，當中 Samsung 嘅 Galaxy Z Fold 4 同 Flip 4，雖然只係小改款，不過熒幕略略大左之外，仲係第一部有 IPX8 防水嘅摺機。加上盛傳 Google 出年會發表 Pixel Fold，出年嘅摺機市場，相信會更加熱鬧！

講完手機，就講吓佢嘅好拍檔 － 智能手錶，今年 Apple 為打開新戰線而推出嘅 Watch Ultra，用咗鈦金屬錶殼兼藍寶石玻璃錶面，主打上山下海玩極限運動。不過價錢唔算平，聲勢似乎唔及 Apple Watch，但係都好令人期待佢嘅下一代。

另一方面，Google 都發表咗佢哋第一款智能手錶Pixel Watch，但係功能上仍然有進步空間。例如唔支援無線差電，加上市面上已經有唔少 wear OS 嘅智能手錶。最重要香港仲未有行貨，亦都令 Pixel Watch 喺香港嘅話題性一般。

嚟緊一年嘅發展又會係點呢？歡迎大家留言討論吓。

而喺硬件方面，處理器市場喺今年可以話相當之激烈。首先喺 MediaTek 發表全新 9200 晶片，採用第二代 4nm 製程嘅八核 CPU，包括 Cortex-X3 3.05GHz 主核芯，仲有 11 核芯嘅 G715 GPU，性能比上代提升 32%。咁宿敵 Qualcomm 又點呢？

佢地係年尾發表Snapdragon 8 Gen 2採用全新 1+2+2+3 架構，主核芯同樣係 Cortex-X3，另外仲有兩個 Cortex A715同Cortex A710，同埋 3 個 Cortex-A510。跑分成績方面，兩者亦都十分接近，隨住未來一年更多用新 U 嘅手機推出，相信競爭會更加激烈。

今年另一單大家都好關心有關處理器嘅新聞，相信都係 Apple 嘅 M2 處理器。自從 2020 年發表 M1 之後，等左兩年終於都出現 M2，新 U 採用第二代 5 納米製程，CPU 比 M1 快 18%，GPU 亦都快咗 35%，神經網絡引擎方面更加有 40％ 增幅。而率先採用新 U 嘅機種，就有最新版嘅 MacBook Pro 同 MacBook Air，相信未來一年將會有更多機種會用新 U。話唔定仲會有升級版 M2 出現。

對於鍾意砌機嘅朋友嚟講，今年最轟動嘅新聞絕對係 NVIDIA 推出 RTX 40 系列顯示卡，新卡無論係規格同效能方面都有大幅進步。不過新卡推出之後都惹來唔少風波，例如發生多宗過熱著火事件，最終發現係因為電源線散熱出現問題。另外 ，當中 RTX 4080 原本分為 12GB 同 16GB兩個型號，不過 12GB 嘅表現就惹嚟外界唔少意見，最終廠方從善如流改名做 RTX 4070，預計下個月開售。

嚟到影音方面，今年可以話有開心，亦有唔開心。首先就係推出超過 22 年，先後經歷 Classic、mini、nano、shuffle 同 touch 嘅 iPod 系列終於宣布停產，完成推動串流音樂嘅歷史任務。有人退出市場，有品牌就積極加入戰團。講緊嘅就係 Dyson Zone 空氣淨化耳機，呢款頭戴式降噪耳機唔單止可以聽歌，仲連埋個空氣淨化口罩一齊用，戴上之後充滿科幻感，出年 3 月就會喺香港發售。

而家居影音喺 2022 年嘅發展，相比起其他，似乎就比較遜色，好似講咗都已經一段時間嘅 8K 電視，普及程度唔單止比想像中慢，而且因為歐盟收緊電視能源效益規定，令到耗電量比較高嘅 8K 電視達唔到標準，好大機會喺出年 3 月開始絕跡歐洲市場。

而 4K 電視依然喺目前市場主流，Samsung 喺今年終於發表旗下第一部QD-OLED 電視 S95B，採用量子神經網絡處理器，支援 HDR10+、Dolby Atmos同主體追蹤環迴聲效，仲有 4K 120Hz 顯示。講開 HDR，喺今年最新版本嘅 Apple TV+都新加入支援 HDR 10+ 制式，同時亦將原本 A12 Bionic 晶片，換咗同 iPhone 14 同級嘅 A15 Bionic 晶片，對於愛玩家庭串流影音嘅朋友應該都係個好消息。

遊戲界方面，由發表到宣布推出香港行貨，一直都係機迷話題嘅 Steam deck可以話令手提遊戲機市場增加唔少生氣，但係亦都令唔少準玩家好怒氣，因為港版預計今年 12 月開始派貨，點知過程相當混亂，有買家投訴無收到發貨電郵，亦有人投訴只係收到個機座，部主機就無咗影。不過隨住派貨逐漸穩定，相信唔少人都已經收到機。

除左 Steam Deck，Logitech 同 Razer 喺今年都分別發表新機G Cloud 同 Edge，另外仲有 AYANEO 嘅 AYANEO 2，我就好期待有更多嘅手提遊戲機出現，唔知大家又點睇呢？

輪到家用遊戲機喇，雖然有傳 PS5 出年會發表 Pro 版，不過喺 22 年就只得 PlayStation VR2 同大家正式見咗面，新機嘅規格都有唔少改進，例如每邊熒幕採用 2000 × 2040 像素嘅 4K HDR OLED，提供 110 度可視角度，而且仲有中心點渲染、內向外跟蹤同眼球跟蹤功能，支援 Tempest 3D 音頻技術，個頭戴裝置仲有回饋功能。不過 VR2 只可以駁 PS5 先玩到，而且亦唔支援上代 VR 遊戲，下個月香港就開始派貨。

今年通訊辦正式發出 WiFi 6E 的牌照，加入咗 6GHz 頻段嘅 WiFi 6E，可以話係將 WiFi 帶入新時代。無論係支援 WiFi 6E 嘅裝置，定係配備 WiFi 6E 嘅產品，係今年都陸續登場。而我哋之前亦都有片詳細講解 WIFI 6E同介紹相關產品，咁唔知踏入新一年大家又有冇考慮考慮升級 WiFi 6E提升上網體驗呢？

嚟到最後一單 2022 年科技界新聞，大家又估唔估到係邊一單？就係 Tesla CEO Elon Musk 入主 Twitter，唔單止收購過程一波三折，就算成功收購之後依然風波不斷。首先係大規模裁員，然後大量變賣 twitter 總部資產，跟住又更改藍剔制度，令到唔少假 account 出現，連殿堂級作家 Stephen King同 NBA 球星 LeBron James都忍唔住出聲炮轟。

雖然係咁，但係 Twitter 嘅戰局亦未有停止嘅跡象，11 月更出現美國記者帳號被刪除事件，經過一輪擾攘之後，12 月初 Elon 突然搞咗個投票活動，問網民佢應唔應該繼續做 Twitter CEO，結果有 57.5%超過 1,750 萬人認為佢應該辭職，之後 Elon Musk雖然應承會離任，不過後來又反口話藍剔帳戶先有投票資格，睇嚟呢場 Twitter 鬧劇應該仲會有排做。