🚒用叉救火？用鬍鬚過濾毒氣？古代消防有趣史｜格物冷知識｜格物致知

由搬水到馬嚟拉

救火就用水，現代都好方便㗎啦，條街有消防栓、大廈裏面有消防喉、消防車又可以裝啲水過去救火添。不過以前啲人要用水救火，唔係咁易㗎。未有消防系統之前大家救火就用最原始嘅方法，就係傳水啦。美國嘅開國功臣Benjamin Franklin就係初代嘅傳水隊嘅代表。

Franklin 1706年喺美國嘅波士頓出世，1711年波士頓大火當時五歲嘅Franklin親眼睇住好多人無家可歸失去至親，所以佢大個咗之後就好想親手組織一隊救火隊保護身邊嘅人。

18世紀30年代franklin留意到街上面好多雙失青年，佢哋無所事事，淨係提起佢哋嘅雙膝，喺條街度跑嚟跑去、掟吓波、傳下波咁樣。呢個時候Frankie靈機一觸︰冇錯啦，救火正正係需要咁樣嘅團隊，一齊去傳水。於是佢招募咗30個年青力壯嘅後生仔，帶住佢哋訓練體能、編排陣形。每當有火災佢哋就會出動，用牛皮水袋裝水，一個傳一個將啲水傳到火場救火。就係咁，Franklin1736年成立咗美國第一個志願消防水地the union fire company，呢個亦都係美國消防體系嘅基礎。

去到19世紀開始，最早期嘅消防車出現喇。冇錯喇就係呢啲馬車啦。當時科技進步，蒸氣機嘅水泵技術越嚟越成熟，所以噴水裝置亦都愈嚟愈重，所以就用馬嚟拉，運送消防裝備，慳返啲人力。

但係救火呢啲嘢係分秒必爭嘅行動，有太多預計唔到嘅情況，所以有時用馬就會奶嘢...

1872年秋天，美國水牛城出現咗一種馬嘅流行瘟熱，24個鐘頭之內有300隻馬死咗。疫情蔓延到其他城市，短短一個月全國大部分嘅馬都感染咗，得返少量嘅馬可以繼續做運輸。

點知就係呢個時候波士頓發生咗一場超級大火，燒咗16個鐘。呢次嘅救火行動當中因為馬病咗，所以大部份嘅設施都要改為用人力運送到現場，大大減慢咗救援進度。事件最後有14個人死亡，包括11個消防員。亦都因為呢個悲劇所以呢啲消防馬車之後亦都正式退役。消防車亦都全面改為機械化嘅車。

人體空氣過濾器

運水嘅問題解決咗，唔好以為咁就救到火，如果唔係你就會自食其果。消防員要面對嘅敵人唔單只係火，而係煙。要入火場，首先就要避免吸入過多嘅有毒氣體。19世紀之前嘅消防員佢哋有個朵嘅，就係叫做smoke eater直接翻譯就係食煙人呀。因為當時佢哋未有過濾煙嘅呼吸裝置，所以成班消防員就會直接進入火場，焗住吸入啲有毒氣體。

但係咁都唔係路呀大佬呀，咁吸法好快咁冚旗㗎喎。咁佢哋當時有啲咩方法過濾空氣呢？你估都估唔到，就係用鬍鬚。當時班消防員係會特登留一執好長嘅鬚，入火場之前就用水浸一浸濕啲鬚，跟住就會用牙咬返自己嗰啲鬚，用嘴嚟呼吸，咁樣去過濾啲空氣嘅。

去到1863年倫敦消防隊長james發明咗第一個自給式呼吸器，大家睇下呢個裝置，首先係笠住個牛龜咁大個蜜蜂頭套，上面有個護目鏡去畀你睇嘢，跟住個頭套後邊連接一條管一路延伸到火場外面，出面就有另一條友不斷係咁踩個風爐輸送啲空氣入去畀個人。所以戴住呢個裝置係唔行得遠嘅，條管就未必夠長，就算真係夠長，行得太遠啲空氣傳唔到過去就大鑊。

邪惡消防隊

「有水有水冇水冇水要水過水冇水散水」(七十二家房客1973)呢句說話應該好多人都聽過㗎喇，即係畀錢有得救火，冇錢係睬你都傻。而古代真係有一隊消防員係咁市儈，呢一對消防隊由古羅馬嘅政治家克拉蘇Marcus Licinius Crassus創立，呢條友恃住自己出身上流社會，有錢又有人脈，就靠販賣奴隸賺咗好多錢。不過佢都仲嫌賺得唔夠多呀，佢諗咗個更加無良嘅賺錢方法，就係趁火打劫。

橫掂而家個政府都冇救火部門㗎，不如我叫班奴隸幫人救火，佢條命都唔值錢㗎喇，我仲可以喺當中撈返筆添。所以Crassus就用咗500個奴隸創立咗一隊消防隊，邊棟樓著火佢哋就第一時間趕到現場，睇嘢。佢哋咩都唔做，然之後克拉蘇就會同業主溝通︰嗱你棟嘢都燒緊㗎啦，
塊地都冇用㗎啦，不如平平哋我幫你收咗撻地呢？如果個業主同意賣地，呢班冇裝備嘅奴隸就被迫沖入火場幫佢救火。如果業主拒絕咗呀，佢哋就會眼白白睇住棟樓燒到渣都冇。所以呢啲並唔係消防員，而係燒房完，燒完間房就完啦。

騎士消防隊

頭先就講咗隊為私利嘅救火隊，以下落嚟我哋就會講一隊真係捨己為人嘅救火隊啦。佢哋就係一個中世紀嘅騎士團，佢哋嘅騎士標誌代表著救火精神，仲成為為而家啲消防部門嘅logo。佢哋就係叫做醫院騎士團，佢哋又叫做聖約翰騎士團，即係而家嘅聖約翰救傷隊嘅前身。

呢個騎士團係中世紀歐洲三大騎士團之一，唔單止創立醫院救人，仲會幫國家打仗。13世紀十字軍東征期間，有一次佢哋收到order要攻佔土耳其伊斯蘭軍隊嘅一座城，佢哋整裝待發、意志高昂，眼見都可以順利攻到入去敵人城牆防線嗰度。呢個時候土耳其軍突然間用火攻，佢哋喺城牆上面向住班騎士掟嗰啲裝滿油嘅玻璃樽落去，然之後再點著碌木車落去，下面班騎士就瞬間被火海包圍。因為事發突然，所以當時都唔會有啲咩救火工具，所以成班騎士就捨身拯救隊友，有啲選擇自己擋住啲火，掩護隊友走先、有啲選擇用自己嘅身體幫隊友撲火。

雖然攻城失敗，但係呢件事就流傳咗出去，成個歐洲都好佩服佢哋唔怕火嘅勇氣，所以佢哋嘅logo呢一個馬爾他十字架就成為後世一啲消防隊嘅標誌。例如美國消防部門就係咁㗎啦。

日式消防隊

現代消防員有唔同嘅分工，指揮、癱塌搜救隊、煙帽隊、醫療隊各司其職喺火場救援。不過古代消防佢哋嘅分工又係點嘅呢？而家就為大家介紹一隊江湖時代消防隊，佢哋嘅救火行動簡直就係漫畫情節。

日本江湖時代有個朵叫做city of fire，就係火災之城。因為當時貧富懸殊問題好嚴重，武士階級嘅上流人士就霸咗江湖三份之二嘅面積嚟住，而町人階級嘅平民就淨係住十份一嘅地方。咁多人焗住焗住喺同一個位，加上木屋起到密密麻麻，自自然然就會成日火災啦。

就係咁，呢班平民就組織咗自己嘅救火隊，稱之為「町火消」。佢哋成員個個都係義務幫拖㗎，平時返工放工咁樣，萬一有火災就會抌低啲工作，即刻出動救火，就好似超人咁啊。咪睇佢哋好似好業餘咁，佢哋救起火上嚟係好pro㗎。

首先佢哋有自己團隊嘅衫，睇下呢件袍幾鬼型，仲有得分長版短版，視乎你要咩size。然後佢哋都有自己嘅救火嘅指引，絕對係有plan有組織、唔會立亂行動嘅。以下落嚟就係佢哋救火嘅流程。

所謂輸人唔輸陣，打頭陣嘅就係旗手，當時仲會特登揀啲靚仔嚟擔任添。佢係救火行動嘅總指揮，亦都係團隊嘅靈魂人物。每次火燭旗手就會第一時間趕到現，爬上附近嘅高地，佢會舞動一支叫做「纏」嘅團隊標誌，一路振住個士氣，一路掌握住成個形勢作出指揮。嗱呢個職位其實都好危險㗎，雖然係負責指揮，但其實離火場係唔可以太遠嘅，所以啲火隨時係會蔓延過到嚟。

呢個時候就要介紹第二個崗位啦，就係護旗組。同樣都係指揮部嘅成員，佢哋就係負責全程保護個旗手，佢哋每人有一把大團扇，要嚟潑走啲火花同埋濃煙，確保旗手唔會比啲火苗燒親，同埋保持視野清晰嘅。而呢把扇表面重鋪咗啲浸過水嘅青苔，所以必要時仲可以直接拍熄啲火添。

講完指揮部啦，就到行動組喇，即係負責救火小隊呀。你睇下佢哋啲工具先。就係呢支叉同埋呢個勾啦。咩玩法啊大佬呀。冇錯，佢哋嘅救火方法就係拆你屋，將個火源隔離就係救火嘅第一步。所以當時嘅行動組，會用呢啲叉推爆啲木板、再用呢個勾拉爆啲橫樑木柱，將個火源前前後後嘅屋拆咗佢。

不過放心，佢哋唔係淨係拆屋嘅。同時間另一隊人會用水整熄個火源，佢哋當時用嘅工具就係呢一款龍吐水，同埋呢款水鐵砲。呢兩種都係一種泵式排水裝置，即係利用吸水泵嘅原理，噴啲水出嚟撲火。

最後就係善後隊嘅工作啦，救完火之後，善後隊就會逐家逐戶mark返今次行動被拆嘅房屋，跟住就會掛一個叫做「消札」嘅牌俾佢哋，表揚佢哋嘅犧牲同埋貢獻。

就係咁，呢一隊町火消就成為江戶時代民間救火嘅standard啦，而消防呢個詞亦都係江戶時代正式出現，一路沿用到而家嘅。

多謝各位，今集完。支持我哋嘅創作嘅話記得comment like share同埋subscribe我哋，我哋下集再見。